ଯୋଡ଼ା,୧୬।୭(ମାନସ ମହାନ୍ତି)କେନ୍ଦୁଝର ଜିଲା ଯୋଡ଼ା ବ୍ଲକ୍ ବଡ଼କାଳିମାଟି ପଞ୍ଚାୟତକୁ ୨ ମାସ ହେବ ବସୁଧା ଯୋଜନାରେ ଜଳ ଯୋଗାଣ ବନ୍ଦ ହୋଇଯାଇଛି। ରାସ୍ତା ନିର୍ମାଣକାରୀ ସଂସ୍ଥା ପାଇପ୍ ଭାଙ୍ଗିଦେଇଥିବା ବେଳେ ପଞ୍ଚାୟତବାସୀ ପାନୀୟ ଜଳ ପାଇଁ ଡହଳବିକଳ ହେଉଛନ୍ତି। ଏ ନେଇ ପଞ୍ଚାୟତ ଓ ଜଳ ଯୋଗାଣ ବିଭାଗକୁ ବାରମ୍ବାର ଜଣାଇଥିଲେ ମଧ୍ୟ କୌଣସି ଫଳ ମିଳିନାହିଁ। ଅନ୍ୟ କୌଣସି ଉପାୟ ନ ପାଇ ଦୂଷିତ ଚୁଆ ପାଣି ଉପରେ ନିର୍ଭର କରୁଥିବା ଅଞ୍ଚଳବାସୀ ପ୍ରକାଶ କରିଛନ୍ତି।
ସୂଚନା ଅନୁଯାୟୀ, ବସୁଧା ଯୋଜନାରେ ବେଲଦାଠାରେ ଏକ ମେଗା ପାନୀୟ ଜଳ ଯୋଗାଣ ପ୍ରକଳ୍ପ କରାଯାଇଛି। ପ୍ରକଳ୍ପ ଦ୍ୱାରା ବଡ଼କାଳିମାଟି ପଞ୍ଚାୟତ ସହିତ ବସନ୍ତପୁର ପଞ୍ଚାୟତର ଲୋକଙ୍କୁ ପାଣି ଯୋଗାଇ ଦିଆଯାଉଥିଲା। ବାମେବାରୀ-ପଳାସ୍ପଙ୍ଗା ରାସ୍ତା ନିର୍ମାଣ ବେଳେ ବଡ଼ ବଡ଼ ମେଶିନ ଦ୍ୱାରା ପାଇପ ଲାଇନକୁ ଫଟାଇ ଦିଆଯାଇଛି। ଏଥିରେ ବଡ଼କାଳିମାଟି ସଂଯୋଗ ପାଇପ ଭାଙ୍ଗିଯାଇଥିବାରୁ ପଞ୍ଚାୟତବାସୀ ପାନୀୟ ଜଳ ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି। ଅନ୍ୟ କୌଣସି ସୁବିଧା ନ ଥିବାରୁ ଗାଁ ପାଖ ଚୁଆ ଓ ନାଳ ପାଣି ବ୍ୟବହାର କରିବାକୁ ବାଧ୍ୟ ହେଉଛନ୍ତି। କାଳିମାଟିରେ ବହୁ ଖଣି ଓ ଶିଳ୍ପ କାରଖାନା ରହିଛି। ସରକାର ଅଞ୍ଚଳରୁ କୋଟି କୋଟି ଟଙ୍କା ରାଜସ୍ବ ପାଉଛନ୍ତି। କିନ୍ତୁ ଏ ଅଞ୍ଚଳର ଲୋକେ ପାନୀୟ ଜଳ ଭଳି ମୌଳିକ ସୁବିଧା ପାଇପାରୁନାହାନ୍ତି ବୋଲି ସ୍ଥାନୀୟ ବାସିନ୍ଦା ପରମେଶ୍ବର ନାଏକ, ଦୁର୍ଯ୍ୟୋଧନ ବାରିକ, ଡୁକୁରା ମୁଣ୍ଡା, ସିପାଲ ମୁଣ୍ଡା ପ୍ରମୁଖ କହିଛନ୍ତି। ଏହା ସହିତ ଖଣି ପ୍ରଭାବିତ ଅଞ୍ଚଳର ବିକାଶ ପାଇଁ ଡିଏମ୍ଏଫ୍ (ଜିଲା ଖଣିଜ ପାଣ୍ଠି) ଗଠନ କରାଯାଇଛି। ଏଥିରେ ଅନେକ ହଜାର କୋଟି ଟଙ୍କା ଗଛିତ ଥିଲେ ମଧ୍ୟ ଖଣି ଅଞ୍ଚଳର ବାସିନ୍ଦା ପାଣି ଟୋପେ ପାଇଁ ଡହଳବିକଳ ହେବା ନିତାନ୍ତ ପରିତାପର ବିଷୟ ବୋଲି ବିଚିତ୍ର ବାରିକ ଓ ନନ୍ଦକିଶୋର ବାରିକ କହିଥିଲେ। ପ୍ରକଳ୍ପ ଯନ୍ତ୍ରୀ ଶୁଭେନ୍ଦୁ ନାଏକ କହିଛନ୍ତି, ପିଡବ୍ଲ୍ୟୁଡି ରାସ୍ତା ନିର୍ମାଣକାରୀ ସଂସ୍ଥା ପକ୍ଷରୁ ରାସ୍ତା କାର୍ଯ୍ୟ ବେଳେ ପାଇପ ଭାଙ୍ଗି ଦିଆଯାଇଛି। ଏଥି ସହିତ ୬ଟି ପାଇପକୁ ମଧ୍ୟ ସେମାନେ ନେଇଯାଇଛନ୍ତି। ପାଇପଗୁଡ଼ିକୁ ଦେଇ ଦେଲେ ବିଭାଗ ପକ୍ଷରୁ ମରାମତି କରାଯାଇଥାଆନ୍ତା। ପୂର୍ବରୁ ମଧ୍ୟ ଦୁଇଥର ଭାଙ୍ଗି ଦିଆଯାଇଥିଲା। ବିଭାଗ ପକ୍ଷରୁ ଚିଠି ପରେ ସଂସ୍ଥା ପକ୍ଷରୁ ମରାମତି କରାଯାଇଥିଲା। ତେବେ ଉକ୍ତ ସଂସ୍ଥାକୁ ଜୁନ୍ ୨୬ରେ ମରାମତି କରିବା ପାଇଁ ବିଭାଗ ପକ୍ଷରୁ ଚିଠି କରାଯାଇଛି। ଖୁବ୍ଶୀଘ୍ର ଏହାର ମରାମତି କରାଯାଇ ଲୋକଙ୍କୁ ପାନୀୟ ଜଳ ଯୋଗାଣର ବ୍ୟବସ୍ଥା କରାଯିବ ବୋଲି ସେ କହିଥିଲେ।