ନୂଆଦିଲ୍ଲୀ,୨୮।୧: ଅଷ୍ଟ୍ରେଲିଆକୁ ୨-୧ ବ୍ୟବଧାନରେ ହରାଇବା ପରେ ଭାରତୀୟ ଦଳର ମନୋବଳ ବେଶ୍ ଦୃଢ଼ ଅଛି। ଇଂଲଣ୍ଡ ବିପକ୍ଷ ପରବର୍ତ୍ତୀ ସିରିଜ୍ ଲାଗି ଟିମ୍ ଇଣ୍ଡିଆ ସମ୍ପୂର୍ଣ୍ଣ ପ୍ରସ୍ତୁତ। ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ପ୍ରଥମ ମ୍ୟାଚ୍ ଚେନ୍ନାଇଠାରେ ଆସନ୍ତା ୫ ତାରିଖରେ ଖେଳାଯିବ। ଏହି ସିରିଜ ଲାଗି ଚେନ୍ନାଇରେ ପହଞ୍ଚି ସାରିଛି ଇଂଲଣ୍ଡ ଦଳ। ହେଲେ ପୂର୍ବତନ ଅଧିନାୟକ କେଭିନ ପିଟରସନଙ୍କ ମତରେ ଏହି ଇଂଲଣ୍ଡ ଦଳ ଭାରତ ସହ ଖେଳିବାକୁ ସମର୍ଥ ନୁହେଁ। ପ୍ରଥମ ଦୁଇ ଟେଷ୍ଟରୁ ଜନ୍ନି ବେଆରଷ୍ଟୋଙ୍କୁ ବିଶ୍ରାମ ଦିଆଯିବା ନିଷ୍ପତ୍ତିକୁ ଗ୍ରହଣ କରିପାରି ନାହାନ୍ତି ଏହି ପ୍ରାକ୍ତନ ଖେଳାଳି। ସୋସିଆଲ ମିଡିଆ ପ୍ଲାଟଫର୍ମ ଟୁଇଟରରେ ଭାରତ ବିପକ୍ଷ ସିରିଜ୍ ଲାଗି ଘୋଷିତ ଇଂଲଣ୍ଡ ଦଳକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ପିଟରସନ।
ଅଷ୍ଟ୍ରେଲିଆ ଭଳି ଭାରତରେ ଟେଷ୍ଟ ଜିତିବା ଗର୍ବର କଥା। କିନ୍ତୁ ଇଂଲଣ୍ଡ ତା’ର ଶ୍ରେଷ୍ଠ ଦଳ ଖେଳାଉ ନାହିଁ। ଏହା ଦ୍ୱାରା ଇସିବି କେବଳ ଇଂଲଣ୍ଡ ଫ୍ୟାନଙ୍କୁ ନୁହେଁ, ବରଂ ଶକ୍ତିଶାଳୀ ଭାରତୀୟ ଦଳକୁ ମଧ୍ୟ ଅସମ୍ମାନିତ କରିଛି। ଦଳରେ ବେଆରଷ୍ଟୋଙ୍କୁ ନିଶ୍ଚିତ ସୁଯୋଗ ମିଳିବା କଥା। ଷ୍ଟୁଆର୍ଟ ବ୍ରଡ ଓ ଜେମ୍ସ ଆଣ୍ଡରସନଙ୍କ ମଧ୍ୟରୁ ଜଣେ ସିନିୟର ବୋଲର ଖେଳିବା ଦରାକର ବୋଲି ପିଟରସନ ଟୁଇଟ୍ କରିଛନ୍ତି।
ଉଲ୍ଲେଖଥାଉ କି, ଭାରତ ଓ ଇଂଲଣ୍ଡ ମଧ୍ୟରେ ଏପର୍ଯ୍ୟନ୍ତ ୬୦ ଟେଷ୍ଟ ଖେଳାଯାଇଛି। ସେଥିମଧ୍ୟରୁ ଭାରତ ୧୯ଟି ଜିତିଥିବା ବେଳେ ମାତ୍ର ୧୩ ଥର ଜିତା ପଟ ପାଇଛି ଇଂଲଣ୍ଡ। ୨୮ ଟେଷ୍ଟର ଫଳାଫଳ ଡ୍ର’ ରହିଛି।
