ଝାରସୁଗୁଡ଼ା ଅଫିସ,୨୭।୮: ଝାରସୁଗୁଡ଼ା ଜିଲା ବନ୍ଧବାହାଲ ଶିଳ୍ପାଞ୍ଚଳରେ ଜାତୀୟ ପତାକାକୁ ଅସମ୍ମାନ ପ୍ରସଙ୍ଗ ସମ୍ପର୍କରେ ସ୍ଥାନୀୟ ଲୋକଙ୍କ ମଧ୍ୟରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା। ଏହି ପ୍ରସଙ୍ଗକୁ ନେଇ ଏବେବି ଚାପା ଉତ୍ତେଜନା ଲାଗି ରହିଥିବାବେଳେ ପରିସ୍ଥିତିକୁ ଦୃଷ୍ଟିରେ ରଖି ଘଟଣାସ୍ଥଳରେ ସଶସ୍ତ୍ର ପୋଲିସ ଫୋର୍ସ ମୁତୟନ କରାଯାଇଛି। ଏନେଇ ପୋଲିସ ଫ୍ଲାଗମାର୍ଚ୍ଚ କରି ଶକ୍ତି ପ୍ରଦର୍ଶନ ଜାରି ରଖିଛି । ସାମ୍ପ୍ରଦାୟିକ ପରିସ୍ଥିତିକୁ ଦୃଷ୍ଟିରେ ରଖି ପୋଲିସ ବନ୍ଧବାହାଲରେ ଗତ ଶୁକ୍ରବାରଠାରୁ ୧୪୪ ଧାରା ଜାରି କରିଛି। ଏହି କଟକଣା ଆସନ୍ତା ୫ ତାରିଖ ପର୍ଯ୍ୟନ୍ତ ରହିବ। ଏନେଇ ସବ୍ଡିଭିଜନରେ ମାଜିଷ୍ଟ୍ରେଟ ତଥା ଉପଜିଲାପାଳ ଦୟାମୟ ପାଢ଼ୀ ଏକ ପତ୍ର ଜରିଆରେ ପୋଲିସକୁ ନିର୍ଦ୍ଦେଶ ଦେଇଛନ୍ତି ।
ଉଲ୍ଲେଖଯୋଗ୍ୟ, ବନ୍ଧବାହାଲ ସ୍ବାଧୀନ କମ୍ପ୍ଲେକ୍ସ ଚତୁଃପାର୍ଶ୍ୱର ୧ କିଲୋମିଟର ପରିଧି ମଧ୍ୟରେ ୪ଜଣରୁ ଊଦ୍ଧର୍ବ ଏକତ୍ର ହୋଇପାରିବେ ନାହିଁ କିମ୍ବା କୌଣସି ସାମୂହିକ କାର୍ଯ୍ୟକ୍ରମ କରାଯାଇପାରିବ ନାହିଁ। ଏହି ନିୟମକୁ ଖିଲାପ କଲେ ଆଇନାନୁଯାୟୀ ଦଣ୍ଡିତ ହେବେ ବୋଲି ପତ୍ରରେ ଦର୍ଶାଯାଇଛି। ବନହରପାଲି ପୋଲିସ ଓ ବନ୍ଧବାହାଲ ଫାଣ୍ଡି ପୋଲିସର ମିଳିତ ଉଦ୍ୟମରେ ୧୪୪ ଧାରା ସମ୍ପର୍କରେ ଜନସାଧାରଣଙ୍କୁ ଅବଗତ କରାଯାଉଛି।
ସୂଚନାଯୋଗ୍ୟ, ଗତ ବୁଧବାର ବନ୍ଧବାହାଲ ଶିଳ୍ପାଞ୍ଚଳରେ ଥିବା ଏକ ମାଂସ ଦୋକାନରେ ଜାତୀୟ ପତାକାକୁ କଟାଛେଳିମୁଣ୍ଡ ଉପରେ ଘୋଡାଯାଇ ଅସମ୍ମାନ କରାଯାଇଥିଲା। ଏନେଇ ସ୍ଥାନୀୟ ଲୋକେ ସମ୍ପୃକ୍ତ ମାଂସ ଦୋକାନୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବିରେ ଗତ ଗୁରୁବାର ଟାୟାର ଜାଳି ରାସ୍ତା ଅବରୋଧ କରିବା ସହ ମାଂସ ଦୋକାନ ଭଙ୍ଗାରୁଜା କରିଥିଲେ। ଏନେଇ ପୋଲିସ ସମ୍ପୃକ୍ତ ମାଂସ ଦୋକାନୀ ମହମ୍ମଦ ସାହାଜାଦଙ୍କୁ ଗିରଫ କରି କୋର୍ଟ ଚାଲାଣ କରିଛି। ଏନେଇ ଥାନା କେସ୍ ନଂ.୧୩୮/୨୨ରେ ଏକ ମାମଲା ରୁଜୁ ହୋଇଛି।