ଜେରୁଜେଲମ୍,୨୩।୩: ମଙ୍ଗଳବାର ଇସ୍ରାଏଲ୍ରେ ୨ ବର୍ଷ ମଧ୍ୟରେ ଚତୁର୍ଥ ଥର ପାଇଁ ନିର୍ବାଚନ ହେଉଛି। ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ପାଇଁ ଏହା କଡ଼ା ପରୀକ୍ଷା ନେଇ ଆସିଛି। ନିର୍ବାଚନ ପୂର୍ବରୁ ଦେଶର ବିଭିନ୍ନ ଅଞ୍ଚଳରେ ନେତାନ୍ୟାହୁଙ୍କ ବିରୋଧରେ ପ୍ରଦର୍ଶନ କରାଯାଇଛିି। ତେଣୁ ନିର୍ବାଚନରେ ବିଜୟୀ ହେବା ନେତାନ୍ୟାହୁଙ୍କ ପାଇଁ କଷ୍ଟକର ହେବ ବୋଲି ରାଜନୈତିକ ସମୀକ୍ଷକମାନେ ମତପୋଷଣ କରିଛନ୍ତି। ନିର୍ବାଚନ ଫଳାଫଳ ମାର୍ଚ୍ଚ ୩୧ରେ ପ୍ରକାଶ ପାଇବ। ଏହାପରେ ଏପ୍ରିଲ୍ ୬ରେ ଦେଶର ୨୪ତମ ସିନେଟ୍ ଗଠନ ହେବ। ୨୦୨୦ ମାର୍ଚ୍ଚରେ ଦେଶରେ ନିର୍ବାଚନ ଅନୁଷ୍ଠିତ ହୋଇଥିଲା। କୌଣସି ଦଳକୁ ସଂଖ୍ୟା ଗରିଷ୍ଠତା ନ ମିଳିବାରୁ ମେଣ୍ଟ ସରକାର ଗଠନ ହୋଇଥିଲା। ଇସ୍ରାଏଲ୍ ସଂସଦର ୧୨୦ ଆସନ ମଧ୍ୟରୁ ନିର୍ବାଚନରେ ନେତାନ୍ୟାହୁଙ୍କ ଲିକୁଡ ପାର୍ଟି ୩୦ ଆସନ ହାସଲ କରିବାର ସମ୍ଭାବନା ରହିଛି। ସେହିପରି ତାଙ୍କ ସହଯୋଗୀ ଦଳଗୁଡ଼ିକ ୫୦ଟି ଆସନ ହାତେଇବାର ଆଶା ରହିଛି। େନେତାନ୍ୟାହୁଙ୍କ ମେଣ୍ଟ ୫୬ରୁ ୬୦ ଆସନରେ ବିଜୟୀ ହେବାର ଅନୁମାନ କରାଯାଉଛି। ଯାହାକି ସରକାର ଗଠନ ପାଇଁ ଆବଶ୍ୟକ ସଂଖ୍ୟା କମ୍ ରହିଛି। ସେହିପରି ନେତାନ୍ୟାହୁଙ୍କ ବିରୋଧି ଦଳ ୟେଶ୍ ଅତିଦ୍ ପାର୍ଟି ୨୦ ଆସନରେ ବିଜୟୀ ହୋଇପାରେ ବୋଲି କୁହାଯାଉଛି।
