ନୂଆଦିଲ୍ଲୀ,୧୦।୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କ୍ୟାବିନେଟରେ ଅନ୍ତର୍ଭୁକ୍ତ ମୋଟ କ୍ୟାବିନେଟ ମନ୍ତ୍ରୀଙ୍କ ମଧ୍ୟରୁ ୨୫ ଜଣ ଭାଜପାର ଏବଂ ୫ ମନ୍ତ୍ରୀ ପଦବୀ ସହଯୋଗୀ ଦଳଙ୍କୁ ଦିଆଯାଇଛି। ମୋଦୀ ୩.୦ କ୍ୟାବିନେଟରେ ୭୧ ମନ୍ତ୍ରୀ ଶପଥ ନେଇଛନ୍ତି। ଏଥିମଧ୍ୟରୁ ୩୦ଜଣ ମନ୍ତ୍ରୀ କ୍ୟାବିନେଟର ଅଂଶ ହେବେ। ଏଥି ସହିତ ୫ ନ୍ତ୍ରୀଙ୍କୁ ସ୍ବାଧୀନ ଦାୟିତ୍ୱ ଏବଂ ୩୬ ଏମପିଙ୍କୁ ରାଜ୍ୟ ମନ୍ତ୍ରୀ ପଦ ଦିଆଯାଇଛି।
ମୋଦି ସରକାର ୩.୦ରେ ଅନେକ ଚେହେରା ପୂର୍ବ କ୍ୟାବିନେଟରେ ଅନ୍ତର୍ଭୁକ୍ତ କରାଯାଇଛି। ଏଥି ସହିତ, ଏଥର ଅନେକ ନୂଆ ଚେହେରା ମଧ୍ୟ ମୋଦି କ୍ୟାବିନେଟ ୩.୦ରେ ଯୋଗଦେବେ। ମୋଦି ସରକାର ୨.୦ ରେ ରାଜନାଥ ସିଂ, ଅମିତ ଶାହା, ନିତିନ ଗଡକରୀ, ଏସ ଜୟଶଙ୍କର ଏବଂ ନିର୍ମଳା ସୀତାରମଣଙ୍କ ସମେତ ଅନେକ ଚେହେରା ଦେଖିବାକୁ ମିଳିଥିଲା।
ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କ୍ୟାବିନେଟର ଶପଥ ଗ୍ରହଣ ପରଠାରୁ ମନ୍ତ୍ରଣାଳୟର ବିଭାଜନକୁ ନେଇ ନିରନ୍ତର ଆଲୋଚନା ଚାଲିଛି। ଏହି ସମୟରେ, ସୂତ୍ରରୁ ପ୍ରକାଶ ଯେ ସୋମବାର (ଜୁନ ୧୦) ମୋଦି ୩.୦ କ୍ୟାବିନେଟର ମନ୍ତ୍ରୀଙ୍କ ମଧ୍ୟରେ ପୋର୍ଟଫୋଲିଓ ବଣ୍ଟନ ହୋଇପାରେ। କୁହାଯାଉଛି ଯେ ପୋର୍ଟଫୋଲିଓ ସମ୍ବନ୍ଧୀୟ ତାଲିକା ସୋମବାର ବିଳମ୍ବିତ ରାତି ସୁଦ୍ଧା ପ୍ରକାଶ କରାଯାଇପାରିବ।
ଏଥର ୬ ଜଣ ପୂର୍ବତନ ମୁଖ୍ୟମନ୍ତ୍ରୀ ମୋଦି ୩.୦ କ୍ୟାବିନେଟରେ ନଜର ଆସିବେ। ଏଥିମଧ୍ୟରେ ଶିବରାଜ ସିଂ ଚୌହାନ (ମଧ୍ୟପ୍ରଦେଶ), ରାଜନାଥ ସିଂ (ଉତ୍ତରପ୍ରଦେଶ), ମନୋହର ଲାଲ ଖଟ୍ଟର (ହରିୟାଣା), ସରବାନନ୍ଦ ସୋନୋୱାଲ (ଆସାମ), ଏଚଡି କୁମାରସ୍ବାମୀ (କର୍ନାଟକ) ଏବଂ ଜିତନ ରାମ ମଞ୍ଜି (ବିହାର) ଅନ୍ତର୍ଭୁକ୍ତ।
ଶପଥ ଗ୍ରହଣ କରିବାର ପରଦିନ ଅର୍ଥାତ୍ ସୋମବାର (ଜୁନ ୧୦) ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପିଏମଓ ଯାଇ ଦାୟିତ୍ୱ ଗ୍ରହଣ କରିଥିଲେ। ଏହା ସହ ମୋଦି ସରକାର ଆକ୍ସନ ମୋଡକୁ ଆସିଥିଲେ। ମୋଦି ପ୍ରଥମେ କିଷାନ ସାମ୍ମାନ ନିଧି ଯୋଜନାର କିସ୍ତି ପ୍ରକାଶ କରିଥିଲେ। ଏହି ସମୟରେ ସୋମବାର ଅପରାହ୍ନ ୫ ଟା ସୁଦ୍ଧା ମୋଦିଙ୍କ ଲୋକ କଲ୍ୟାଣ ମାର୍ଗ ବାସଭବନରେ ନୂତନ ସରକାରଙ୍କ ପ୍ରଥମ କ୍ୟାବିନେଟ ବୈଠକ ଅନୁଷ୍ଠିତ ହୋଇପାରିବ ବୋଲି ଖବର ରହିଛି।