ଜେରୁଜେଲମ୍,୭ା୫: ଗାଜାର ଦକ୍ଷିଣ ଭାଗରେ ଥିବା ରାଫାହ ସହରରୁ ୧ ଲକ୍ଷ ପାଲେଷ୍ଟିନୀୟଙ୍କୁ ଖାଲି କରିବା ପାଇଁ ଇସ୍ରାଏଲୀ ସେନା ନିର୍ଦ୍ଦେଶ ଦେବା ପରେ ସେମାନଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଉଛି। ଉକ୍ତ ଅଞ୍ଚଳରେ ଇସ୍ରାଏଲ ଦୀର୍ଘମିଆଦୀ ସ୍ଥଳଯୁଦ୍ଧ ଚଳାଇବାକୁ ଯାଉଥିବାର ସଙ୍କେତ ମିଳିଛି। ଫଳରେ ଯୁଦ୍ଧବିରତି ପାଇଁ ମଧ୍ୟସ୍ଥ ଦେଶ ପକ୍ଷରୁ ଚାଲିଥିବା ଉଦ୍ୟମ ଫଳପ୍ରଦ ହେବା ନେଇ ଆଶଙ୍କା ଦେଇଦେଇଛି। ଗାଜା ଉପରେ ଇସ୍ରାଏଲ୍ ଆକ୍ରମଣ ଆରମ୍ଭ କରିବା ପରେ ରାଫାହରେ ୧୦ ଲକ୍ଷରୁ ଊର୍ଦ୍ଧ୍ୱ ପାଲେଷ୍ଟିନୀୟ ଆଶ୍ରୟ ନେଇଥିଲେ। ସେମାନଙ୍କ ମଧ୍ୟରୁ ଅନେକ ଯୁଦ୍ଧରେ ନିହତ ହୋଇଥିବା ଆଶଙ୍କା କରାଯାଉଛି। ପାଲେଷ୍ଟିନୀୟ ଶରଣାର୍ଥୀମାନଙ୍କୁ ସେବା ଯୋଗାଉଥିବା ଜାତିସଂଘ ସଂସ୍ଥା ଇସ୍ରାଏଲ୍ର ବିସ୍ଥାପନ ନିର୍ଦ୍ଦେଶକୁ ପାଳନ କରିବ ନାହିଁ ବୋଲି କହିଛି। ଅନ୍ୟପକ୍ଷରେ ଇସ୍ରାଏଲ୍ର କହିବା କଥା ହେଲା ୭ ମାସର ଆକ୍ରମଣ ପରେ ରାଫାହ ହମାସ ଆତଙ୍କବାଦୀଙ୍କ ନିରାପଦ ଆଡ୍ଡାରେ ପରିଣତ ହୋଇଛି। ଏହି ଆତଙ୍କବାଦୀ ଗୋଷ୍ଠୀକୁ ନିପାତ କରିବାକୁ ହେଲେ ସ୍ଥଳ ଆକ୍ରମଣ ଜରୁରୀ ବୋଲି ଇସ୍ରାଏଲୀ ସେନା କହିଛି। ଇଜିପ୍ଟ ସୀମାକୁ ଲାଗିଥିବା ରାଫାହରେ ଇସ୍ରାଏଲ୍ର ଆକ୍ରମଣକୁ ନେଇ ହମାସ ଏବଂ ଯୁଦ୍ଧବିରତି ଉଦ୍ୟମରେ ମୁଖ୍ୟ ମଧ୍ୟସ୍ଥ ଭୂମିକା ତୁଲାଉଥିବା କାତାର ପକ୍ଷରୁ ଚେତାବନୀ ଦିଆଯାଇଛି। ଅସ୍ତ୍ରବିରତି ଉଦ୍ୟମ ପାଇଁ ଅନ୍ତର୍ଜାତୀୟ ମଧ୍ୟସ୍ଥମାନଙ୍କ ଉଦ୍ୟମକୁ ଏଡ଼ାଇଯିବା ପାଇଁ ଇସ୍ରାଏଲ୍ ଆକ୍ରମଣକୁ ଜୋର୍ଦାର କରିବାକୁ ଯୋଜନା କରୁଥିବା କୁହାଯାଉଛି। ଏକ ସୀମିତ ସାମରିକ କାର୍ଯ୍ୟାନୁଷ୍ଠାନ ପାଇଁ ପ୍ରସ୍ତୁତି ଚାଲିଥିବା ଇସ୍ରାଏଲ୍ ସେନା ମୁଖପାତ୍ର ଲ୍ୟୁଟ୍ନାଣ୍ଟ କନୋନେଲ ନାଡାଭ ଶୋଶାନି କହିଛନ୍ତି। ତେବେ କେତେବେଳେ ବଡ଼ ଆକ୍ରମଣ ଆରମ୍ଭ ହେବ କୁହାଯାଇପାରିବ ନାହିଁ ବୋଲି ସେ ସୂଚନା ଦେଇଛନ୍ତି। ରାଫାହରେ ଆକ୍ରମଣ ବ୍ୟତୀତ ଅନ୍ୟ ବିକଳ୍ପ ନାହଁ ବୋଲି ଇସ୍ରାଏଲ୍ ପ୍ରତିରକ୍ଷା ମନ୍ତ୍ରୀ ଆମେରିକା ପ୍ରତିପକ୍ଷ ଲୟଡ୍ ଅଷ୍ଟିନ୍ଙ୍କୁ କହିଛନ୍ତି। ରବିବାର ରାଫାହରୁ ହମାସ୍ ଆତଙ୍କବାଦୀ ରକେଟ ଆକ୍ରମଣ କରିବାରୁ ଇସ୍ରାଏଲ୍ର ୪ ସୈନ୍ୟ ନିହତ ହୋଇଥିଲେ।