ଜେରୁଜେଲମ,୧୦।୧୦: ଇସ୍ରାଏଲ ଏବଂ ହମାସ ମଧ୍ୟରେ ଚାଲିଥିବା ଯୁଦ୍ଧ ଗାଜା ବ୍ୟତୀତ ଅନ୍ୟ ଅଞ୍ଚଳରେ ବ୍ୟାପିବାର ଆଶଙ୍କା ବଢିଛି। ଲେବାନନରୁ ଇସ୍ରାଏଲ ଅଞ୍ଚଳରେ ଅନୁପ୍ରବେଶ ପାଇଁ ପ୍ରୟାସ କରାଯାଉଛି।
ସୋମବାର ଇସ୍ରାଏଲର ସେନା ଲେବାନନରୁ ଏହାର ଅଞ୍ଚଳରେ ପ୍ରବେଶ କରୁଥିବା ସଶସ୍ତ୍ର ସନ୍ଦିଗ୍ଧଙ୍କୁ ହତ୍ୟା କରିଛି। ଏହି ସମୟରେ ଯୁଦ୍ଧ ବନ୍ଦ କରିବାକୁ ଉଦ୍ୟମ ମଧ୍ୟ ଆରମ୍ଭ ହୋଇଛି। ଇସ୍ରାଏଲ ଏବଂ ହମାସ ମଧ୍ୟରେ ମଧ୍ୟସ୍ଥତା ପାଇଁ ଇଜିପ୍ଟ ଏବଂ କତାର ଉଦ୍ୟମ ଜୋରଦାର କରିଛନ୍ତି।
ଇସ୍ରାଏଲ ସେନା ଅନୁପ୍ରବେଶକାରୀଙ୍କୁ ହତ୍ୟା କରିଥିବା ଦାବି କରିଛି, କିନ୍ତୁ ସେମାନଙ୍କ ସଂଖ୍ୟା ପ୍ରକାଶ କରି ନାହିଁ। ଡ୍ରୋନ ସହିତ ସୀମା ଉପରେ ମଧ୍ୟ ନଜର ରଖାଯାଉଛି ଏବଂ ହେଲିକପ୍ଟର ଯୋଗେ ସନ୍ଦିଗ୍ଧଙ୍କୁ ଟାର୍ଗେଟ କରାଯାଉଛି ବୋଲି ସେନା କହିଛି। ତେବେ ଇସ୍ରାଏଲ ବିରୋଧରେ କୌଣସି ସଶସ୍ତ୍ର ଅଭିଯାନ ଆରମ୍ଭ କରିବାକୁ ହିଜବୁଲ ମନା କରିଦେଇଛି।
ଏଥି ସହ ହିଜବୁଲାର ଅଲ-ମାନର ଟିଭିର ଜଣେ ସମ୍ବାଦଦାତା ସୋସିଆଲ ମିଡିଆରେ ଏକ ପୋଷ୍ଟରେ କହିଛନ୍ତି ଯେ ଇସ୍ରାଏଲ ସହ ଦକ୍ଷିଣ ଲେବାନନ ସୀମାରେ ତୋପ ଓ ଟାଙ୍କ ଗୁଳିର ଶବ୍ଦ ଶୁଣାଯାଇଛି। ଲେବାନନ-ଇସ୍ରାଏଲ ସୀମାରେ ହୋଇଥିବା ଆକ୍ରମଣ ପାଇଁ ପାଲେଷ୍ଟାଇନ ଇସଲାମିକ ଜିହାଦ ଆନ୍ଦୋଳନର ଅଲ କୁଦ୍ସ ବ୍ରିଗେଡ ଦାୟୀ ବୋଲି କହିଛି।
ଏହି ସମୟରେ, ଇଜିପ୍ଟର ସୁରକ୍ଷା ସୂତ୍ର ଅନୁଯାୟୀ, ବିବାଦ ବନ୍ଦ କରିବା ପାଇଁ ଇଜିପ୍ଟ ଉଭୟ ହମାସ ଏବଂ ଇସ୍ରାଏଲ ସହ ଯୋଗାଯୋଗରେ ଅଛି। ଇଜିପ୍ଟ ପୂର୍ବରୁ ଉଭୟ ପକ୍ଷ ମଧ୍ୟରେ ମଧ୍ୟସ୍ଥତା କରିଛି। କତାରର ମଧ୍ୟସ୍ଥମାନେ ମଧ୍ୟ ହମାସ ସହିତ ଜଡିତ ଲୋକଙ୍କ ସହ ଯୋଗାଯୋଗ କରିଛନ୍ତି।
ଇସ୍ରାଏଲର ଜେଲରେ ରଖାଯାଇଥିବା ୩୬ ପାଲେଷ୍ଟାଇନ ମହିଳା ଏବଂ ଶିଶୁଙ୍କ ବଦଳରେ ବନ୍ଧକ ରଖାଯାଇଥିବା ଇସ୍ରାଏଲ ମହିଳା ଏବଂ ଶିଶୁମାନଙ୍କୁ ମୁକ୍ତ କରିବା ପାଇଁ ସେମାନେ ଆଲୋଚନା କରୁଛନ୍ତି। ତେବେ କୌଣସି ଆଲୋଚନା ଚାଲିନାହିଁ ବୋଲି ଜଣେ ଇସ୍ରାଏଲ ଅଧିକାରୀ କହିଛନ୍ତି।
