ବେରୁଟ୍,୧୭ା୮: ଲେବାନନ୍ର ଦକ୍ଷିଣ ଭାଗରେ ଇସ୍ରାଏଲ୍ ସେନା ଆକ୍ରମଣ କରିବାରୁ ୧୦ ଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଜଣେ ମହିଳା ଓ ତାଙ୍କର ୨ ଶିଶୁ ରହିଛନ୍ତି। ଏହି ଏୟାରଷ୍ଟ୍ରାଇକ୍ରେ ଅନ୍ୟ ୫ ଜଣ ଆହତ ହୋଇଥିବା ବେଳେ ସେମାନଙ୍କ ମଧ୍ୟରୁ ୨ ଜଣ ମହିଳା ଗୁରୁତର ଥିବା ଜଣାପଡ଼ିଛି। ଲେବାନନ୍ର ନାବାଟିହ ସହରର ଏକ ଆବାସିକ ବିଲ୍ଡିଂ ଉପରେ ଇସ୍ରାଏଲ୍ ବିମାନରୁ ବୋମାମାଡ଼ କରିଥିଲା। ମୃତକମାନେ ସିରିଆ ନାଗରିକ। ଡିଏନ୍ଏ ପରୀକ୍ଷା ପରେ ସେମାନଙ୍କ ପରିଚୟ ଜଣାପଡ଼ିବ ବୋଲି ଏକ ନ୍ୟୁଜ୍ ଏଜେନ୍ସି ରିପୋର୍ଟରେ କୁହାଯାଇଛି।
ହେଜବୋଲ୍ଲା ଆତଙ୍କବାଦୀମାନେ ବ୍ୟବହାର କରୁଥିବା ଅସ୍ତ୍ର ଡିପୋକୁ ଟାର୍ଗେଟ କରି ଏହି ଏୟାରଷ୍ଟ୍ରାଇକ୍ କରାଯାଇଥିଲା। ଦୋହାରେ ପାଲେଷ୍ଟିନୀୟ ଇସ୍ଲାମିଷ୍ଟ ଗୋଷ୍ଠୀ ହମାସ୍ ଏବଂ ଇସ୍ରାଏଲ୍ ମଧ୍ୟରେ ଯୁଦ୍ଧବିରତି ନେଇ ଚାଲିଥିବା ଆଲୋଚନା ଶୁକ୍ରବାର ସ୍ଥଗିତ ରହିବା ପରେ ଇସ୍ରାଏଲ୍ ସେନା ଲେବାନନ୍ ଉପରେ ଆକ୍ରମଣ କରିଛି।
ହମାସ୍ ଏବଂ ଇସ୍ରାଏଲ୍ ମଧ୍ୟରେ ଯୁଦ୍ଧ ଆରମ୍ଭ ହେବା ପରେ ଲେବାନନ୍ ଉପରେ ଏହା ଇସ୍ରାଏଲ୍ର ସବୁଠୁ ବଡ଼ ମରଣାନ୍ତକ ଆକ୍ରମଣ। ଗାଜା ଷ୍ଟ୍ରିପ୍ରେ ଯୁଦ୍ଧବିରତି ପରେ ହେଜବୋଲ୍ଲା ଆକ୍ରମଣ ବନ୍ଦ ରଖିବ ବୋଲି କହିଛି। ନାବାଟିହ ଆକ୍ରମଣର ଜବାବରେ ହେଜବୋଲ୍ଲା ଉତ୍ତର ଇସ୍ରାଏଲ୍ର ଆୟେଲେଟ୍ ହାଶାହର କିବୁଜ୍ରେ ରକେଟ ଆକ୍ରମଣ କରିଥିଲା। ଏଥିରେ ୨ ଜଣ ସୈନ୍ୟ ଆହତ ହୋଇଛନ୍ତି। ଲେବାନନ୍ରୁ ଇସ୍ରାଏଲ୍କୁ ଟାର୍ଗେଟ କରି ଆତଙ୍କବାଦୀମାନେ ମୋଟ ୫୫ ଥର ରକେଟ ମାଡ଼ କରିଥିବା ଜଣାପଡିଛି।