ଭଦ୍ରକ,୮ା୧୨(ସନାତନ ରାଉତ): ଭଦ୍ରକ ସହର ମଦିନା ମଇଦାନରେ ଶୁକ୍ରବାର ସନ୍ଧ୍ୟାରେ ଏକ ପ୍ରତିବାଦ ସଭା ହେବାକୁ ଥିଲା। ଏହି ସଭାରେ ଆଇନ ଶୃଙ୍ଖଳା ପରିସ୍ଥିତି ଆଶଙ୍କା ନେଇ ପ୍ରଶାସନ ପକ୍ଷରୁ ଶୁକ୍ରବାର ପୂର୍ବାହ୍ନ ୧୧ଟାରୁ ଶନିବାର ସକାଳ ୬ଟା ପର୍ଯ୍ୟନ୍ତ ୧୪୪ ଧାରା ଜାରି କରିବାକୁ ପୁରୁଣାବଜାର ପୋଲିସକୁ ଉପଜିଲାପାଳ ମନୋଜ ପାତ୍ର ନିର୍ଦ୍ଦେଶ ଦେଇଛନ୍ତି।
ମୁସଲିମ ବସ୍ତିର ସମସ୍ତ ସର୍ଦ୍ଦାରମାନଙ୍କୁ ନେଇ ପ୍ରତିବାଦ ସଭା କରିବାକୁ ପୁରୁଣାବଜାରର ସବୀର ଖାଁ ପୁରୁଣାବଜାର ଥାନାରେ ଆବେଦନ କରିଥିଲେ। ପ୍ରତିବାଦ ସଭାକୁ ନେଇ ଆଇନଶୃଙ୍ଖଳା ପରିସ୍ଥିତି ଉପୁଜିବା ସମ୍ଭାବନା ନେଇ ମୁସଲିମ ଜମାତ ଓ କେତେକଙ୍କ ଅଭିଯୋଗ ପରେ ମଦିନା ମଇଦାନ ଓ ଆଖପାଖ ୨୦୦ ମିଟର ପରିସରରେ ୧୪୪ ଧାରା ଜାରି କରାଯାଇଛି ବୋଲି ସିଟି ଡିଏସ୍ପି ଅଂଶୁମାନ ଦ୍ୱିବେଦୀ ସୂଚନା ଦେଇଛନ୍ତି। ନିୟମ ଉଲ୍ଲଙ୍ଘନ କଲେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପୁରୁଣାବଜାର ପୋଲିସକୁ ଉପଜିଲାପାଳ ନିର୍ଦ୍ଦେଶ ଦେଇଛନ୍ତି। ପୋଲିସ ପକ୍ଷରୁ ମାଇକ୍ ଯୋଗେ ଘୋଷଣା କରାଯାଇଛି।