ଭୁବନେଶ୍ୱର,୨୧ା୯(ବ୍ୟୁରୋ): ପୁରୀ ଶ୍ରୀମନ୍ଦିର ପରିକ୍ରମା ପ୍ରକଳ୍ପ, ଭୁବନେଶ୍ୱର ଏକାମ୍ର ପ୍ରକଳ୍ପ ଏବଂ କୋଣାର୍କ ପ୍ରକଳ୍ପ ପାଇଁ ଜାତୀୟ ଐତିହ୍ୟ କର୍ତ୍ତୃପକ୍ଷ (ଏନ୍ଏମ୍ଏ) ନୋ ଅବ୍ଜେକ୍ସନ ସାର୍ଟିଫିକେଟ (ଏନ୍ଓସି) ଦେଇଛନ୍ତି। କେନ୍ଦ୍ର ସଂସ୍କୃତି ମନ୍ତ୍ରଣାଳୟ ପକ୍ଷରୁ ଏ ନେଇ ରାଜ୍ୟ ସଂସ୍କୃତି ବିଭାଗକୁ ଅବଗତ କରାଯାଇଛି। ପ୍ରତିବନ୍ଧିତ ଅଞ୍ଚଳରେ ହେଉଥିବା ନିର୍ମାଣ କାର୍ଯ୍ୟକୁ ଅନୁମତି ଦିଆଯାଇଛି। ଏନ୍ଏମ୍ଏ କଟକଣା ରହିଥିବାରୁ ଉକ୍ତ ଅଞ୍ଚଳରେ ବିକାଶ କାର୍ଯ୍ୟ ତ୍ୱରାନ୍ବିତ କରାଯାଇପାରୁ ନ ଥିଲା। ଏହି କଟକଣାକୁ ହଟାଇବା ପାଇଁ ଓଡ଼ିଶା ବ୍ରିଜ୍ ଆଣ୍ଡ କନ୍ଷ୍ଟ୍ରକ୍ସନ କର୍ପୋରେଶନ (ଓବିସିସି) ପକ୍ଷରୁ ଏନ୍ଏମ୍ଏ ନିକଟରେ ଏକ ସଂଶୋଧିତ ସମ୍ପୂର୍ଣ୍ଣ ପ୍ରକଳ୍ପ ରିପୋର୍ଟ (ଡିପିଆର) ଦାଖଲ କରାଯାଇଥିଲା। ଏହାକୁ ତର୍ଜମା କରାଯିବା ପରେ ଏନ୍ଏମ୍ଏ ପକ୍ଷରୁ ଏନ୍ଓସି ପ୍ରଦାନ କରାଯାଇଛି। ଶ୍ରୀମନ୍ଦିର ପରିକ୍ରମା ପ୍ରକଳ୍ପରେ ନିର୍ମାଣ ହେଉଥିବା କ୍ଲକ୍ ରୁମ୍, ମିନି କ୍ଲକ୍ ରୁମ୍, ସେଲ୍ଟର ପାଭେଲିୟନ, ମହିଳା ଟଏଲେଟ, ସେବାୟତ ଟଏଲେଟ, ଇଲେକ୍ଟ୍ରିକାଲ ରୁମ, କିଓସ୍କୋ, ପୋଲିସ ସର୍ଭିସ ସେଣ୍ଟର, ଫାଷ୍ଟ ଏଡ୍ ସେଣ୍ଟର, ଏଟିଏମ୍ ଇତ୍ୟାଦି ନିର୍ମାଣ କ୍ଷେତ୍ରରେ ରହିଥିବା ବାଧା ଦୂର ହୋଇଛି। ସେହିପରି ଏକାମ୍ର ପ୍ରକଳ୍ପ ପାଇଁ ଲିଙ୍ଗରାଜ ମଲ୍ଟିମୋଡାଲ ହବ୍, କେଦାରଗୌରୀ ପାକିର୍ଂ, ଲିଙ୍ଗରାଜ ଏଣ୍ଟ୍ରାନ୍ସ ପ୍ଲାଜା, ହେରିଟେଜ ପାର୍କ, କେଦାରଗୌରୀ ପ୍ଲାଜା, ଅନନ୍ତ ବାସୁଦେବ ପ୍ଲାଜା ଓ ଅନ୍ୟାନ୍ୟ ନିର୍ମାଣ କାର୍ଯ୍ୟ କରିବାକୁ ଏନ୍ଏମ୍ଏ ଏନଓସି ଦେଇଛନ୍ତି। ସେହିପରି କୋଣାର୍କ ପ୍ରକଳ୍ପ ପାଇଁ ମଧ୍ୟ ଏନ୍ଓସି ଦେଇଛନ୍ତି।
ବିଜ୍ଞାନ ଓ ପ୍ରଯୁକ୍ତିବିଦ୍ୟା ମନ୍ତ୍ରୀ ତଥା ଏକାମ୍ର ବିଧାୟକ ଅଶୋକ ଚନ୍ଦ୍ର ପଣ୍ଡା କହିଛନ୍ତି ଯେ ମହାପ୍ରଭୁ ଶ୍ରୀଜଗନ୍ନାଥ, ମହାପ୍ରଭୁ ଶ୍ରୀଲିଙ୍ଗରାଜଙ୍କ ଆଶୀର୍ବାଦ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅକ୍ଳାନ୍ତ ଉଦ୍ୟମ ଯୋଗୁ ଆଜି ଏହା ସମ୍ଭବ ହୋଇଛି। ଏଥିସହିତ ମୁଖ୍ୟ ଶାସନ ସଚିବ, ୫-ଟି ସଚିବ, ପୂର୍ତ୍ତ ସଚିବ, ନୂଆଦିଲ୍ଲୀସ୍ଥିତ ଆବାସିକ କମିଶନର ମଧ୍ୟ ଏ ଦିଗରେ ଅନେକ ଉଦ୍ୟମ କରିଛନ୍ତି। ଏନ୍ଓସି ଦେଇଥିବାରୁ ସ୍ଥାନୀୟ ବିଧାୟକ ଭାବେ ସେ ଏଥିପାଇଁ ଏନ୍ଏମ୍ଏକୁ ଧନ୍ୟବାଦ ଦେଇଛନ୍ତି।