ନୂଆଦିଲ୍ଲୀ,୨୭।୫ : ସମାଜକୁ ସଦାଚାର, ନୈତିକତା ଶିକ୍ଷା ଦେବା ଅବା ଏହାର ପ୍ରଚାର କରିବା କୋର୍ଟଙ୍କର କାମ ନୁହେଁ। ଏହା ସେପରି ଏକ ଅନୁଷ୍ଠାନ ନୁହେଁ। ନିଷ୍ପତ୍ତି ନେବାବେଳେ ଏହା ଆଇନର ନିୟମ ଦ୍ୱାରା ବନ୍ଧା। ଦୁଇ ଶିଶୁଙ୍କୁ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇଥିବା ମହିଳାଙ୍କୁ ସମୟ ପୂର୍ବରୁ ଖଳାସ କରିବାକୁ ନିର୍ଦ୍ଦେଶ ଦେଇ ଶନିବାର ସୁପ୍ରିମକୋର୍ଟ ଏଭଳି କହିଛନ୍ତି।
ମହିଳା ଜଣଙ୍କ ଜଣେ ପୁରୁଷଙ୍କ ସହ ସମ୍ପର୍କ ରଖିଥିଲେ ଯିଏ ତାଙ୍କୁ ବାରମ୍ବାର ଧମକ ଦେଉଥିଲେ। ତେଣୁ ସେ ନିଜ ପିଲାମାନଙ୍କ ସହିତ ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥିଲେ। ସେ କୀଟନାଶକ କିଣି ଉଭୟ ପିଲାଙ୍କୁ ଦେଇଥିଲେ। ଏହା ପରେ, ଯେତେବେଳେ ସେ ନିଜେ ଖାଇବା ପାଇଁ ଏକ ଗ୍ଲାସରେ କୀଟନାଶକ ଢାଳିଲେ, ତାଙ୍କ ଝିଆରି ତାଙ୍କୁ ତଳେ ପକାଇ ଦେଇଥିଲେ। ଏହା ପରେ ଡାକ୍ତରଖାନାରେ ପହଞ୍ଚିବା ପରେ ଉଭୟ ଶିଶୁଙ୍କୁ ମୃତ ଘୋଷଣା କରାଯାଇଥିଲା। ଭାରତୀୟ ଦଣ୍ଡ ସଂହିତା (ଆଇପିସି) ର ଧାରା ୩୦୨ ଅନୁଯାୟୀ ଏହି ମାମଲାରେ ଏକ ଏଫଆଇଆର୍ ପଞ୍ଜିକୃତ ହୋଇଥିଲା।
ଟ୍ରାଏଲ କୋର୍ଟ ଏହି ମହିଳାଙ୍କୁ ଆଇପିସି ଧାରା ୩୦୨ (ହତ୍ୟା) ଏବଂ ୩୦୯ (ଆତ୍ମହତ୍ୟା) ଅନୁଯାୟୀ ଦୋଷୀ ସାବ୍ୟସ୍ତ କରି ଜରିମାନା ସହିତ ତାଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ। ଆଇପିସିର ଧାରା ୩୦୯ ଅନୁଯାୟୀ ଦୋଷୀ ସାବ୍ୟସ୍ତ ହୋଇଥିବାବେଳେ ହାଇକୋର୍ଟ ତାଙ୍କୁ ଧାରା ୩୦୨ ଅନୁଯାୟୀ ଦୋଷମୁକ୍ତ କରିଥିଲେ।
ମହିଳା ଜଣକ ସମୟ ପୂର୍ବରୁ ମୁକ୍ତି ପାଇଁ ନିବେଦନ କରି କହିଥିଲେ ସେ ପ୍ରାୟ ୨୦ ବର୍ଷ ଜେଲରେ ଅଛନ୍ତି। ତେବେ ତାମିଲନାଡୁ ସରକାର ତାଙ୍କ ଦ୍ୱାରା କରାଯାଇଥିବା ଅପରାଧର ନିଷ୍ଠୁରତାକୁ ବିଚାର କରି ରାଜ୍ୟ ସ୍ତରୀୟ କମିଟିର ସୁପାରିଶକୁ ଖାରଜ କରିଛନ୍ତି।
ଜଷ୍ଟିସ ଅଜୟ ରାସ୍ତୋଗୀ ଏବଂ ଜଷ୍ଟିସ ଅହସାନୁଦ୍ଦିନ ଅମାନୁଲ୍ଲା କହିଛନ୍ତି ମହିଳା ଜଣକ ତାଙ୍କ ଅନୈତିକ ସମ୍ପର୍କ ଜାରି ରଖିବା ପାଇଁଶିଶୁମାନଙ୍କୁ ହତ୍ୟା କରିବାକୁ ଚେଷ୍ଟା କରିନାହାଁନ୍ତି। ବରଂ ନିଜ ପ୍ରେମିକ ସହିତ ଝଗଡା ଯୋଗୁ ସେ ନିରାଶ ହୋଇ ଏଭଳି କରିଛନ୍ତି। ବେଞ୍ଚ କହିଛନ୍ତି ସମାଜକୁ ସଦାଚାର, ନୈତିକତା ଶିକ୍ଷା ଦେବା ଅବା ଏହାର ପ୍ରଚାର କରିବା କୋର୍ଟଙ୍କର କାମ ନୁହେଁ। ଆମେ ଏହି ପ୍ରସଙ୍ଗରେ ଆଉ କିଛି କହିବୁ ନାହିଁ।
ସର୍ବୋଚ୍ଚ ଅଦାଲତ କହିଛନ୍ତି ଏହି ମାମଲା ଏକ ନିର୍ଦ୍ଦୟ ଅପରାଧ ଭାବରେ ବର୍ଗୀକୃତ ହୋଇପାରିବ ନାହିଁ କାରଣ ମହିଳା ଜଣକ ନିଜ ଜୀବନକୁ ଶେଷ କରିବାକୁ ଚେଷ୍ଟା କରୁଥିଲେ କିନ୍ତୁ ଠିକ ସମୟରେ ତାଙ୍କ ଝିଆରି ତାଙ୍କୁ ଅଟକାଇ ଥିଲେ। ଶୀର୍ଷ ଅଦାଲତ କହିଛନ୍ତି ମହିଳାଙ୍କୁ ସମୟ ପୂର୍ବରୁ ମୁକ୍ତ କରିବା ପାଇଁ ରାଜ୍ୟ ସ୍ତରୀୟ କମିଟି ପାଖରେ ସୁପାରିଶକୁ ଗ୍ରହଣ ନ କରିବା ପାଇଁ କୌଣସି ବୈଧ କାରଣ ନାହିଁ।