ବାଲେଶ୍ୱର ଅଫିସ,୧୧।୨- ବାଲେଶ୍ୱର ଜିଲା ଚାନ୍ଦିପୁରସ୍ଥିତ ପ୍ରତିରକ୍ଷା ଗବେଷଣା ଏବଂ ବିକାଶ ସଂଗଠନ(ଡିଆର୍ଡିଓ)ର ଗୁପ୍ତ ତଥ୍ୟ ଆଇଏସ୍ଆଇ ଏଜେଣ୍ଟଙ୍କୁ ପ୍ରଦାନ କରିବା ଅଭିଯୋଗରେ ଗିରଫ ଈଶ୍ୱର ବେହେରା ଦୋଷୀ ସାବ୍ୟସ୍ତ ହୋଇଛନ୍ତି। ଏହି ମାମଲାର ବିଚାର କରି ଗୁରୁବାର ବାଲେଶ୍ୱର ଜିଲା ଦୌରାଜଜ୍-୧ ଗିରିଜା ପ୍ରସାଦ ମହାପାତ୍ର ଦେଶଦ୍ରୋହ ଅପରାଧରେ ଅଭିଯୁକ୍ତ ଈଶ୍ୱରଙ୍କୁ ଆଜୀବନ କାରାଦଣ୍ଡ ସହ ମୋଟ ୩୦ହଜାର ଟଙ୍କା ଅର୍ଥ ଦଣ୍ଡରେ ଦଣ୍ଡିତ କରିଛନ୍ତି। ଜରିମାନା ଅନାଦାୟ କ୍ଷେତ୍ରରେ ଅଧିକ ଏକ ବର୍ଷ ଜେଲ ଦଣ୍ଡ ଭୋଗିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି।
ଡିଆର୍ଡିଓରେ କାର୍ଯ୍ୟରତ ଠିକା ଫଟୋଗ୍ରାଫର ତଥା ମୟୂରଭଞ୍ଜ ଜିଲା କଣ୍ଟିପୁର ଅଞ୍ଚଳର ଈଶ୍ୱର ବେହେରାଙ୍କୁ ଆଇଏସ୍ଆଇ ଲିଙ୍କ୍ ଅଭିଯୋଗରେ ୨୦୧୪ ଡିସେମ୍ବର ୨୨ରେ ଚାନ୍ଦିପୁର ପୋଲିସ ଗିରଫ କରିଥିଲା। ପରେ ତାଙ୍କୁ କ୍ରାଇମ୍ବ୍ରାଞ୍ଚକୁ ହସ୍ତାନ୍ତର କରାଯାଇଥିଲା। କ୍ରାଇମ୍ବ୍ରାଞ୍ଚ କେସ୍ ନଂ ୬/୨୦୧୫ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ସେ ପାକିସ୍ତାନ ଏଜେଣ୍ଟ ଆଶିଫ ଅଲ୍ଲୀଙ୍କ ସହ ସମ୍ପର୍କ ରଖି ମିଲିଟାରୀ ତଥ୍ୟକୁ ଶତ୍ରୁ ପକ୍ଷକୁ ବିକୁଥିଲେ। ଏଥିପାଇଁ ଈଶ୍ୱର ସେମାନଙ୍କଠାରୁ ବହୁ ଅର୍ଥ ମଧ୍ୟ ଆଣୁଥିଲେ ବୋଲି କ୍ରାଇମ୍ବ୍ରାଞ୍ଚ ତଦନ୍ତ ସମୟରେ ଜାଣିବାକୁ ପାଇଥିଲା। ଈଶ୍ୱର ୯ଅଙ୍କ ବିଶିଷ୍ଟ ଏକ ଫୋନ ନମ୍ବରରେ ଆଇଏସ୍ଆଇ ଏଜେଣ୍ଟଙ୍କ ସହ କଥାବାର୍ତ୍ତା ହେଉଥିଲେ। ଯେଉଁ ନମ୍ବରରେ କଥା ହୋଇଥିଲେ ସେହି ନମ୍ବର ଆଗରୁ +୯୧ ଲାଗିଥିଲା। ଈଶ୍ୱର ବାହାର ଦେଶର ଏକ ନମ୍ବରରୁ ଆସିଥିବା କଲ୍ରୁ କଥା ହେଉଥିବା ଇଣ୍ଟରଭ୍ୟୁ ଡାଟାରୁ ଜଣାଯାଇଥିଲା। ତାଙ୍କର ଭଏସ୍ ସାମ୍ପୁଲ୍ ସାଇଣ୍ଟିଫିକ୍ ଲ୍ୟାବକୁ ପଠାଯାଇଥିଲା। ଈଶ୍ୱର ନିୟମିତଭାବେ ଆଇଏସ୍ଆଇ ଏଜେଣ୍ଟଙ୍କ ଯୋଗାଯୋଗରେ ରହିଥିଲେ। ଆଇଟିଆର୍ କ୍ଷେପଣାସ୍ତ୍ର ପରୀକ୍ଷଣ ପୂର୍ବରୁ ସେ ଆଇଏସ୍ଆଇ ଏଜେଣ୍ଟଙ୍କୁ ଜଣାଇ ଦେଉଥିଲେ। ଈଶ୍ୱରଙ୍କ ଆକାଉଣ୍ଟକୁ ଆବୁଧାବି ସହ ବିହାର, ଆଜମେର, କୋଲକାତାରୁ ମଧ୍ୟ ଟଙ୍କା ଆସିଛି। ଏକ ଟିଭି କିଣିବାକୁ ଈଶ୍ୱର ଆଇଏସ୍ଆଇ ଏଜେଣ୍ଟଙ୍କୁ ପଇସା ମାଗିଥିଲେ। ଈଶ୍ୱରଙ୍କ ଏକ ୬୬ ସେକେଣ୍ଡର ବାର୍ତ୍ତାଳପ ହେଉଛି ଆଇଏସ୍ଆଇ ଲିଙ୍କର ବଳିଷ୍ଠ ପ୍ରମାଣ। ତାଙ୍କ ବିରୋଧରେ ଲାଗିଥିବା ଆଇପିସି ଦଫା ୧୨୦(ବି)/୧୨୧/୧୨୧(ଏ) ସହ ଅଫିସିଆଲ୍ ସିକ୍ରେଟ ଆକ୍ଟର ଦଫା ୩ ଓ ୫ରେ ଦୋଷୀ ସାବ୍ୟସ୍ତ କରାଯାଇଛି।
ସରକାରଙ୍କ ପକ୍ଷରୁ ବରିଷ୍ଠ ଆଇନଜୀବୀ ଚିତ୍ତରଞ୍ଜନ କାନୁନ୍ଗୋ ମାମଲା ପରିଚାଳନା କରି ଏହା ଏକ ସଙ୍ଗୀନ ଅପରାଧ, ଏଭଳି ଅପରାଧ ସାରା ଦେଶର ନାଗରିକଙ୍କ ପାଇଁ ବିପଦ। ଦେଶକୁ ଯୁଦ୍ଧମୁହଁକୁ ଠେଲି ଦିଆଯିବାକୁ ଚେଷ୍ଟା କରାଯାଇଥିଲା ବୋଲି କହିଛନ୍ତି। କୋର୍ଟରେ ତାଙ୍କୁ ମୃତ୍ୟୁଦଣ୍ଡ ଦିଆଯାଉ ବୋଲି ପ୍ରାର୍ଥନା କରାଯାଇଥିଲା। ଅଦାଲତ ଶୁଣାଣି ସମୟରେ ୨୯ଜଣଙ୍କ ସାକ୍ଷ୍ୟ, ୩୪ ଦଲିଲ୍ ଦସ୍ତାବିଜ, ୩୬ ପ୍ରକାର ସାମଗ୍ରୀ ପ୍ରମାଣ ଆଧାରରେ ଦୋଷୀଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିବା କାନୁନ୍ଗୋ କହିଛନ୍ତି।