ସୋର, ୨୨ା୫(ଜନ୍ମେଜୟ ମିଶ୍ର):ଇସ୍ରୋରେ ପାଠ ପଢୁଥିବା ସୋର ପୌରାଞ୍ଚଳ ୧ ନମ୍ବର ୱାର୍ଡ ବାରପଡା ଗ୍ରାମର ଶ୍ରବଣ କୁମାର ଦାସ(୨୧)ଙ୍କ ସୋମବାର କାର୍ ଦୁର୍ଘଟଣାରେ ମୃତ୍ୟୁ ହୋଇଛି। ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ପରିବାର ଲୋକେ ଅଭିଯୋଗ କରିଛନ୍ତି। ଏହି ଗ୍ରାମର ସୁବାସ ଚନ୍ଦ୍ର ଦାସଙ୍କର ଏକମାତ୍ର ପୁଅ ଶ୍ରବଣ ଜଣେ ମେଧାବୀ ଛାତ୍ର ଭାବେ ଇସ୍ରୋ ଦ୍ୱାରା ମନୋନୀତ ହୋଇ ପଢୁଥିଲେ। ସେ ତାଙ୍କର ୩ ଜଣ ସାଙ୍ଗଙ୍କ ସହିତ ଏକ ବାଇକ୍ରେ ଯାଉଥିବାବେଳେ ଏକ କାର୍ ଦୁର୍ଘଟଣାରେ ମୁତ୍ୟୁ ହୋଇଥିବା ପରିବାର ଲୋକଙ୍କୁ ଖବର ଦିଆଯାଇଥିଲା। ପରିବାର ଲୋକେ ସେଠାରେ ପହଞ୍ଚି ତାଙ୍କ ସହିତ ବାଇକ୍ରେ ରହିଥିବା ସାଙ୍ଗମାନଙ୍କୁ ଖୋଜି ପାଇ ନ ଥିଲେ। ସେମାନେ ଦୁର୍ଘଟଣାସ୍ଥଳର ଫେରାର ହୋଇଯାଇଥିବାରୁ ଏହାକୁ ଏକ ହତ୍ୟାକାଣ୍ଡ ବୋଲି ପରିବାର ଲୋକେ ଅଭିଯୋଗ କରିଛନ୍ତି। ମଙ୍ଗଳବାର ଶ୍ରବଣଙ୍କ ମୃତଦେହ ସୋରରେ ପହଞ୍ଚିବା ପରେ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି।