ଦୁବାଇ,୨୦ା୪: ଇରାନ୍ ଉପରେ ଇସ୍ରାଏଲୀ ସେନା ଶୁକ୍ରବାର ମିଶାଇଲ୍ ଆକ୍ରମଣ କରିଥିବା ଆମେରିକାର ଜଣେ ବରିଷ୍ଠ ସେନା ଅଧିକାରୀ ସୂଚନା ଦେଇଛନ୍ତି। ଇରାକ୍ ଓ ସିରିଆରେ ମଧ୍ୟ ବିସ୍ଫୋରଣ ଘଟିଛି। ଗତ ରବିବାର ତେହେରାନ୍ ଇସ୍ରାଏଲ୍ ଉପରେ ଏୟାରଷ୍ଟ୍ରାଇକ୍ କରିଥିବାବେଳେ ଏହାର ପ୍ରତିଶୋଧ ନେବ ବୋଲି ଇସ୍ରାଏଲ୍ କହିଥିଲା। ଇରାନର ଶତାଧିକ ଡ୍ରୋନ୍ ଏବଂ ମିଶାଇଲ୍ ଆକ୍ରମଣର ଜବାବ ଇସ୍ରାଏଲ୍ ଦେଇଥିବା କୁହାଯାଉଛି। ଅନ୍ୟପକ୍ଷରେ ଇରାନ୍ ସୈନ୍ୟ କେନ୍ଦ୍ରୀୟ ଇସ୍ଫାହାନ ସହର ନିକଟରେ ଥିବା ବୃହତ୍ ଏୟାରବେସ୍ ଏବଂ ଆଣବିକ କେନ୍ଦ୍ର ନିକଟରେ ଏୟାର ଡିଫେନ୍ସ ସହାୟତାରେ ଇସ୍ରାଏଲ୍ ଡ୍ରୋନ୍କୁ ଖସାଇଦେଇଛି। ତେବେ ଇସ୍ରାଏଲ୍ର ଆକ୍ରମଣ ସମ୍ଭାବନାକୁ ଇରାନର କୌଣସି ଅଧିକାରୀ ସିଧାସଳଖ ସ୍ବୀକାର କରିନାହାନ୍ତି। ସେହିପରି ଇସ୍ରାଏଲୀ ସେନା ମଧ୍ୟ କୌଣସି ଉତ୍ତର ଦେବାକୁ ମନା କରିଦେଇଛି।
ଇରାନ ଏହାର ଅନେକ ସହରରେ ଏୟାର ଡିଫେନ୍ସ ସିଷ୍ଟମ୍କୁ ସକ୍ରିୟ କରିଥିବା ସରକାରୀ ଗଣମାଧ୍ୟମରେ କୁହାଯାଇଛି। ଇରାନର ତୃତୀୟ ବୃହତ୍ ସହର ଇସ୍ଫାହାନ ନିକଟରେ ବିସ୍ଫୋରଣର ଶବ୍ଦ ଶୁଭିଥିବା ସରକାରୀ ପ୍ରସାରଣ ସଂସ୍ଥା କହିଛି। ଉକ୍ତ ସହରରେ ଅନେକ ଆଣବିକ କେନ୍ଦ୍ର ରହିଛି। ସେଗୁଡ଼ିକ ସମ୍ପୂର୍ଣ୍ଣ ସୁରକ୍ଷିତ ବୋଲି ଇରାନ୍ର ତାସ୍ନିମ ନ୍ୟୁଜ୍ ଏଜେନ୍ସି କହିଛି। ଇରାନ ଉପରେ ମିଶାଇଲ୍ ଆକ୍ରମଣ ନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇଥିବାବେଳେ ତେହେରାନ ଏହାକୁ ଖଣ୍ଡନ କରିଛି। ଇସ୍ରାଏଲ୍ର କେତେକ ଡ୍ରୋନ୍କୁ ଇରାନ୍ ଖସାଇଦେଇଥିବା କହିଛି।