କଟକ ଅଫିସ,୨୬ା୫: ଆଉ ମିଳିବନି କଟକର ପ୍ରସିଦ୍ଧ ଦହିବରା ଆଳୁଦମ୍ର ସ୍ବାଦ। ବିଜୁ ପଟ୍ଟନାୟକ ଛକ ନିକଟ ଠେଲାଗାଡି ଚାରିପାଖେ ଆଉ ଆଗଭଳି ଗହଳି ଚହଳି ହେବନି କି କଟକରୁ ଦିଲ୍ଲୀଯାଏ ପହଞ୍ଚତ୍ବନି ନିଆରା ବ୍ୟଞ୍ଜନର ବାସ୍ନା। କାରଣ ଦହିବରା ଆଳୁଦମରେ ହୃଦୟ ଜିଣୁଥିବା ସେହି ସୁଆଦିଆ ଖାଦ୍ୟର ବିନ୍ଧାଣୀ ଈଶ୍ୱର ବେହେରା (୭୨) ଆଉ ନାହାନ୍ତି। ରବିବାର ହୃଦ୍ଘାତରେ ତାଙ୍କର ମୃତ୍ୟୁ ଘଟିଥିବାବେଳେ ଏବେ ସାରା ସହରବାସୀ ତାଙ୍କୁ ଝୁରି ହେଉଛନ୍ତି।
ରାଜ୍ୟର ବିଭିନ୍ନ ଜିଲାରେ ବିଭିନ୍ନ ପ୍ରକାର ଖାଦ୍ୟର ସ୍ବତନ୍ତ୍ର ପରିଚୟ ରହିଛି। କେନ୍ଦ୍ରାପଡାର ରସାବଳୀ, ଢେଙ୍କାନାଳର ବରା, ନିମାପଡ଼ାର ଛେନାଝିଲ୍ଲୀ ଭଳି କଟକର ଦହିବରା ଆଳୁଦମ୍ ରାଜ୍ୟ ସମେତ ରାଜ୍ୟ ବାହାରେ ପ୍ରସିଦ୍ଧି ଲାଭ କରିଛି। ତେବେ ଏହି ସୁସ୍ବାଦ ଖାଦ୍ୟକୁ ରାଜ୍ୟ ବାହାରେ ଲୋକପ୍ରିୟ କରାଇବାରେ ଈଶ୍ୱରଙ୍କ ପ୍ରମୁଖ ଭୂମିକା ରହିଥିଲା। କଟକ ତୁଳସୀପୁର ହିନ୍ଦୋଳକୋଠି ଛକ ରେଭିନ୍ୟୁ କଲୋନୀ ପଛପଟ ଘରେ ରହି ଆସୁଥିଲେ। ୯ ବର୍ଷର ହୋଇଥିବାବେଳେ ତାଙ୍କ ମାଆବାପାଙ୍କ ମୃତ୍ୟୁ ଘଟିଥିଲା। ଏହାପରେ ସେ କଟକ ବିଡାନାସୀସ୍ଥିତ ଭଉଣୀ ଘରେ ରହି ଦହିବରା ଆଳୁଦମ ପ୍ରସ୍ତୁତି ଶିଖିଥିଲେ। ୧୫ ବର୍ଷ ବୟସରୁ ନିଜେ କାନ୍ଧରେ ଦହିବରା ଆଳୁଦମ ବୋହି ସହରର ବିଭିନ୍ନ ସ୍ଥାନକୁ ବିକ୍ରି କରିବାକୁ ଯାଉଥିଲେ। ପରେ ସାଇକେଲରେ ଏହି ବ୍ୟବସାୟ ଚଳାଇଥିଲେ। ପରବର୍ତ୍ତୀ ସମୟରେ ଷ୍ଟାଡିୟମ ଓ ବିଜୁ ପଟ୍ଟନାୟକ ଛକ ନିକଟରେ ଠେଲାଗାଡିରେ ଦହିବରା ରଖି ବ୍ୟବସାୟକୁ ଆଗେଇ ନେଇଥିଲେ। କଟକ ସହରବାସୀ ଈଶ୍ୱରଙ୍କ ଦହିବରା ଆଳୁଦମ୍କୁ ବେଶ୍ ପସନ୍ଦ କରୁଥିଲେ। ସେହିପରି ବୁଲିବାକୁ ଆସୁଥିବା ଦିଲ୍ଲୀ, ବମ୍ବେ, ଗୁଜରାଟ, ବାଙ୍ଗାଲୋରର ଲୋକମାନେ ଈଶ୍ୱରଙ୍କର ଏହି ସୁସ୍ବାଦୁ ଖାଦ୍ୟ ଖାଇବା ସହ ସାଥିରେ ପାର୍ସଲ ନେଇଯାଉଥିଲେ। ଏବେ ତାଙ୍କ ଘରେ ସ୍ତ୍ରୀ, ଦୁଇ ପୁଅ ଓ ନାତୁଣୀନାତି ଅଛନ୍ତି।
ଏ ସମ୍ପର୍କରେ ଈଶ୍ୱରଙ୍କ ପୁଅ ଗଣେଶ ବେହେରା କହିଛନ୍ତି, ବାପା ପ୍ରାୟ ୫୭ ବର୍ଷ ହେବ ଏହି ବ୍ୟବସାୟ କରିଆସୁଥିଲେ। ତାଙ୍କୁ ଦହିବରା ତିଆରିରେ ପରିବାର ଲୋକେ ସାହାଯ୍ୟ କରୁଥିଲେ। ପରେ ତାହା ବିକ୍ରି ହେବା ପାଇଁ ଯାଉଥିଲା। ଏହାକୁ ଖାଇବାକୁ ଛୋଟଠାରୁ ବଡ ସଭିଏଁ ଛୁଟି ଆସୁଥିଲେ। ପାଖରେ ଟଙ୍କା ନ ଥାଇ ଯଦି ଗରିବ ପିଲାଟିଏ ତାଙ୍କ ଦୋକାନକୁ ଆସୁଥିଲା ଈଶ୍ୱର ତାଙ୍କ ପିଲାଦିନର ସଂଘର୍ଷମୟ ସମୟକୁ ଦେଖୁଥିଲେ। ପରେ ନ ଖୁଆଇ ତାଙ୍କୁ ଛାଡୁ ନଥିଲେ। ଏପରି କି ରାଷ୍ଟ୍ରପତି ରାମନାଥ କୋବିନ୍ଦଙ୍କ ପୁଅ ଈଶ୍ୱରଙ୍କ ହାତ ତିଆରି ଦହିବରା ଆଳୁଦମ୍ ଖାଇବାକୁ ଆସିଥିଲେ। ମୁଁ ଏବେ ତାଙ୍କ ପଦାଙ୍କ ଅନୁସରଣ କରୁଛି ବୋଲି ଗଣେଶ କହିଛନ୍ତି।