![](https://www.dharitri.com/wp-content/uploads/2023/04/5-1.jpg)
ଭେଡେନ,୧।୪(ଡି.ଏନ୍.ଏ.): ସରକାର ଅସହାୟ ବୃଦ୍ଧାବୃଦ୍ଧ, ବିକଳାଙ୍ଗ ଏବଂ ବିଧବାମାନଙ୍କୁ ମାସିକ ୫ ଶହ ଏବଂ ୭୦ ବର୍ଷ ବୟସ ଟପିଲେ ୭ଶହ ଟଙ୍କା ଭତ୍ତା ପ୍ରଦାନର ବ୍ୟବସ୍ଥା କରିଛନ୍ତି। ବିଗତ ଦିନରେ ଏହି ଟଙ୍କା ହିତାଧିକାରୀଙ୍କ ହାତକୁ ସିଧାସଳଖ ଦିଆଯାଉଥିଲା। ଏଥିରେ ବାଟ ମାରଣା ହେଉଥିବା ଅଭିଯୋଗ ହେବାରୁ ଗତବର୍ଷ ଅକ୍ଟୋବରରୁ ହିତାଧିକାରୀମାନଙ୍କୁ ବ୍ୟାଙ୍କ ଆକାଉଣ୍ଟ ଜରିଆରେ ଭତ୍ତା ଟଙ୍କା ପ୍ରଦାନ କରାଯାଉଛି। ତେବେ ଏହି ବ୍ୟବସ୍ଥାରେ ମଧ୍ୟ ହିତାଧିକରୀ ହଇରାଣ ହେଉଥିବା ଦେଖିବାକୁ ମିଳିଛି। ଅନେକ ବୃଦ୍ଧାବୃଦ୍ଧଙ୍କ ଅଙ୍ଗୁଳିର ଟିପ ଚିହ୍ନ ଆସୁ ନ ଥିବାରୁ ସେମାନେ ମାସ ମାସ ଧରି ଭତ୍ତା ପାଇବାରୁ ବଞ୍ଚତ୍ତ ହେଉଛନ୍ତି। ଏହାର ସୁଯୋଗ ନେଇ କେତେକ କର୍ମଚାରୀ ଭତ୍ତା ଟଙ୍କା ହଡପ କରୁଥିବା ଅଭିଯୋଗ ହୋଇଛି। ମିଳିଥିବା ସୂଚନାନୁସାରେ, ଭେଡ଼େନ ବ୍ଲକ ଅଞ୍ଚଳରେ ଗତ ନଭେମ୍ବର ମାସରେ ଭତ୍ତା ୫ଶହ ଓ ଶୀତବସ୍ତ୍ର ବାବଦ ୩ଶହ ଟଙ୍କା କେତେକ ହିତାଧିକାରୀଙ୍କ ପାସବୁକରେ ଜମା ହୋଇଥିଲା। ତେବେ ପରବର୍ତ୍ତୀ ଫେବୃୟାରୀ ଓ ମାର୍ଚ୍ଚ ମାସର ଭତ୍ତା ଟଙ୍କା ଜମା ହୋଇ ସାରିଥିବା ବେଳେ ଡିସେମ୍ବର ଓ ଜାନୁଆରୀ ମାସର ଟଙ୍କା ଜମା ହୋଇ ନ ଥିବା ଅଭିଯୋଗ ହେଉଛି। ଏଥିପାଇଁ ସେମାନେ ବ୍ୟାଙ୍କ ଏବଂ ପଞ୍ଚାୟତ କର୍ତ୍ତୃପକ୍ଷଙ୍କୁ ଜଣାଇଲେ ମଧ୍ୟ ସନ୍ତୋଷ ଜନକ ଉତ୍ତର ପାଇ ପାରିନାହାନ୍ତି। ଏ ସମ୍ପର୍କରେ ବ୍ଲକ ସମାଜ ମଙ୍ଗଳ ଅଧିକାରୀ ଚମରୁ ବେଶ୍ରାଙ୍କୁ ଯୋଗାଯୋଗ କରାଯିବାରୁ ସେ କହିଲେ, ମୋ ପାଖକୁ ଏମିତି କିଛି ଅଭିଯୋଗ ଆସିନାହିଁ। ଯେଉଁମାନଙ୍କ କ୍ଷେତ୍ରରେ ଏଭଳି ହୋଇଛି ସେମାନେ ନିଜ ଆଧାର କାର୍ଡ ଏବଂ ପାସ୍ବୁକ ମୋ ପାଖକୁ ଆଣନ୍ତୁ, କ’ଣ ହୋଇଛି ଜଣାପଡିବ ବୋଲି ବେଶ୍ରା କହିଥିଲେ।