ନୂଆଦିଲ୍ଲୀ,୬।୧୧: ହମାସ ସହିତ ଯୁଦ୍ଧ ମଧ୍ୟରେ ଭାରତକୁ ସାହାଯ୍ୟ ମାଗିଛି ଇସ୍ରାଏଲ। ଦେଶରୁ ପାଲେଷ୍ଟାଇନ ଶ୍ରମିକ ଯିବା ପରେ ଭାରତରୁ ଏକ ଲକ୍ଷ ଶ୍ରମିକ ମାଗିଛି ଇସ୍ରାଏଲ। ବର୍ତ୍ତମାନ ଇସ୍ରାଏଲରେ ବିଭିନ୍ନ ନିର୍ମାଣ କାର୍ଯ୍ୟରେ ନିୟୋଜିତ ଥିବା ଏକ ଲକ୍ଷ ପାଲେଷ୍ଟାଇନ ଶ୍ରମିକଙ୍କୁ ଭାରତୀୟ ଶ୍ରମିକମାନେ ପରିବର୍ତନ କରିବେ। ଚଳିତ ବର୍ଷ ମେ ମାସରେ ୪୨ ହଜାର ଭାରତୀୟ ଶ୍ରମିକଙ୍କୁ ଇସ୍ରାଏଲରେ କାର୍ଯ୍ୟ କରିବାକୁ ସରକାର ଅନୁମତି ଦେଇଥିଲେ।
ଇସ୍ରାଏଲରେ ହଜାର ହଜାର ପାଲେଷ୍ଟାଇନ କର୍ମଚାରୀଙ୍କ ପାଇଁ କାମ କରିବାର ଅନୁମତି ବାତିଲ କରିବା ପରେ ଇସ୍ରାଏଲର ନିର୍ମାଣ କ୍ଷେତ୍ରକୁ ଭାରତରୁ ବହୁ ସଂଖ୍ୟକ ଶ୍ରମିକ ଇସ୍ରାଏଲରେ ଶ୍ରମ ଅଭାବକୁ ପୂରଣ କରିବାର ଚର୍ଚ୍ଚା ଜୋର ଧରିଛି। ଅକ୍ଟୋବର ୭ ରୁ ଆରମ୍ଭ ହୋଇଥିବା ଇସ୍ରାଏଲ-ହାମାସ ବିବାଦ ପରଠାରୁ ଇସ୍ରାଏଲରେ ବିଭିନ୍ନ ଶିଳ୍ପ ଉପରେ ଏହାର ପ୍ରଭାବ ପଡିଛି।
ରିପୋର୍ଟ ଅନୁଯାୟୀ ଇସ୍ରାଏଲି ବିଲଡର୍ସ ଆସୋସିଏସନ ଭାରତରୁ ଏକ ଲକ୍ଷ ଶ୍ରମିକ ମଗାଇବା ପାଇଁ ସରକାରଙ୍କୁ ଅନୁମତି ମାଗିଛି। ଏନେଇ ଇସ୍ରାଏଲି ବିଲଡର୍ସ ଆସୋସିଏସନର ଉପ ସଭାପତି ହେମ୍ ଫାଇଗ୍ଲୀନ କହିଛନ୍ତି ଭାରତ ସରକାରଙ୍କ ସହିତ ଚାଲିଥିବା ଆଲୋଚନା ଅମଧ୍ୟରେ ଇସ୍ରାଏଲ ସରକାରଙ୍କ ଅନୁମତିକୁ ଆମେ ଅପେକ୍ଷା କରିଛୁ। ତେବେ ଭାରତରୁ ୫୦ ହଜାରରୁ ୧ ଲକ୍ଷ ଶ୍ରମିକ ଆଣିବା ଆମ ଲକ୍ଷ୍ୟ ରହିଛି।
