ଡେରାବିଶ,୧୩ା୬ (ସ୍ବ.ପ୍ର.): ଡେରାବିଶ ବ୍ଲକ ଅନ୍ତର୍ଗତ ନରସିଂହପୁର ପଞ୍ଚାୟତ କାର୍ଯ୍ୟାଳୟରେ ସୋମବାର ପଲ୍ଲୀରେ ପ୍ରଶାସନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମକୁ ଏବିଡିଓ ଭଞ୍ଜକିଶୋର ନାୟକ ଶୁଭାରମ୍ଭ କରିଥିଲେ। ଏଥିରେ ନରସିଂହପୁର ସରପଞ୍ଚ ସୁଧୀର କୁମାର ଖଟୁଆ, ସମିତିସଭ୍ୟ ଅନନ୍ତ ପ୍ରସାଦ ଜେନା ଉପସ୍ଥିତ ରହିଥିଲେ। କାର୍ଯ୍ୟକ୍ରମରେ ଏବିଡିଓ ନାୟକ, ଅତିରିକ୍ତ ତହସିଲଦାର ସୁଜିତ କୁମାର ସ୍ବାଇଁ ଉପସ୍ଥିତ ରହି ପଞ୍ଚାୟତ ଅଧୀନ ବିଭିନ୍ନ ଗ୍ରାମରୁ ଆସିଥିବା ଅଭିଯୋଗର ଶୁଣାଣି କରିଥିଲେ। ଏହି ଅଭିଯୋଗ ମଧ୍ୟରେ ସରକାରଙ୍କର ମୋ ଘର ଯୋଜନା, ରାଶନ କାର୍ଡ, ଭତ୍ତାରୁ ବଞ୍ଚିତ ଥିବା ହିତାଧିକାରୀ ସେମାନଙ୍କ ଅଭିଯୋଗ ପ୍ରଦାନ କରିଥିଲେ। ପଞ୍ଚାୟତର ନରସିଂହପୁର ଗ୍ରାମର ବହୁ ହିତାଧିକାରୀ ସେମାନଙ୍କର ରାଶନ ସାମଗ୍ରୀ ୭ ମାସ ହେବ ପାଇବାରୁ ବଞ୍ଚତ୍ତ ହେଉଥିବା ନେଇ ନିମାଁଇ ବେହେରାଙ୍କ ନେତୃତ୍ୱରେ ଏବିଡିଓ ନାୟକଙ୍କୁ ଭେଟି ଅଭିଯୋଗ କରିଛନ୍ତି। ଏହି ରାଶନ ସାମଗ୍ରୀକୁ ଯୋଗାଇବା ଦାୟିତ୍ୱରେ ଥିବା ଏଣ୍ଡର ପ୍ରାଥମିକ କୃଷି ସମବାୟ ସମିତିର ସମ୍ପାଦକ ହଡ଼ପ କରିଥିବା ନେଇ ଅଭିଯୋଗ କରିଥିଲେ। ବହୁ ହିତାଧିକାରୀଙ୍କୁ ସମବାୟ ସମିତିର ସମ୍ପାଦକ ଏକ ସମୟରେ ୭ ମାସର ଚାଉଳ ଦେବା ନେଇ ବେହେରାଙ୍କ ସମେତ ଉପସ୍ଥିତ ହିତାଧିକାରୀମାନେ ଅଭିଯୋଗ ଆଣିଥିଲେ। ତେବେ ଡେରାବିଶ ବ୍ଲକରେ ବହୁ ୱାର୍ଡ଼ର ହିତାଧିକାରୀମାନେ ସେମାନଙ୍କ ଖାଉଟି ସାମଗ୍ରୀ ପାଇବାରୁ ବଞ୍ଚତ୍ତ ହେଉଛନ୍ତି ବୋଲି ଅଭିଯୋଗରେ ଦର୍ଶାଯାଇଛି। ସେହିପରି ରାଶନ କାର୍ଡ଼ରେ ପରିବାରର ବହୁ ସଦସ୍ୟଙ୍କ ନାମ ପଞ୍ଜୀକୃତ କରିବାକୁ ଆବେଦନ କରାଯାଉଥିଲେ ମଧ୍ୟ ବ୍ଲକରେ ସ୍ଥାୟୀ ମାର୍କେଟିଂ ଇନ୍ସପେକ୍ଟର ନ ଥିବା ଓ ଏହି ପଦବୀର ଦାୟିତ୍ୱରେ ଥିବା ଅଧିକାରୀ ବ୍ଲକ କାର୍ଯ୍ୟାଳୟକୁ ନ ଆସିବା ବିଭାଗରେ ଚାଲିଥିବା ଦୁର୍ନୀତିର ଗନ୍ଧ ସ୍ପଷ୍ଟ ବାରି ହେଉଥିବା ଏବିଡିଓଙ୍କ ନିକଟରେ ଦର୍ଶାଇଥିଲେ। ଏହାକୁ ନେଇ କିଛି ସମୟ ପାଇଁ ଉପସ୍ଥିତ ହିତାଧିକାରୀଙ୍କ ମଧ୍ୟରେ ହଟ୍ଟଗୋଳ ସୃଷ୍ଟି ହୋଇଥିଲା। ବ୍ଲ୍ଳକ ମାର୍କେଟିଂ ଇନ୍ସପେକ୍ଟରଙ୍କର ଉପସ୍ଥିତିରେ ଏହି ବିଭାଗକୁ ଚଳାଉଥିବା ଜଣେ କର୍ମଚାରୀ ଏହାର କୌଣସି ଉତ୍ତର ଦେଇ ପାରି ନ ଥିଲେ। ସେହିପରି ଆବାସ ଗୃହ ଯୋଜନାରୁ ବଞ୍ଚତ୍ତ ହିତାଧିକାରୀ ସେମାନଙ୍କ ଅଭିଯୋଗ ପ୍ରଦାନ କରିଥିଲେ। ଏଥିରୁ ଏବିଡିଓ ନାୟକ କେତେଗୋଟି ଅଭିଯୋଗର ତ୍ୱରିତ ସମାଧାନ କରିଥିବା ବେଳେ ଅନ୍ୟ ଅଭିଯୋଗ କାର୍ଯ୍ୟକ୍ରମରେ ଉପସ୍ଥିତ ରହିଥିବା ବିଭାଗୀୟ ସମ୍ପ୍ରସାରଣ ଅଧିକାରୀଙ୍କ ନିକଟକୁ ପଠାଇଥିଲେ। ଏହି କାର୍ଯ୍ୟକ୍ରମରେ ଅତିରିକ୍ତ କାର୍ଯ୍ୟକ୍ରମ ଅଧିକାରୀ ସାବିତ୍ରୀ ମନ୍ତ୍ରୀ, ଗୃହ ନିର୍ମାଣ ବିଭାଗର ଦେବେଶ ବେହେରା, ତାପସ କୁମାର ଜେନା ପ୍ରମୁଖ ବିଭିନ୍ନ ବିଭାଗର ଅଧିକାରୀ ଉପସ୍ଥିତ ରହି ସେମାନଙ୍କ ବିଭାଗର ଅଭିଯୋଗମାନ ଗ୍ରହଣ କରିଥଲେ। ଶିବିରରେ ୧୦ରୁ ଊର୍ଦ୍ଧ୍ୱ ବିଭିନ୍ନ ବିଭାଗର ଷ୍ଟଲ ଖୋଲାଯାଇଥିଲା। ଏଥିରେ ଡେରାବିଶ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପକ୍ଷରୁ ଡା. କ୍ରିଷ୍ଣା ପଣ୍ଡା, ସହାୟକ ଅଜୟ କୁମାର ରାଉତ ଓ ସଲିଲା ତ୍ରିପାଠୀଙ୍କ ତତ୍ତ୍ୱାବଧାନରେ ଖୋଲାଯାଇଥିବା ସ୍ବାସ୍ଥ୍ୟ ଶିବିରରେ ଉପସ୍ଥିତ ଲୋକଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଥିଲା। ଏହାକୁ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ତିଳୋତ୍ତମା ନାୟକ, ଗ୍ରାମ ରୋଜଗାର ସେବକ ସତ୍ୟବ୍ରତ ସାହୁ ଓ ଅନିଲ କୁମାର ସେଠୀ ପ୍ରମୁଖ ପରିଚାଳନା କରିଥିଲେ।