କଣାସ,୭।୪(ସ୍ବ.ପ୍ର.): ରାଜ୍ୟ ସରକାର ପ୍ରତ୍ୟେକ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଥିବା ରୋଗୀମାନଙ୍କୁ ମାଗଣାରେ କ୍ଷୀର, ପାଉରୁଟି, ବିସ୍କୁଟ୍, ଅଣ୍ଡା ଯୋଗାଣ ବ୍ୟବସ୍ଥା କରିଥିବା ବେଳେ ପୁରୀ ଜିଲା କଣାସ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ୧୭ଦିନ ହେଲା ରୋଗୀମାନଙ୍କୁ ଖାଦ୍ୟ ଯୋଗାଣ ହେଉ ନ ଥିବା ଅଭିଯୋଗ ହୋଇଛି। ସୂଚନାଯୋଗ୍ୟ, ୨୦୨୦ମସିହା ସ୍ବାସ୍ଥ୍ୟ କେନ୍ଦ୍ର ବିଜ୍ଞପ୍ତି ଅନୁଯାୟୀ କଣାସ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଖାଦ୍ୟ ଯୋଇବା ପାଇଁ ୩ଜଣ ଟେଣ୍ଡର ପକାଇଥିଲେ। ସେ ମଧ୍ୟରୁ କଣାସ ଗ୍ରାମର ବିଦ୍ୟାଧର ଭୋଳଙ୍କୁ ଖାଦ୍ୟ ଯୋଗାଇବା ପାଇଁ ଅନୁମତି ମିଳିଥିଲା। ଖାଦ୍ୟ ଯୋଗାଉଥିବା ବିଦ୍ୟାଧରଙ୍କୁ ୨୦୨୦ ଜାନୁୟାରୀରୁ ୨୦୨୧ ମାର୍ଚ୍ଚ ୨୦ତାରିଖ ପର୍ଯ୍ୟନ୍ତ ଦୀର୍ଘ ୧୪ମାସ ୨୦ଦିନ ଧରି ଖାଦ୍ୟ ଯୋଗଇଥିଲେ। ହେଲେ ଖାଦ୍ୟ ଯୋଗାଣର ପ୍ରାପ୍ୟ ନ ମିଳିବାରୁ ସେ ମାର୍ଚ୍ଚ ୨୧ତାରିଖଠାରୁ ଖାଦ୍ୟ ଯୋଗାଣ ବନ୍ଦ କରିଦେଇଛନ୍ତି। ଫଳରେ ଗତ ୧୭ଦିନ ହେବ ସ୍ବାସ୍ଥ୍ୟକେନ୍ଦ୍ରରେ ଖାଦ୍ୟ ନ ଥିବାରୁ ରୋଗୀଙ୍କୁ ଖାଦ୍ୟ ଦିଆଯାଇପାରୁ ନାହିଁ। ଖାଦ୍ୟ ବିଲ୍ ପାସ୍ କରୁଥିବା କ୍ଲର୍କ ବିଲ୍ ପାସ୍ ନ କରିବାରୁ ବିଦ୍ୟାଧର ଖାଦ୍ୟ ଯୋଗାଣ ବନ୍ଦ କରିଦେଇଥିବା କହିଛନ୍ତି। ଏ ସମ୍ପର୍କରେ ସ୍ବାସ୍ଥ୍ୟକେନ୍ଦ୍ର ଭାରପ୍ରାପ୍ତ ଅଧିକାରୀ ଡ. ରମେଶ ଚନ୍ଦ୍ର ବେହେରା କହିଛନ୍ତି, ଅଳ୍ପ ଦିନ ହେଲା ଏଠାକୁ ଆସିଥିବାରୁ ଖାଦ୍ୟ ଯୋଗାଣ ବିଷୟରେ ଜାଣିନାହିଁ। ତଥାପି ଖାଦ୍ୟ ଯୋଗାଣ ବନ୍ଦ ହୋଇଥିବା କଥାକୁ ଉପରିସ୍ଥ ଅଧିକାରୀଙ୍କୁ ଜଣାଇଛି। ପୁନଶ୍ଚ ଟେଣ୍ଡର ହେଲେ ଖାଦ୍ୟ ଯୋଗାଣ ହେବ ଏବଂ ଖାଦ୍ୟ ଯୋଗଇଥିବା ଲୋକଙ୍କୁ ଖୁବଶୀଘ୍ର ପ୍ରାପ୍ୟ ଦେବାପାଇଁ ଚେଷ୍ଟା କରିବୁ।