କେସିଙ୍ଗା, ୩୦।୧୨ (ଡି.ଏନ.ଏ.): କଳାହାଣ୍ଡି ଜିଲା କେସିଙ୍ଗା ସହରର ଅବକାରୀ ବିଭାଗ ନିକଟ କେନ୍ଦୁପତ୍ର କେନ୍ଦ୍ରୀୟ ଗୋଦାମ ଗୃହ ଆଜକୁ ୨ ବର୍ଷ ହେବ କାର୍ଯ୍ୟକ୍ଷମ ନ ହୋଇ ଭୂତକୋଠି ହୋଇ ପଡି ରହିଛି। କେସିଙ୍ଗା ରେଞ୍ଜ ଅଧୀନରେ ୬୨ଟି ଫଡି ରହିଛି। ପ୍ରତ୍ୟେକ ଫଡିରୁ କେନ୍ଦୁପତ୍ର ବିଡା ଏହି କେନ୍ଦୁପତ୍ର କେନ୍ଦ୍ରୀୟ ଗୋଦାମ କେସିଙ୍ଗାରେ ଗଚ୍ଛିତ କରାଯାଇ ଥାଏ। କିନ୍ତୁ ଏହି ନୂତନ ଦୁଇ ମହଲା ବିଲ୍ଡିଂ ଓ ଗୋଦାମ ଗତ ୨୦୧୮ରେ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇଥିଲେ ସୁଦ୍ଧା ଆଜି ଯାଏ ପୂର୍ବତନ ରେଞ୍ଜର ହସ୍ତାନ୍ତର କରି ନ ଥିବାରୁ ଭୂତ କୋଠି ଭାବେ ପଡି ରହିଛି। ଏହି ଦୁଇ ମହଲା କାର୍ଯ୍ୟାଳୟ, ରେଞ୍ଜରଙ୍କ ବାସଗୃହ, ଫରେଷ୍ଟର ଓ ଗୋଦାମ ଗୃହ ବିନା ସୂଚନା ଫଳକରେ ନିର୍ମାଣ ଶେଷ ହୋଇଛି। କେନ୍ଦୁପତ୍ର ବିଡା ଖରା ବର୍ଷାରେ ରଖିବା ପାଇଁ ଘୋର ସମସ୍ୟା ହେଉଛି। ପୂର୍ବତନ ରେଞ୍ଜର ଲକ୍ଷ୍ୟାଧିକ ଟଙ୍କା ଆତ୍ମସାତ କରି ନିଳମ୍ବିତ ହେବାରୁ ଆଜି ଯାଏ ହସ୍ତାନ୍ତର କରି ନ ଥିବା ବିଭାଗୀୟ ପକ୍ଷରୁ ଜଣାପଡିଛି। ଫରେଷ୍ଟ ଗାର୍ଡଙ୍କ ବାସଗୃହରେ କବାଟ, ଝରକା, ବିଦ୍ୟୁତ, ପାନୀୟ ଜଳ ସଂଯୋଗ ମଧ୍ୟ କରାଯାଇ ନାହିଁ। ଦୀର୍ଘ ବର୍ଷ ହେଲା ପୁରୁଣା ରେଞ୍ଜ କାର୍ଯ୍ୟାଳୟ ଆଜବେଷ୍ଟରରେ ନିର୍ମାଣ ହୋଇଥିବାରୁ ଖରା, ବର୍ଷା ଓ ଶୀତରେ କର୍ମଚାରୀମାନେ ବହୁ ଅସୁବିଧାରେ କାମ କରି ଆସୁଛନ୍ତି। ବିନା ସୂଚନା ଫଳକରେ ଏହି ବିଲ୍ଡିଂ ଓ ଗୋଦାମ ନିର୍ମାଣ ହୋଇଥିବାରୁ ବ୍ୟାପକ ଦୁର୍ନୀତି ଓ ନିମ୍ନମାନର ହୋଇଥିବା ଜଣାପଡିଛି। ବିଭାଗୀୟ ଡିଏଫଓ ଏଥିପ୍ରତି ମଧ୍ୟ ଦୃଷ୍ଟି ଦେଇ ନ ଥିବାରୁ ଅକାମୀ ହୋଇ ଲକ୍ଷାଧିକ ଟଙ୍କାର ବିଲ୍ଡିଂ, ବାସଗୃହ ଓ ଗୋଦାମ ଭୂତ କୋଠି ହୋଇପଡି ରହିଛି। ଏ ସଂକ୍ରାନ୍ତରେ କେସିଙ୍ଗା କେନ୍ଦୁପତ୍ର ବନାଞ୍ଚଳ ଅଧିକାରୀ ଆଶୁତୋଷ ନନ୍ଦଙ୍କୁ ପଚାରିବାରୁ ଆଜକୁ ୧୧ ମାସ ହେଲା ପୂର୍ବତନ ରେଞ୍ଜର ନିଳମ୍ବିତ ହୋଇ କାର୍ଯ୍ୟରେ ଅନ୍ୟତ୍ର ଯୋଗଦେବା ପରେ ମଧ୍ୟ ଏହି ସବୁ ହସ୍ତାନ୍ତର କରିନାହାନ୍ତି କି ଅଫିସର କାଗଜପତ୍ର ବି ଚାର୍ଜ ବି ଦେଇନାହାନ୍ତି ବୋଲି ପ୍ରକାଶ କରିଛନ୍ତି।
