ନୂଆଦିଲ୍ଲୀ,୩ା୧ ନିଜ ନାମରେ ନାମିତ ଷ୍ଟାଡିୟମରେ ଖେଳିବାର ସୌଭାଗ୍ୟ ଅନେକ ବଡ ଖେଳାଳିଙ୍କୁ ମିଳି ନ ଥାଏ। ଭିଭିଆନ୍ ରିଚାର୍ଡସ, ବ୍ରାଏନ ଲାରା ଓ ଆଲାନ ବର୍ଡରଙ୍କ ପରି ଖେଳାଳି ଅବସର ନେବା ପରେ ତାଙ୍କ ନାମରେ ଷ୍ଟାଡିୟମ ନିର୍ମାଣ ହୋଇଥିଲା। ମାତ୍ର ଏଯାଏ ଅନ୍ତର୍ଜାତୀୟ କ୍ରିକେଟ ପଦାର୍ପଣ କରି ନ ଥିବା ଜଣେ ଖେଳାଳି ନିଜ ନାମରେ ତିଆରି ଷ୍ଟାଡିୟମରେ ଖେଳିବାକୁ ଯାଉଛନ୍ତି। ଭାରତ ଏ’ ଦଳର ଅଧିନାୟକ ତଥା ବାଂଲାଦେଶ ବିପକ୍ଷ ଟେଷ୍ଟ ଦଳର ସଦସ୍ୟ ରହିଥବା ଅଭିମନ୍ୟୁ ଈଶ୍ୱରନ୍ ଏମିତି ଏକ ମାଇଲଖୁଣ୍ଟ ହାସଲ କରିବାକୁ ଯାଉଛନ୍ତି। ଅଭିମନ୍ୟୁଙ୍କ ପିତା ରଙ୍ଗନାଥନ ପରମେଶ୍ୱରନ ଈଶ୍ୱରନ ଏକ ଷ୍ଟାଡିୟମ ନିର୍ମାଣ କରିଥିଲେ। ଅଭିମନ୍ୟୁ କ୍ରିକେଟ ଏକାଡେମୀ ଷ୍ଟାଡିୟମରେ ଖେଳାଯିବାକୁ ଥିବା ବେଙ୍ଗଲ ବନାମ ଉତ୍ତରାଖଣ୍ଡ ମ୍ୟାଚରେ ଖେଳିବାକୁ ଯାଉଛନ୍ତି ଈଶ୍ୱରନ୍। ଚାର୍ଟାର୍ଡ ଆକାଉଣ୍ଟାଣ୍ଟ ଭାବରେ କାମ କରୁଥିବା ରଙ୍ଗନାଥନ ପରମେଶ୍ୱରନ ଈଶ୍ୱରନ କ୍ରିକେଟ ପ୍ରତି ଥିବା ନିଜ ଭଲ ପାଇବା ପାଇଁ ୨୦୦୫ରେ ଏହି ଷ୍ଟାଡିୟମ ନିର୍ମାଣ କରିଥିଲେ। ଏପରିକି ଅଭିମନ୍ୟୁଙ୍କ କ୍ରିକେଟ କ୍ୟାରିୟର ମଧ୍ୟ ଏହି ଷ୍ଟାଡିୟମରୁ ଆରମ୍ଭ ହୋଇଥିଲା। ଯେଉଁ ଷ୍ଟାଡିୟମରେ କ୍ରିକେଟ ଖେଳିବା ଆରମ୍ଭ କରିଥିଲେ ସେଠାରେ ମ୍ୟାଚ ଖେଳିବା ତାଙ୍କ ପାଇଁ ଗର୍ବର ବିଷୟ ବୋଲି ଈଶ୍ୱରନ୍ କହିଛନ୍ତି। ଏହି ଗ୍ରାଉଣ୍ଡରେ ଫ୍ଲଡ୍ଲାଇଟ ସୁବିଧା ରହିଥିବା ବେଳେ ବିସିସିଆଇ ମଧ୍ୟ ଏହି ଷ୍ଟାଡିୟମ ବ୍ୟବହାର କରିଥାଏ। ୧୯୯୫ରେ ଅଭିମନ୍ୟୁଙ୍କ ଜନ୍ମ ହୋଇଥିବା ବେଳେ ରଙ୍ଗନାଥନ ୧୯୮୮ରେ ଅଭିମନ୍ୟୁ କ୍ରିକେଟ ଏକାଡେମୀ ଆରମ୍ଭ କରିଥିଲେ। ଏହି ଷ୍ଟାଡିୟମରେ ଦୀନେଶ କାର୍ତ୍ତିକ, ଶ୍ରେୟାସ ଆୟାର ଓ ମହମ୍ମଦ ଶାମିଙ୍କ ପରି ଖେଳାଳି ଅଭ୍ୟାସ କରିଥିବା କହିଛନ୍ତି ରଙ୍ଗନାଥନ।