ଢେଙ୍କାନାଳ,୨୮ା୪(ରତନ ନାୟାର)ଢେଙ୍କାନାଳ ଜିଲା ସଦର ବ୍ଲକର ସବୁଜିମାମୟ ସପ୍ତଶଯ୍ୟା ରାଜ୍ୟ ଏବଂ ଜିଲାର ଏକ ପ୍ରସିଦ୍ଧ ପର୍ଯ୍ୟଟନ ସ୍ଥଳୀ। ସପ୍ତଶଯ୍ୟା ପଞ୍ଚାୟତର ନବଜୀବନପୁର ସଦେଇବେରେଣୀ ଗ୍ରାମ ପ୍ରସିଦ୍ଧ ଡୋକ୍ରା କାଷ୍ଟିଂ ହସ୍ତଶିଳ୍ପ ଗ୍ରାମ ଭାବେ ପରିଚିତ। ସ୍ଥାନୀୟ ଡୋକ୍ରା କାରିଗରମାନଙ୍କୁ ପ୍ରୋତ୍ସାହନ ଓ ସେମାନଙ୍କ ଦ୍ୱାରା ହସ୍ତଶିଳ୍ପର ଚାହିଦା ବୃଦ୍ଧି ପାଇଁ ୫ କୋଟି ଟଙ୍କାରେ ନିର୍ମିତ ନବଜୀବନପୁର ସଦେଇବେରେଣୀ ଗ୍ରାମରେ କଳାକୃତି ଗ୍ରାମ ୨୪ ଫେବୃଆରୀ ୨୦୧୯ରେ ମୁଖ୍ୟମନ୍ତ୍ରୀଙ୍କ ଦ୍ୱାରା ଉଦ୍ଘାଟିତ ହୋଇଥିଲା। କିନ୍ତୁ ବର୍ତ୍ତମାନ ଜିଲା ପ୍ରଶାସନ ଓ ସଦର ବ୍ଲକ କର୍ତ୍ତୃପକ୍ଷଙ୍କ ଅବହେଳା ପ୍ରଦର୍ଶନ ଯୋଗୁ କଳାକୃତି ଗ୍ରାମ ତାର ଗରିମା ହରାଇବାକୁ ବସିଛି। ଏପରିକି ସ୍ବୟଂ ସହାୟକ ଗୋଷ୍ଠୀ ଓ ଡୋକ୍ରା କାରିଗରଙ୍କୁ ପ୍ରୋତ୍ସାହିତ କରିବା ପାଇଁ ଏହି ପ୍ରକଳ୍ପ ବର୍ତ୍ତମାନ ସ୍ଥାଣୁ ହୋଇ ପଡିରହିଛି। ଗତ ୨୦ଦିନ ହେବ କଳାକୃତି ଗ୍ରାମରେ ବିଦ୍ୟୁତ୍ ସେବା ଠପ୍ ହୋଇ ପଡିଥିବା ବେଳେ ସଦର ବ୍ଲକ କର୍ତ୍ତୃପକ୍ଷ ଓ ବିଦ୍ୟୁତ୍ ବିଭାଗ ଜାଣି ମଧ୍ୟ ନୀରବଦ୍ରଷ୍ଟା ସାଜିବା ସାଧାରଣରେ ଚର୍ଚ୍ଚାର ବିଷୟ ହୋଇଛି।
ବିଦ୍ୟୁତ୍ ସେବା ବନ୍ଦ ଯୋଗୁ ଏହା ପରିସରରେ କାର୍ଯ୍ୟରତ ଥିବା ସ୍ବୟଂ ସହାୟକ ଗୋଷ୍ଠୀ ସଦସ୍ୟା, ଏହାର ରକ୍ଷଣାବେକ୍ଷଣ ଦାୟିତ୍ୱରେ ଥିବା ମହିଳା ଗୋଷ୍ଠୀ, ଡୋକ୍ରା କାରିଗରଙ୍କ ସମେତ ଏହା ମଧ୍ୟରେ ରହିଥିବା ଠେକୁଆ, ବତକ ଆଦି ପାଣି ପାଇଁ ଡହଳବିକଳ ହୋଇ ପଡିଛନ୍ତି। ପାଣି ନ ଥିବାରୁ ଏହା ମଧ୍ୟରେ ରହିଥିବା ଫୁଲଗଛ ଏବଂ ଅନ୍ୟାନ୍ୟ ଗଛ ନଷ୍ଟ ହୋଇଗଲାଣି। ଏ ସମ୍ପର୍କରେ ରକ୍ଷଣାବେକ୍ଷଣ ଦାୟିତ୍ୱରେ ଥିବା ମହିଳା ଗୋଷ୍ଠୀର ସଦସ୍ୟମାନେ ସଦର ବ୍ଲକ ଓ ଜିଲା ପ୍ରଶାସନକୁ ଅବଗତ କରାଇଥିଲେ ମଧ୍ୟ ଏହାକୁ ଗୁରୁତ୍ୱ ପ୍ରଦାନ କରାଯାଉ ନ ଥିବା ଦୁଃଖ ଓ ପରିତାପର ବିଷୟ ବୋଲି ସାଧାରଣରେ ଆଲୋଚନା ହେଉଛି। ଏ ସଂକ୍ରାନ୍ତରେ ଢେଙ୍କାନାଳ ସଦର ବ୍ଲକ ବିଡିଓ ଆୟୁଷି ମହାପାତ୍ର କହିଛନ୍ତି, କିଛିଦିନ ପୂର୍ବରୁ ଏ ସମ୍ପର୍କରେ ବିଦ୍ୟୁତ ବିଭାଗକୁ ଆମେ ଜଣାଇଥିଲୁ। ପୁଣି ଆଉଥରେ ଜଣାଇବୁ ବୋଲି ବିଡିଓ କହିିଥିଲେ। ଏ ସଂକ୍ରାନ୍ତରେ ବିଦ୍ୟୁତ୍ ବିଭାଗ ନିର୍ବାହୀଯନ୍ତ୍ରୀ ବେଣୁଧର ଦାସ କହିଛନ୍ତି, କଳାକୃତି ଗ୍ରାମକୁ ମାଟିତଳେ କେବୁଲ ମାଧ୍ୟମରେ ବିଦ୍ୟୁତ୍ ଯୋଗାଣ ହୋଇଛି। ତେଣୁ କେବୁଲରେ କୌଣସି ସମସ୍ୟା ରହିଥିବ। ଆମେ ତାହା କରିପାରିବୁ ନାହିଁ। ବିଡିଓ ଏ ସମ୍ପର୍କରେ ଜାଣି ନାହାନ୍ତି। ଏହା ଜିଇଡି ବିଭାଗକୁ କହି କରିବା କଥା ବୋଲି ନିର୍ବାହୀ ଯନ୍ତ୍ରୀ କହିଥିଲେ। ସୂଚନାଯୋଗ୍ୟ, ତତ୍କାଳୀନ ଜିଲାପାଳ ସରୋଜ କୁମାର ସେଠୀ ଏହି ପ୍ରକଳ୍ପକୁ ଅଧିକ ଲୋକାଭିମୁଖୀ କରିବା ପାଇଁ ୨୮ ଜୁନ ୨୦୨୩ରେ ସେଠାରେ ଏକ ୱାଟର ଟ୍ୟାଙ୍କ ନିର୍ମାଣ କରି ବୋଟିଂ ବ୍ୟବସ୍ଥା କରିଥିଲେ। ୪ଟି ବୋଟ୍ ମଧ୍ୟ ରହିଥିଲା। ହେଲେ ରକ୍ଷଣାବେକ୍ଷଣା ଅଭାବରୁ ଏହି ବୋଟ୍ଗୁଡିକ ଏବେ ଭାଙ୍ଗରୁଜା ଅବସ୍ଥାରେ ମଧ୍ୟ ପଡିରହିଛି ା