ଚିତ୍ରକୋଣ୍ଡା,୨୭ା୭(କ୍ଷୀରୋଦ ବେହେରା): ଆନ୍ଧ୍ର – ଓଡ଼ିଶା ସୀମାନ୍ତ ଆଦିବାସୀ ଅଧ୍ୟୁଷିତ ମାଲକାନଗିରି ଜିଲା ଚିତ୍ରକୋଣ୍ଡା ବ୍ଲ୍ଳକରେ ରହିଛି ଚିତ୍ରକୋଣ୍ଡା ଉପଖଣ୍ଡ ଚିକିତ୍ସାଳୟ। ଉକ୍ତ ଚିକିତ୍ସାଳୟ ଉପରେ ବ୍ଲକର ୧୮ଟି ପଞ୍ଚାୟତର ଲୋକେ ନିର୍ଭର କରନ୍ତି। ୧୯୬୨ରେ ବାଲିମେଳା ମାଟିବନ୍ଧ ଯୋଜନା ଆରମ୍ଭ ପରେ ସେଥିରେ କାମ କରୁଥିବା କର୍ମଚାରୀ ଏବଂ ସ୍ଥାନୀୟ ଅଞ୍ଚଳର ଲୋକଙ୍କୁ ସ୍ବାସ୍ଥ୍ୟସେବା ଯୋଗାଇ ଦେବା ଲକ୍ଷ୍ୟ ନେଇ କୁ ଗଢ଼ି ଉଠିଥିଲା ୨୦୦୯ରେ ଏହା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମାନ୍ୟତା ଏବଂ ୨୦୧୬-୧୭ରେ ଉପଖଣ୍ଡ ଚିକିତ୍ସାଳୟର ମାନ୍ୟତା ପାଇଥିଲା l ମାତ୍ର ଉପଖଣ୍ଡ ଚିକିତ୍ସାଳୟ ହେବା ପରେ ଏହାର ଯେପରି ଉନ୍ନତି ହେବା କଥା ସେପରି ହୋଇନାହିଁ। ମେଡିକାଲ ଗୃହରୁ ଦୀର୍ଘ ବର୍ଷ ହେଲା ପାଣି ଗଳୁଛି। ଏଥିଯୋଗୁ ରୋଗୀ ସେବାରେ ବାଧା ଉପୁଜୁଛି। ଚିକିତ୍ସାଳୟର ନୂତନ ଗୃହ ନିର୍ମାଣ ଲାଗି ୩ବର୍ଷ ହେଲା କମାରଗୁଡ଼ା ନିକଟରେ ୧୫ ଏକର ଜମି ଚି଼ହ୍ନଟ ହୋଇ ଅଧିଗ୍ରହଣ ହୋଇଥିଲେ ମଧ୍ୟ ଚିକିତ୍ସାଳୟର ୧୦୦ ଶଯ୍ୟା ବିଶିଷ୍ଟ ନୂତନ ଗୃହ ନିର୍ମାଣ ହୋଇପାରିନାହିଁ। ଗୃହ ନିର୍ମାଣ ବିଳମ୍ବ ସମ୍ପର୍କରେ ମାଲକାନଗିରି ସିଡିଏମ୍ଓ ପ୍ରଫୁଲ୍ଲ ନନ୍ଦଙ୍କୁ ପଚାରିବାରୁ ସେ କହିଲେ, ଜମି ଅଧିଗ୍ରହଣ ପରେ ଟେଣ୍ଡର ପ୍ରୋସେସ ହୋଇଥିଲା। କ’ଣ ପାଇଁ ଅଟକିଛି ଆମେ ମୁଖ୍ୟଯନ୍ତ୍ରୀଙ୍କ ସହ ଆଲୋଚନା କରିବୁ। ବର୍ଷାଦିନ ପରେ ଚିକିତ୍ସାଳୟର ନୂତନ ଗୃହ ନିର୍ମାଣ କାମ ଆରମ୍ଭ ହେବା ନେଇ ବ୍ୟବସ୍ଥା କରାଯିବ ବୋଲି ନନ୍ଦ କହିଥିଲେ। ଏ ସମ୍ପର୍କରେ ନବରଙ୍ଗପୁର ଏମ୍ପି ରମେଶ ଚନ୍ଦ୍ର ମାଝୀଙ୍କୁ ପଚାରିବାରୁ ସେ କହିଲେ, ଚିକିତ୍ସାଳୟର ନୂତନ ଗୃହ ନିର୍ମାଣ ନେଇ ସେ ସିଡିଏମଓ, ଜିଲାପାଳ ଏବଂ ମୁଖ୍ୟଯନ୍ତ୍ରୀଙ୍କ ସହ ଆଲୋଚନାକରି ଏହାର ନିର୍ମାଣ ଦିଗରେ ପଦକ୍ଷେପ ନେବେ ବୋଲି କହିଥିଲେ।