ଶ୍ରୀନଗର,୨।୧୦ : ଆଫଗାନ ଆତଙ୍କବାଦୀଙ୍କୁ ଜମ୍ମୁ-କଶ୍ମୀରରେ ଅନୁପ୍ରବେଶ କରାଇବା ଉଦ୍ୟମ ହେଉଛି। ଏଭଳି ଷଡ଼ଯନ୍ତ୍ର ପାକିସ୍ତାନୀ ଗୁଇନ୍ଦା ସଂସ୍ଥା ଆଇଏସଆଇ ରଚିଛି। ସୁରକ୍ଷା ବାହିନୀର ଆଭ୍ୟନ୍ତରୀଣ ରିପୋର୍ଟରେ ଉଲ୍ଲେଖ କରାଯାଇଛି ଯେ ଆଇଏସଆଇ କ୍ରମାଗତ ଭାବରେ ଉପତ୍ୟକାରେ ଆତଙ୍କବାଦୀଙ୍କୁ ଅନୁପ୍ରବେଶ କରିବାକୁ ଚେଷ୍ଟା କରୁଛି। ବିଶେଷ କରି ଆଫଗାନିସ୍ତାନ ଆତଙ୍କବାଦୀମାନଙ୍କୁ ଉପତ୍ୟକାକୁ ପଠାଇବା ପାଇଁ ଉଦ୍ୟମ କରାଯାଉଛି । ଯାହାଦ୍ୱାରା ଯଦି ଏକ ବଡ଼ ଆକ୍ରମଣ ହୁଏ, ତେବେ ପାକିସ୍ତାନ ଉପରେ କୌଣସି ଦୋଷ ପଡ଼ିବ ପଡ଼ିବ ନାହିଁ।
ସୂତ୍ରରୁ ଜଣାପଡିଛି ଯେ, ଆଫଗାନିସ୍ତାନରେ ତାଲିବାନ କ୍ଷମତାକୁ ଆସିବା ପରଠାରୁ ପାକିସ୍ତାନର ଗୁପ୍ତଚର ସଂସ୍ଥା ଆଫଗାନିସ୍ତାନ ଆତଙ୍କବାଦୀଙ୍କୁ ଉପତ୍ୟକାକୁ ପଠାଇବା ପାଇଁ ନିରନ୍ତର ଉଦ୍ୟମ ଜାରି ରଖିଛି। ଅନେକ ଥର ଆଫଗାନିସ୍ତାନ ଆତଙ୍କବାଦୀଙ୍କ ଗତିବିଧି ସୀମା ପାର ହୋଇଥିବାର ଦେଖାଯାଇଛି। ତଥାପି, ଏପର୍ଯ୍ୟନ୍ତ ସେମାନଙ୍କର ଉଦ୍ୟମ ସଫଳ ହୋଇନାହିଁ। ତେବେ ଏହାକୁ ନେଇ ଭାରତୀୟ ସେନା ପକ୍ଷରୁ କାଉଣ୍ଟର ରଣନୀତି ଉପରେ କାର୍ଯ୍ୟ ଜାରି ରହିଛି।
ଜଣେ ଅଧିକାରୀ କହିଛନ୍ତି ଯେ କେତେ ଆତଙ୍କବାଦୀ ରହିଛନ୍ତି ତାହାର ଆମେ ସଠିକ ସଂଖ୍ୟା ଦେଇ ପାରିବୁ ନାହିଁ କିନ୍ତୁ ଆଫଗାନିସ୍ତାନର ରାଜନୈତିକ ଘଟଣାକ୍ରମରେ ବିଦେଶୀ ଆତଙ୍କବାଦୀଙ୍କ ସଂଖ୍ୟା ବୃଦ୍ଧି ପାଇଛି। ପାକିସ୍ତାନରୁ ଡ୍ରୋନ ଦ୍ୱାରା ବିସ୍ଫୋରକ ପଠାଇବା ମଧ୍ୟ ଆଭ୍ୟନ୍ତରୀଣ ରିପୋର୍ଟରେ ଏକ ପ୍ରମୁଖ ଆହ୍ବାନ ବୋଲି ବିବେଚନା କରାଯାଇଛି। ପାକିସ୍ତାନକୁ ଲାଗିଥିବା ସୀମାନ୍ତ ଅଞ୍ଚଳରେ ଥିବା ଟନେଲଗୁଡିକ ମଧ୍ୟ ଉପତ୍ୟକା ପାଇଁ ଚିନ୍ତାର କାରଣ ପାଲଟିଛି।
