ଜେରୁଜେଲମ,୩୦।୮: ଲିବିଆର ବୈଦେଶିକ ମହିଳା ମନ୍ତ୍ରୀଙ୍କୁ ନେଇ ଇସ୍ରାଏଲରେ ରାଜନୈତିକ ଚର୍ଚ୍ଚା ଜୋର ଧରିଛି। ଲିବିଆର ବୈଦେଶିକ ମନ୍ତ୍ରୀ ନଜଲା ମଙ୍ଗୋଶ ଇସ୍ରାଏଲର ବୈଦେଶିକ ମନ୍ତ୍ରୀଙ୍କ ସହ ଗୁପ୍ତ ବୈଠକ କରିଥିଲେ। ଏନେଇ ଦେଶରେ ଆଲୋଡ଼ନ ସୃଷ୍ଟି ହୋଇଛି। ଏହି ବୈଠକ ପରେ ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଏକ ନିର୍ଦ୍ଦେଶନାମା ଜାରି କରିଛନ୍ତି। ବର୍ତ୍ତମାନ ଠାରୁ କୌଣସି ଗୁପ୍ତ ବୈଠକ ହେବ ନାହିଁ। ସମସ୍ତ କୂଟନୈତିକ ବୈଠକର ବିବରଣୀ ଆଗରୁ ସ୍ଥିର କରାଯିବ ବୋଲି ସେ ଘୋଷଣା କରିଛନ୍ତି।
ଅନ୍ୟପକ୍ଷରେ, ଇସ୍ରାଏଲର ବୈଦେଶିକ ମନ୍ତ୍ରୀ ଏଲି କୋହେନଙ୍କ ସହ ଗୁପ୍ତ ବୈଠକ ପରେ ଲିବିଆ ବୈଦେଶିକ ମନ୍ତ୍ରୀ ନଜଲା ମଙ୍ଗୋଶଙ୍କୁ ସାମୟିକ ଭାବେ ନିଲମ୍ବିତ କରାଯାଇଛି। ଏନେଇ ଲିବିଆରେ ପ୍ରଦର୍ଶନ ଚାଲିଛି। ନଜଲାଙ୍କ ବିରୋଧରେ ଜନସାଧାରଣ ରାଜରାସ୍ତାକୁ ଓହ୍ଲାଇଛନ୍ତି। ସୂଚନାନୁସାରେ ବିରୋଧ ହିଂସାତ୍ମକ ରୂପ ନେବାରେ ଲାଗିଛି। ଗତ ସପ୍ତାହରେ ରୋମରେ ଇସ୍ରାଏଲର ବୈଦେଶିକ ମନ୍ତ୍ରୀଙ୍କ ସହ ତାଙ୍କର ଏକ ଗୁପ୍ତ ସାକ୍ଷାତ ହୋଇଥିବା ନଜଲା ନିଜେ ସ୍ବୀକାର କରିଥିଲେ।
ଗୁପ୍ତ ବୈଠକର ଖବର ଲିକ୍ ହେବା ପରେ ଦୁଇ ଦେଶ ମଧ୍ୟରେ ତିକ୍ତତା ବୃଦ୍ଧି ପାଇଛି। ରାଜଧାନୀ ତ୍ରିପୋଲିରେ ହିଂସାତ୍ମକ ପ୍ରଦର୍ଶନ ଚାଲିଛି। ପ୍ରଧାନମନ୍ତ୍ରୀ ଅବଦୁଲ ହମିଦ ଡାବିବେଙ୍କ ବିରୋଧରେ ଲୋକମାନେ ସ୍ଲୋଗାନ ଦେଉଛନ୍ତି। ଲୋକମାନେ କହିଛନ୍ତି ଯେ ନଜଲା ଦେଶ ପ୍ରତି ବିଶ୍ୱାସଘାତକତା କରିଛନ୍ତି। ବିରୋଧ ପ୍ରଦର୍ଶନ ଯୋଗୁ ପ୍ରଧାନମନ୍ତ୍ରୀ ନଜଲାଙ୍କୁ ନିଲମ୍ବନ କରିଛନ୍ତି। ଅନେକ ସହରରେ ନଜଲାଙ୍କ ପୋଷ୍ଟର ପୋଡି ଦିଆଯାଇଛି।
ବିରୋଧ ପ୍ରଦର୍ଶନ ଏପରି ହିଂସାତ୍ମକ ରୂପ ନେଇଛି ଯେ, ଲିବିଆରେ ଅନେକ ସ୍ଥାନରେ ଅଗ୍ନିକାଣ୍ଡ ହୋଇଛି। ପ୍ରଧାନମନ୍ତ୍ରୀ ଅବଦୁଲ ହମିଦ ନଜଲାଙ୍କ ବିରୋଧରେ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ଅନ୍ୟପକ୍ଷରେ ଏହି ଗୁପ୍ତ ବୈଠକ ପରେ ଇସ୍ରାଏଲ ମଧ୍ୟ କଠୋର ହୋଇଛି। ସମସ୍ତ ମନ୍ତ୍ରଣାଳୟକୁ ନିର୍ଦ୍ଦେଶ ଦେବାବେଳେ ପ୍ରଧାନମନ୍ତ୍ରୀ କହିଛନ୍ତି ଯେ କୌଣସି ଗୁପ୍ତ କୂଟନୈତିକ ବୈଠକ କରିବା ପୂର୍ବରୁ ସେମାନଙ୍କ କାର୍ଯ୍ୟାଳୟରୁ ଅନୁମତି ନିଅନ୍ତୁ। ନିଲମ୍ବନ ପରେ ନଜଲା ମଙ୍ଗୋଶ ଦେଶ ଛାଡି ତୁର୍କୀକୁ ପଳାଇଛନ୍ତି।