କଲମ୍ବୋ, ୩୧।୭: ଶ୍ରୀଲଙ୍କାର ପ୍ରମୁଖ ଅଲରାଉଣ୍ଡର ଇସୁରୁ ଉଦାନା ଶନିବାର ହଠାତ୍ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରି କ୍ରିକେଟଜଗତକୁ ଚକିତ କରିଦେଇଛନ୍ତି। ଶ୍ରୀଲଙ୍କା କ୍ରିକେଟ ପକ୍ଷରୁ ଟୁଇଟ୍ କରାଯାଇଥିବାରୁ ଏହା ସ୍ପଷ୍ଟ ହୋଇଛି। ଉଦାନା ଦଳ ପକ୍ଷରୁ ୨୭ଟି ଦିନିକିଆ ଏବଂ ୩୫ଟି ଟି-୨୦ ଅନ୍ତର୍ଜାତୀୟ କ୍ରିକେଟ ଖେଳିଥିଲେ। ଭାରତ ବିପକ୍ଷରେ ନିକଟରେ ଶେଷ ହୋଇଥିବା ସିରିଜରେ ଉଦାନାଙ୍କ ପ୍ରଦର୍ଶନ ଭଲ ନ ଥିଲା। ସେ ଗୋଟିଏ ଦିନିକିଆ ଏବଂ ଦୁଇଟି ଟି-୨୦ ମ୍ୟାଚ୍ ଖେଳିବାର ସୁଯୋଗ ପାଇଥିଲେ।
ଅବସର ଘୋଷଣା କରି ଉଦାନା କହିଛନ୍ତି, ପରବର୍ତ୍ତ ପୀଢ଼ିର ଖେଳାଳିଙ୍କ ପାଇଁ ସ୍ଥାନ ଦେବା ପାଇଁ ମୋର ସମୟ ଆସିଛି ବୋଲି ଭାବୁଛି। ଅତ୍ୟନ୍ତ ଗର୍ବ, ଉତ୍ସାହ ଏବଂ ଅଦମ୍ୟ ପ୍ରତିବଦ୍ଧତା ସହ ମୁଁ ଦେଶର ପ୍ରତିନିଧିତ୍ୱ କରି ମୋର ସେବା ପ୍ରଦାନ କରିଛି।
ତେବେ ଉଦାନା ୨୦୦୯ରେ ଟି-୨୦ ବିଶ୍ୱକପ୍ରେ ଅଷ୍ଟ୍ରେଲିଆ ବିପକ୍ଷେ ଟି-୨୦ ଅନ୍ତର୍ଜାତୀୟ ଡେବ୍ୟୁ କରିଥିଲେ। ସେହିଭଳି ୨୦୧୨ରେ ସେ ନିଜର ଦିନିକିଆ ଡେବ୍ୟୁ କରିଥିଲେ। ନିଜର କ୍ୟାରିୟରରେ ସେ ଦିନିକିଆରେ ୨୩୭ରନ୍ ଏବଂ ଟି-୨୦ରେ ୨୫୬ ରନ୍ କରିଥିଲେ। ଏହାଛଡ଼ା ସେ ଦିନିକିଆରେ ୧୮ ଉଇକେଟ ଏବଂ ଟି୨୦ରେ ୨୭ ଉଇକେଟ ନେଇଥିଲେ। ସେ ଟେଷ୍ଟ କ୍ରିକେଟରେ ଖେଳିବାକୁ ଇଚ୍ଛା ପ୍ରକାଶ କରିଥିଲେ ହେଁ ତାଙ୍କୁ ସୁଯୋଗ ମିଳିପାରି ନ ଥିଲା।
ଏହାଛଡ଼ା ଉଦାନା ଆଇପିଏଲ୍ ୨୦୨୦ରେ ବିରାଟ କୋହଲି ନେତୃତ୍ୱାଧୀନ ଆର୍ସିବିରୁ ପ୍ରତିନିଧିତ୍ୱ କରିଥିଲେ। ସେ ଦଳ ପାଇଁ ମୋଟ ୧୦ଟି ମ୍ୟାଚ୍ ଖେଳି ୮ ଉଇକେଟ ନେଇଥିଲେ।