ଭୁବନେଶ୍ୱର,୧୬।୭(ବନ୍ଦନା ସେଠୀ)ରାଜ୍ୟ ରାଜଧାନୀରେ ଶନିବାର ଦିନସାରା ବର୍ଷା ଛେଚିଛି। ଫଳରେ ଏହି ଲଗାଣ ବର୍ଷା ଯୋଗୁ ବେହାଲ ହୋଇଛି ସ୍ମାର୍ଟସିଟିର ସ୍ମାର୍ଟ ବ୍ୟବସ୍ଥା। ରାସ୍ତାଘାଟ, ନାଳ ସବୁ ଏକାକାର। ଆଣ୍ଠୁଏ ଉଚ୍ଚର ପାଣିରେ ପଶି ଯାତାୟାତ କଲେ ଲୋକେ। ବିଭିନ୍ନ ଅଞ୍ଚଳରେ ଜଳବନ୍ଦୀ ସ୍ଥିତି ଉପୁଜିବା ସହ ନାହିଁ ନଥିବା ସମସ୍ୟାର ସମ୍ମୁଖୀନ ହୋଇଛନ୍ତି ଲୋକେ। ବର୍ଷର ପ୍ରଥମ ଲଗାଣ ବର୍ଷାରେ ସ୍ଥିତି ଏପରି ହୋଇଥିବାବେଳେ ଆଗକୁ ବର୍ଷା ହେଲେ ସହରର ଅବସ୍ଥା କ’ଣ ହେବ ତାକୁ ନେଇ ଚିନ୍ତିତ ଜନସାଧାରଣ। ବଙ୍ଗୋପସାଗରରେ ଘୂର୍ଣ୍ଣିବଳୟ ସୃଷ୍ଟି ହେବା ଫଳରେ ରାଜ୍ୟର ସବୁଆଡ଼େ ବର୍ଷା ହୋଇଥିଲା। ସକାଳୁ ହିଁ ଭୁବନେଶ୍ୱରରେ ପ୍ରବଳ ମାତ୍ରାରେ ବର୍ଷା ହୋଇଥିଲା। ଏହାପରେ ଦିନତମାମ ଝିପିଝିପି ବର୍ଷା ଲାଗିରହିଥିଲା। ଭୁବନେଶ୍ୱରରେ ୪୬.୪ମିମି ବର୍ଷା ରେକର୍ଡ ହୋଇଥିବାବେଳେ ପ୍ରଥମ ଅବସ୍ଥାରୁ ସହରର ଜଳବନ୍ଦୀ ସ୍ଥିତି ବିଏମ୍ସିର ପାରିବାପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଥିଲା।
ପୁରୁଣା ଭୁବନେଶ୍ୱରର ରଥରୋଡ୍ରେ ଏତେ ପାଣି ଜମିଥିଲା ଯେ ତାହା ନଦୀର ଭ୍ରମ ସୃଷ୍ଟି କରୁଥିଲା। ଏହି ସମୟରେ ଏକ ଅଟୋ ଯାତ୍ରୀଙ୍କୁ ନେଇ ଯାଉଥିବାବେଳେ ସେଥିରେ ପାଣି ପଶିଯିବାରୁ ଗାଡ଼ି ଷ୍ଟାର୍ଟ ବନ୍ଦ ହୋଇଯାଇଥିଲା। ପରେ ସ୍ଥାନୀୟ ଲୋକମାନେ ଠେଲିଠେଲି ଅଟୋକୁ ପାଣିରୁ ବାହାର କରିଥିଲେ। ବର୍ଷାଜଳ ସାଙ୍ଗକୁ ଖରାପ ରାସ୍ତା ଲୋକଙ୍କ ଦୁର୍ଦ୍ଦଶାକୁ ଦ୍ୱିଗୁଣିତ କରିଥିଲା। କେବଳ ସେତିକି ନୁହେଁ, ସହରର ଅନ୍ୟତମ ପ୍ରମୁଖ ସ୍ଥାନ କୁହାଯାଉଥିବା କମିଶନରେଟ୍ ପୋଲିସ ମୁଖ୍ୟାଳୟ ସମ୍ମୁଖରେ ମଧ୍ୟ ଆଣ୍ଠୁଏ ଉଚ୍ଚର ପାଣି ଜମା ହୋଇଥିଲା। ବଡ଼ କଥା ହେଉଛି ସେଠାରେ ବର୍ଷା ପାଣି ଡ୍ରେନ୍କୁ ନ ଯାଇ ଓଲଟି ଡ୍ରେନ୍ ପାଣି ରାସ୍ତା ଉପରକୁ ଉଛୁଳୁଥିଲା। ଯେଉଁ କାରଣରୁ ଲୋକମାନେ ଯାତାୟାତ କରିବାରେ ଅସୁବିଧାର ସମ୍ମୁଖୀନ ହୋଇଥିଲେ। ସେହିପରି ରସୁଲଗଡ଼, ବମିଖାଲ ରାସ୍ତାର ଅବସ୍ଥା ମଧ୍ୟ ସମାନ। ଡ୍ରେନେଜ୍ ସମସ୍ୟାର ସ୍ଥାୟୀ ସମାଧାନ ହେଉ ନ ଥିବାରୁ ବର୍ଷା ସମୟ ଆସିଲେ ରାଜଧାନୀବାସୀ ଏଭଳି ଅସୁବିଧା ଭୋଗୁଛନ୍ତି। ଚିରାଚରିତ ଭାବେ ଇସ୍କନ ମନ୍ଦିର ସମ୍ମୁଖରେ ମଧ୍ୟ ବର୍ଷା ପାଣି ଲହଡ଼ି ଭାଙ୍ଗିଥିଲା। ସକାଳୁ ଆରମ୍ଭ ହୋଇଥିବା ବର୍ଷାରେ ୧୬ନଂ. ଜାତୀୟ ରାଜପଥର ସର୍ଭିସ ରୋଡ୍ରେ ବର୍ଷାପାଣି ଜମା ହୋଇଥିଲା। ମନ୍ଦିର ନିକଟରେ ଥିବା କାର୍ ଅଧା ବୁଡ଼ିଯାଉଥିବାବେଳେ ବାଇକ୍ର ଅବସ୍ଥା ନ କହିବା ଭଲ। କେବଳ ରାସ୍ତାଘାଟ ନୁହେଁ ଲକ୍ଷ୍ମୀସାଗର ମଣ୍ଡପ ସାହିରେ ଡ୍ରେନ୍ ଭର୍ତ୍ତି ହୋଇଯିବା ପରେ ସକାଳୁ ସକାଳୁ ଲୋକଙ୍କ ଘରେ ପାଣି ପଶିଥିଲା। ପାଣି ପଶିଯିବାରୁ ଘରର ଆସବାବପତ୍ର ଓଦା ହୋଇଯାଇଥିଲା। ଲୋକମାନେ ଗିନା ତାଟିଆ ଧରି ଘରୁ ପାଣି ବାହାର କରୁଥିବା ଦେଖିବାକୁ ମିଳିଥିଲା। ପରେ ଅଗ୍ନିଶମ ବାହିନୀ ଆସି ଜଳ ନିଷ୍କାସନ କରିବା ପରେ ସ୍ଥିତି ଟିକିଏ ସୁଧୁରିଥିଲା। କେବଳ ଏହି ଗୋଟିଏ ଅଞ୍ଚଳ ନୁହେଁ ପାଣ୍ଡବ ନଗର, ବଡ଼ଗଡ଼ ବ୍ରିଟ୍ କଲୋନୀ, ମେଘେଶ୍ୱର କଲୋନୀ, ବଡ଼ଗଡ଼ ଇଏ କଲୋନୀ, ସୌଭାଗ୍ୟ ନଗର, ଶିରିପୁର, ମହିଷାଖାଲ ଭଳି ବିଭିନ୍ନ ଅଞ୍ଚଳରେ ଜଳବନ୍ଦୀ ସ୍ଥିତି ସୃଷ୍ଟି ହେବାରୁ ବିଭିନ୍ନ ସମସ୍ୟା ଦେଖାଦେଇଥିଲା।