ଢେଙ୍କାନାଳ ଅଫିସ,୨୮।୧୨: ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ କଳାଙ୍ଗ ପଞ୍ଚାୟତ କାଳିକାପ୍ରସାଦ ଗ୍ରାମ ବନ୍ଧସାହି ବାସିନ୍ଦା ଗତ ଦୁଇମାସ ହେବ ଅନ୍ଧାରରେ ରହିଛନ୍ତି। ଫଳରେ ସାହିବାସୀ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି।
ସାହିବାସୀ କହିଛନ୍ତି, ସାହିରେ ୯ ପରିବାର ପାଇଁ ୨୦୧୭ ମସିହାରେ ବିଜୁଳି ସଂଯୋଗ ଦିଆଯାଇଥିଲା। ତେବେ ଗତ ଅକ୍ଟୋବର ୬ରୁ ଗ୍ରାମରେ ଥିବା ଟ୍ରାନ୍ସଫର୍ମର ବଜ୍ରପାତ ଯୋଗୁ ଅଚଳ ହୋଇପଡିଛି। ଏ ସମ୍ପର୍କରେ ଗ୍ରାମବାସୀ ଗତ ୨୬।୧୦।୨୦୨୨ରେ ନିକଟସ୍ଥ ଭାପୁର ଗ୍ରୀଡ୍ର କନିଷ୍ଠ ଯନ୍ତ୍ରୀଙ୍କୁ ଲିଖିତ ଭାବେ ଜଣାଇଥିଲେ ମଧ୍ୟ କୌଣସି ସୁଫଳ ମିଳିପାରୁ ନାହିଁ। ଉକ୍ତ ଅଞ୍ଚଳରେ ସନ୍ଧ୍ୟାହେଲେ ହାତୀ ଉପଦ୍ରବ ସ୍ଥାନୀୟ ଅଞ୍ଚଳବାସୀଙ୍କ ନିଦ ହଜାଇ ଦେଇଛି। ହାତୀଙ୍କ ପାଇଁ ଗ୍ରାମବାସୀ ନିଜକୁ ଅସୁରକ୍ଷିତ ମଣୁଛନ୍ତି। ତୁରନ୍ତ ଉକ୍ତ ଆଦିବାସୀ ଅଞ୍ଚଳକୁ ବିଦ୍ୟୁତ୍ ସଂଯୋଗ ପ୍ରଦାନ କରିବା ସହିତ ସମସ୍ୟାର ସମାଧାନ କରିବା ପାଇଁ ବାବୁଲି ବେହେରା, ଅଖିନ ପଧାନ, ମାଣିକ ପଧାନ, ହଜାରି ପଧାନ, ପ୍ରକାଶ ପଧାନଙ୍କ ସମେତ ଅଞ୍ଚଳବାସୀ ଜିଲାପାଳଙ୍କୁ ଲିଖିତ ଭାବେ ଜଣାଇଛନ୍ତି।
