କାବୁଲ,୨୭।୧୨ : ଆଫଗାନିସ୍ତାନରେ କ୍ଷମତାରେ ଥିବା ତାଲିବାନ ଶାସକଙ୍କ କୃରତା ଯୋଗୁ ବର୍ତ୍ତମାନ ସରକାର ଇସଲାମ ଜଗତରୁ ମଧ୍ୟ ବିଚ୍ଛିନ୍ନ ହେବାରେ ଲାଗିଛନ୍ତି।
ବିଶ୍ୱବିଦ୍ୟାଳୟରେ ମହିଳା ଶିକ୍ଷା ଉପରେ ପ୍ରତିବନ୍ଧକ ଲଗାଇବାକୁ ବିଶ୍ୱର ବିଭିନ୍ନ ରାଷ୍ଟ୍ର ତଥା ଇସଲାମ ଦେଶରେ ମଧ୍ୟ ନିନ୍ଦା କରାଯାଇଛି। ଇସଲାମିକ ଦେଶ ସଂଗଠନ (ଓଆଇସି) ମଧ୍ୟ ଏହାକୂ ନେଇ ସ୍ବର ଉଠାଇଛି।
ଓଆଇସି ସେକ୍ରେଟେରୀ ଜେନେରାଲ ହିସେନ ବ୍ରାହିମ ଏହି ନିଷେଧାଦେଶକୁ ନେଇ ଉଦବେଗ ପ୍ରକାଶ କରିଛନ୍ତି। ସେ କହିଛନ୍ତି ଯେ ଏହି ନିଷ୍ପତ୍ତି କେବଳ ଆଫଗାନିସ୍ତାନ ମହିଳାମାନଙ୍କୁ ଜୀବିକା ସୁଯୋଗରୁ ବଞ୍ଚିତ କରିବ ନାହିଁ, ତାଲିବାନର ସର୍ବଶେଷ ନିଷ୍ପତ୍ତି ଆଫଗାନିସ୍ତାନରେ ଚାଲିଥିବା ଅନ୍ତର୍ଜାତୀୟ ମାନବିକ ସହାୟତା କାର୍ଯ୍ୟକ୍ରମ ଉପରେ ମଧ୍ୟ ପ୍ରଭାବ ପକାଇବ।
ଅନ୍ୟପକ୍ଷରେ ସୌଦି ଆରବ ଏବଂ ପାକିସ୍ତାନ ମଧ୍ୟ ଏହି ନିଷ୍ପତ୍ତିକୁ ସମାଲୋଚନା କରିଛନ୍ତି। ସୋମବାର ଫୋନ ବାର୍ତ୍ତାଳାପରେ ସୌଦି ଆରବର ବୈଦେଶିକ ମନ୍ତ୍ରୀ ଫୈସଲ ବିନ ଫହରାନ ଅଲ ସାଉଦ ଏବଂ ପାକିସ୍ତାନର ପ୍ରତିପକ୍ଷ ବିଲାୱାଲ ଭୁଟ୍ଟୋ ଜରଦାରୀ ଆଫଗାନିସ୍ତାନର ପରିସ୍ଥିତି ସମ୍ପର୍କରେ ଆଲୋଚନା କରିଛନ୍ତି। ପରେ ଜାରି କରାଯାଇଥିବା ଏକ ବିବୃତ୍ତିରେ କୁହାଯାଇଛି ଯେ ଦୁଇ ବୈଦେଶିକ ମନ୍ତ୍ରୀ ମହିଳାଙ୍କ ସମସ୍ତ ଅଧିକାର ତଥା ବିଭିନ୍ନ ବର୍ଗରେ ସେମାନଙ୍କର ସମାନ ଅଂଶଗ୍ରହଣ ନିଶ୍ଚିତ କରିବାକୁ ପ୍ରତିଶ୍ରୁତି ଦେଇଛନ୍ତି।