ମାର୍ଗାଓ, ୨୩।୧୧- ଫତୋର୍ଦାର ଜବାହରଲାଲ ନେହେରୁ ଷ୍ଟାଡିୟମରେ ରବିବାର ବେଙ୍ଗାଲୁରୁ ଏଫସି ଓ ଗୋଆ ମଧ୍ୟରେ ଅନୁଷ୍ଠିତ ମ୍ୟାଚ ୨-୨ ଗୋଲରେ ଡ୍ର ରହିଛି। ଫଳରେ ଉଭୟ ଦଳ ପଏଣ୍ଟ ଭାଗ କରିଛନ୍ତି। ୬୫ ମିନିଟ ପର୍ଯ୍ୟନ୍ତ ବେଙ୍ଗାଲୁରୁ ୨-୦ରେ ଅଗ୍ରଣୀ ରହିଥିଲେ ହେଁ ୨ ମିନିଟ ବ୍ୟବଧାନରେ ଇଗର ଆଙ୍ଗୁଲୋଙ୍କ ୨ ଗୋଲ ବଳରେ ଗୋଆ ସଫଳ ପ୍ରତ୍ୟାବର୍ତ୍ତନ କରିଥିଲା। ଫଳରେ ଆଙ୍ଗୁଲୋଙ୍କୁ ହିରୋ ଅଫ୍ ଦି ମ୍ୟାଚ ପୁରସ୍କାର ପ୍ରଦାନ କରାଯାଇଥିଲା।
ଗତ ସଂସ୍କରଣର ଦୁଇ ସେମିଫାଇନାଲିଷ୍ଟ ବେଙ୍ଗାଲୁରୁ ଓ ଗୋଆ ମଧ୍ୟରେ ଏଠାରେ ଅନୁଷ୍ଠିତ ମ୍ୟାଚ ଆରମ୍ଭରୁ ସଂଘର୍ଷପୂର୍ଣ୍ଣ ହୋଇଥିଲା। ମ୍ୟାଚର ୨୭ତମ ମିନିଟରେ କ୍ଲିଟନ ସିଲ୍ଭା ଗୋଲ ଦେଇ ବେଙ୍ଗାଲୁକୁ ଅଗ୍ରଣୀ କରାଇଥିଲେ। ହେଡ୍ ଜରିଆରେ ଗୋଲ ଦେବାପରେ ଆକ୍ରୋବେଟିକ୍ ଷ୍ଟାଇଲ୍ରେ ସେଲିବ୍ରେଶନ କରିଥିଲେ କ୍ଲିଟନ। ପ୍ରଥମାର୍ଦ୍ଧରେ ବେଙ୍ଗାଲୁରୁ ୧-୦ରେ ଅଗ୍ରଣୀ ରହିବାପରେ ୫୭ତମ ମିନିଟରେ ଜୁଆନାନ୍ ଗୋଲ ଦେଇ ବେଙ୍ଗାଲୁରୁ ଅଗ୍ରଣୀକୁ ୨-୦ରେ ପହଞ୍ଚାଇଥିଲେ। ମାତ୍ର ଗତବର୍ଷ ପଏଣ୍ଟ ଟେବୁଲର ଶୀର୍ଷରେ ରହିଥିବା ଗୋଆ ସହଜରେ ଛାଡ଼ିବାକୁ ପ୍ରସ୍ତୁତ ନ ଥିଲା। ବେଙ୍ଗାଲୁରୁ ଡିଫେନ୍ସରେ ତ୍ରୁଟିରୁ ଫାଇଦା ଉଠାଇ ସ୍ପାନିଶ୍ ଫରଓ୍ବାର୍ଡ ଆଙ୍ଗୁଲୋ ୬୬ତମ ମିନିଟରେ ଗୋଟିଏ ଗୋଲ ପରିଶୋଧ କରିଥିଲେ। ଏହାର ୨ ମିନିଟ ପରେ ଅର୍ଥାତ୍ ୬୮ତମ ମିନିଟରେ ଆଙ୍ଗୁଲୋ ବ୍ୟକ୍ତିଗତ ଦ୍ୱିତୀୟ ଗୋଲ ଦେଇ ମ୍ୟାଚକୁ ୨-୨ ସ୍ଥିତିକୁ ନେଇ ଆସିଥିଲେ। ଅବଶିଷ୍ଟ ୨୨ ମିନିଟ ମଧ୍ୟରେ ଆକ୍ରମଣ ପ୍ରତିଆକ୍ରମଣ ଜୋରଦାର ହୋଇଥିଲେ ହେଁ ଆଉ ଗୋଲ ହୋଇପାରି ନ ଥିଲା।