ପାରଳାଖେମୁଣ୍ଡି,୨୬ା୯(ଡି.ଏନ୍.ଏ.): ସମ୍ଭାବ୍ୟ ବାତ୍ୟା ‘ଗୁଲାବ’ ଗଜପତି ଜିଲାରେ ଅଧିକ ପ୍ରଭାବ ପକାଇବ ବୋଲି ପାଣିପାଗ ବିଭାଗ ପକ୍ଷରୁ ସୂଚନା ଜାରି କରାଯାଇଛି। ତେବେ ଆଜି ସକାଳୁ କୋହଲା ପାଗ ସହ ଝିପି ଝିପି ବର୍ଷା ହେଉଛି। ପବନର ବେଗ ମଧ୍ୟ ବଢ଼ିବାରେ ଲାଗିଛି। ରାସ୍ତାଘାଟ ଶୂନ୍ଶାନ ହୋଇପଡ଼ିଥିବା ବେଳେ ମୁକାବିଲା ପାଇଁ ପ୍ରସ୍ତୁତ ରହିଛି ଗଜପତି ଜିଲା ପ୍ରଶାସନ। ପ୍ରଶାସନ ପକ୍ଷରୁ ଗତକାଲିଠାରୁ ସମସ୍ତ ପ୍ରକାର ପ୍ରସ୍ତୁତି କରାଯାଇଛି।
ଓଡ୍ରାଫର ଏକ ୩୦ ଜଣିଆ ଟିମ୍ ପାରଳାଖେମୁଣ୍ଡି ସଦର ମହକୁମାରେ ପହଞ୍ଚିଛନ୍ତି। ଅନ୍ୟ ଏକ ଟିମ୍ ଏନ୍ଡିଆରଏଫ୍ର ଅନ୍ୟ ଗୋଟେ ଟିମ୍ ଗୁମ୍ମା ବ୍ଲକରେ ପହଞ୍ଚିଛନ୍ତି। ଓଡ୍ରାଫ ଟିମ୍ ବର୍ତ୍ତମାନ ପାରଳାଖେମୁଣ୍ଡିରେ ପହଞ୍ଚି ବେତଗୁଡ଼ାଠାରେ ସଜାଗ ହୋଇ ରହିଛନ୍ତି। ଏନ୍ଡିଆର୍ଏଫ୍ର ଗୋଟିଏ ଟିମ୍ ଗୋସାଣି ବ୍ଲକରେ ପହଞ୍ଚିଛନ୍ତି।
ପୂର୍ବାହ୍ନ ୧୧ଟା ସୁଦ୍ଧା ୧୭୩୭ ଜଣଙ୍କୁ ସ୍ଥାନାନ୍ତର କରାଯାଇଛି। ସେଥି ମଧ୍ୟରେ ଗୋସାଣି ବ୍ଲକର ତିନୋଟି ଗ୍ରାମରୁ ୪୦ ଜଣଙ୍କୁ ସ୍ଥାନାନ୍ତର କରାଯାଇଥିବା ବେଳେ ଗୁମ୍ମା ବ୍ଲକର ୩ଟି ଗ୍ରାମରୁ ୧୮୫ ଜଣଙ୍କୁ ସ୍ଥାନାନ୍ତର କରାଯାଇଛି। କାଶୀନାଗର ବ୍ଲକର ତିନୋଟି ଗ୍ରାମରୁ ୯୦ ଜଣଙ୍କୁ ସ୍ଥାନାନ୍ତର କରାଯାଇଛି। ସେହିପରି ମୋହନା ବ୍ଲକର ୯ଟି ଗ୍ରାମରୁ ୩୫୭ ଜଣ, ନୂଆଗଡ଼ର ୪ଟି ଗ୍ରାମରୁ ୯୩ ଜଣ, ରାୟଗଡ଼ ବ୍ଲକର ୧୪ଟି ଗ୍ରାମରୁ ୮୪୦ ଜଣ, ଉଦୟଗିରି ବ୍ଲକର ଦୁଇଟି ଗ୍ରାମରୁ ୩୨ ଜଣଙ୍କୁ ସ୍ଥାନାନ୍ତର କରାଯାଇଛି।