ନୂଆଦିଲ୍ଲୀ, ୧୮।୧ : ଦେଶରେ ବହୁ ଲୋକଙ୍କୁ ଦିନକୁ ଦୁଇମୁଠା ଖାଇବାକୁ ମିଳୁନି। ଏନେଇ ଏକ ମାମଲାର ବିଚାର କରି ସୁପ୍ରିମ୍ କୋର୍ଟ ମଙ୍ଗଳବାର କହିଛନ୍ତି ଯେ, ଭୋକକୁ ସନ୍ତୁଷ୍ଟ କରିବା ଜରୁରୀ। ଏନେଇ ଶୀର୍ଷ କୋର୍ଟ କେନ୍ଦ୍ର ସରକାରଙ୍କୁ କମ୍ୟୁନିଟି କିଚେନ୍ ମଡେଲ ଯୋଜନା ପାଇଁ ପରାମର୍ଶ ଦେଇଛନ୍ତି।
ଏନେଇ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳକୁ ଅତିରିକ୍ତ ଖାଦ୍ୟ ସାମଗ୍ରୀ ଯୋଗାଇ ଦେବା ଉପରେ ବିଚାର କରିବା ଲାଗି ସର୍ବୋଚ୍ଚ ନ୍ୟାୟାଳୟ କହିଛନ୍ତି।
ପ୍ରଧାନ ବିଚାରପତି ଏନ.ଭି. ରମନା, ବିଚାରପତି ଏ.ଏସ୍. ବୋପନ୍ନା ଏବଂ ହିମା କୋହଲିଙ୍କ ନେତୃତ୍ୱରେ ଗଠିତ ଖଣ୍ଡପୀଠ କ୍ଷୁଧା ଜନିତ ମୃତ୍ୟୁ ରୋକିବା ଲାଗି କମ୍ୟୁନିଟି କିଚେନ୍ ଅପରିହାର୍ଯ୍ୟ ଏକ ମାମଲାର ଶୁଣାଣି କରି ଏସମ୍ପର୍କିତ ନୀତି ପ୍ରସ୍ତୁତ କରିବାକୁ କେନ୍ଦ୍ର ସରକାରଙ୍କୁ ପରାମର୍ଶ ଦେଇଛନ୍ତି।
ଶୀର୍ଷ କୋର୍ଟ କହିଛନ୍ତି ଯେ, ଆମେ ଏହା କହୁ ନାହୁଁ ଯେ ସରକାର ଖାଦ୍ୟ ଦେଉ ନାହାନ୍ତି। କିନ୍ତୁ ଏନେଇ ଏକ ନୀତିଗତ ମଡେଲ ପ୍ରସ୍ତୁତି କରାଯାଇ ପାରନ୍ତା ବୋଲି ଆମେ ଜୋର୍ ଦେଉଛୁ। ଏଭଳି ଯୋଜନା ସମ୍ପର୍କରେ ଚିନ୍ତା କରିବାର ଆବଶ୍ୟକତା ରହିଥିବା ପ୍ରଧାନ ବିଚାରପତି କହିଛନ୍ତି।
କେତେକ ରାଜ୍ୟ ୨-୩ ପ୍ରତିଶତ ଖାଦ୍ୟଶସ୍ୟ ଆବଣ୍ଟିନ ଯୋଜନା ଉପରେ ପ୍ରସ୍ତାବ ଦେଇଛନ୍ତି ବୋଲି ସେ କହିଛନ୍ତି। ସରକାର ଏହି ମାମଲାକୁ ଏକ ମୋକଦମା ଭାବେ ଗ୍ରହଣ ନକରି ଏହାର ସମାଧାନର ପଥ ବାହାର କରିବା ଉଚିତ। ଏହାକୁ ଏକ ମାନବୀୟ ସମସ୍ୟା ଭାବେ ଦେଖିବାର ଆବଶ୍ୟକତା ରହିଛି ବୋଲି ପ୍ରଧାନ ବିଚାରପତି କହିଛନ୍ତି।