କେସିଙ୍ଗା,୧୫।୯(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ପାଚିକା ସହାୟିକା ସଂଘ ଏବଂ ଭାରତୀୟ ମଜଦୂର ସଂଘର ନେତୃତ୍ୱରେ ବ୍ଲକର ୨୬ ପଞ୍ଚାୟତରେ କାର୍ଯ୍ୟରତ ପ୍ରାୟ ୮୦ ସ୍କୁଲ ପାଚିକା ସହାୟିକାମାନେ ୬ ଦଫା ଦାବି କରିଛନ୍ତି। ଏହି ଅବସରରେ ପାଚିକା ସହାୟିକାମାନେ କେସିଙ୍ଗା ଜଗନ୍ନାଥ ମନ୍ଦିରରୁ ଏକ ଶୋଭା ଯାତ୍ରାରେ ବାହାରି ବ୍ଲକ କାର୍ଯ୍ୟାଳୟକୁ ଯାଇ କେସିଙ୍ଗା ବିଡ଼ିଓ ପ୍ରଫୁଲ୍ଲ କୁମାର ଅଦୁଙ୍କ ଜରିଆରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଦାବିପତ୍ର ଶୁକ୍ରବାର ପ୍ରଦାନ କରିଛନ୍ତି।
ଦାବି ମଧ୍ୟରେ ପାଚିକା ସହାୟିକାଙ୍କୁ ସର୍ବନିମ୍ନ ମଜୁରୀ ପ୍ରଦାନ, ଇପିଏଫ ଲାଗୁ କରିବା, ସାମାଜିକ ସୁରକ୍ଷା ପ୍ରଦାନ, ବର୍ଷକୁ ୧୦ ମାସ ପରିବର୍ତ୍ତେ ୧୨ମାସର ଦରମା ପ୍ରଦାନ, କାର୍ଯ୍ୟରତ ସମୟରେ ମୃତ୍ୟୁ ଘଟିଲେ ପରିବାର ଲୋକଙ୍କୁ ୫ଲକ୍ଷ ଟଙ୍କା ସହାୟତା ରାଶି ପ୍ରଦାନ, ସମସ୍ତଙ୍କ ପାଇଁ ବୀମା ଲାଗୁ କରାଯାଉ ଏବଂ ଅବସର ନେବା ପରେ ଭତ୍ତା ପ୍ରଦାନ କରିବାକୁ ଦାବି କରାଯାଇଛି। ଏଥିରେ ଜିଲା ସମ୍ପାଦକ ଭାରତୀୟ ମଜଦୂର ସଂଘ ବିଶ୍ବରଞ୍ଜନ ସା, ଜିଲା ଉପସଭାପତି ନବୀନ ଛତ୍ରିଆ, ସଂଗଠନ ସମ୍ପାଦକ ସୁରେନ୍ଦ୍ର ମୋହନ କର, ସନ୍ୟାସୀ ପ୍ରଧାନ, ଲୋଚନ ସାହୁ, ରାଧାକାନ୍ତ ବେହେରା, ବଳରାମ କର, ପାଚିକା ସହାୟିକା ସଂଘ ଜିଲା ସଭାନେତ୍ରୀ ବିମଳା ଗୌଡ, ସମ୍ପାଦିକା ତପଶ୍ୱନି ମହାରଣା, କେସିଙ୍ଗା ବ୍ଲକ ସଭାନେତ୍ରୀ ରଶ୍ମିତା ହର୍ନା, ସମ୍ପାଦିକା ମମତା ଗହିର ପ୍ରମୁଖ ଉପସ୍ଥିତ ଥିଲେ।
