କାଏମା,୧୪।୧୧(ଶିବପ୍ରସାଦ ମହାନ୍ତି): ଯାଜପୁର ଜିଲା ଧର୍ମଶାଳା ବ୍ଲକ ଅଧୀନ ପାଟପୁର ପଞ୍ଚାୟତରେ ଥିବା ବହୁ ପୁରାତନ ଶ୍ରୀ ସିଦ୍ଧ ବଳଦେବଜୀଉ ମନ୍ଦିରରୁ ଅଷ୍ଟଧାତୁ ମୂର୍ତ୍ତି ଚୋରି ଘଟଣାକୁ ଇତିମଧ୍ୟରେ ୧ ବର୍ଷ ବିତିଛି। ହେଲେ ଆଜି ପର୍ଯ୍ୟନ୍ତ ଯାଜପୁର ପୋଲିସ ମୂର୍ତ୍ତି ଚୋରି ସମ୍ପର୍କରେ କୌଣସି ସୁରାକ ପାଇନାହିଁ। ଗତ କିଛିଦିନ ତଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ହସ୍ତକ୍ଷେପ ପରେ ପ୍ରାୟ ୨ ବର୍ଷ ୧୦ ମାସ ପରେ ଚୋରି ହୋଇଥିବା ଦର୍ପଣଗଡ଼ ଅଞ୍ଚଳର ଆରାଧ୍ୟ ଦେବୀ ମା’କୋଟ୍ରାକ୍ଷୀଦେବୀଙ୍କ ମୂର୍ତ୍ତି ଉଦ୍ଧାର ହୋଇଛି। ଏହି ଘଟଣା ପରେ ବଳଦେବଜୀଉଙ୍କ ଚୋରି ହୋଇଥିବା ମୂର୍ତ୍ତି ଉଦ୍ଧାର ନିମନ୍ତେ ଦାବି ଜୋର ଧରିଛି। ତଦନ୍ତ ଦାୟିତ୍ୱରେ ଥିବା ପୋଲିସ ଅଧିକାରୀଙ୍କ ବଦଳି ପରେ ଏହି ଫାଇଲ୍ ଆଉ ଖୋଲିନାହିଁ। ଏ ସଂକ୍ରାନ୍ତରେ ତୁରନ୍ତ ପଦକ୍ଷେପ ନେବାକୁ ଦାବି ଜୋର ଧରିଛି।
ସୂଚନା ଅନୁଯାୟୀ, ଗତବର୍ଷ ନଭେମ୍ବର ୧୧ ବିଳମ୍ବିତ ରାତିରେ କେତେଜଣ ଦୁର୍ବୃତ୍ତ ଏହି ବିରଳ ଅଷ୍ଟଧାତୁ ମୂର୍ତ୍ତିକୁ ମନ୍ଦିର କବାଟ ଭାଙ୍ଗି ଚୋରି କରି ନେଇଥିଲେ । ଏସମ୍ପର୍କରେ ଟ୍ରଷ୍ଟି ବିନୋଦ କୁମାର ଦାଶ ସେହି ମାସ ୧୨ ତାରିଖରେ ଧର୍ମଶାଳା ଥାନାରେ ଏତଲା ଦେଇଥିଲେ। ପୋଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା। ଘଟଣା ଦିନ ଯାଜପୁର ଜିଲା ଆରକ୍ଷୀ ଅଧୀକ୍ଷକ ରାହୁଲ ପି.ଆର. ଘଟଣାସ୍ଥଳ ପରିଦର୍ଶନ କରିଥିଲେ। ସାଇଣ୍ଟିଫିକ୍ ଟିମ୍ ସହ ସନ୍ଧାନୀ କୁକୁରର ସହାୟତା ନିଆଯାଇଥିଲା । ଅଗଷ୍ଟରେ ମନ୍ଦିରର ଟ୍ରଷ୍ଟି ୫-ଟି ଅଧ୍ୟକ୍ଷ ଭି. କେ. ପାଣ୍ଡିଆନଙ୍କୁ ତାଙ୍କର ଧର୍ମଶାଳା ଗସ୍ତ ସମୟରେ ମୂର୍ତ୍ତି ଚୋରି ତଦନ୍ତକୁ ତ୍ୱରାନ୍ବିତ କରିବା ତଥା ବଳଦେବଜୀଉ ମନ୍ଦିରର ଉନ୍ନତିକରଣ ନିମନ୍ତେ ୨ଟି ଚିଠି ଲେଖି ସହାୟତା ଲୋଡିଥିଲେ। ମନ୍ଦିରର ଉନ୍ନତିକରଣ ନିମନ୍ତେ ମୁଖ୍ୟମନ୍ତ୍ରୀ ସ୍ବତନ୍ତ୍ର ସହାୟତା ପାଣ୍ଠିରୁ ୧୦ ଲକ୍ଷ ଟଙ୍କା ମଞ୍ଜୁର କରାଯାଇଛି। ଟ୍ରଷ୍ଟି ବିନୋଦ କୁମାର ଦାଶ ଘଟଣା ସମ୍ପର୍କରେ ଦେବୋତ୍ତର କମିଶନରଙ୍କୁ ବାରମ୍ବାର ଭେଟି ଏବଂ ଚିଠି ଲେଖି ଦୃଷ୍ଟି ଆକର୍ଷଣ କରିବା ସହ ତାଙ୍କର ସହାୟତା ଲୋଡିଥିଲେ । ଦେବୋତ୍ତର କମିଶନର ଇତିମଧ୍ୟରେ ଯାଜପୁର ଜିଲା ଏସ୍ପି ଏବଂ ଆସିଷ୍ଟାଣ୍ଟ କମିଶନରଙ୍କୁ ଚିଠି ଲେଖି ଘଟଣାର ତଦନ୍ତ ପ୍ରକିୟାକୁ ଆହୁରି ସକ୍ରିୟ କରିବା ସହ ଚୋରି ହୋଇଥିବା ବିରଳ ମୂର୍ତ୍ତି ଉଦ୍ଧାର ପାଇଁ ନିର୍ଦ୍ଦେଶ ଦେଇଥିଲେ। ଗତ ସେପ୍ଟେମ୍ବର ୨୭ରେ ଟ୍ରଷ୍ଟିଙ୍କ କ୍ରମାଗତ ଅନୁରୋଧ କ୍ରମେ ଦେବୋତ୍ତର କମିଶନର ସେଣ୍ଟ୍ରାଲ ଡିଆଇଜିଙ୍କୁ ଏକ ଚିଠି ଲେଖି ଯାଜପୁର ଏସ୍ପିଙ୍କୁ ତଦନ୍ତ ପ୍ରକ୍ରିୟାରେ ଧ୍ୟାନକେନ୍ଦ୍ରିତ କରି ତୁରନ୍ତ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି।
ଇତିମଧ୍ୟରେ ଗତ ମାର୍ଚ୍ଚ ୩ ରେ ଯାଜପୁର ଏସ୍ପି ବିନୀତ ଅଗ୍ରୱାଲ ଏକ ସ୍ବତନ୍ତ୍ର ସ୍କ୍ବାର୍ଡ ଗଠନ କରି ୪ ଜଣ ଅପରାଧୀଙ୍କୁ ଗିରଫ କରିବା ସହ ୩୧ଟି ବହୁମୂଲ୍ୟବାନ ଅଷ୍ଟଧାତୁ ମୂର୍ତ୍ତି ଉଦ୍ଧାର କରିବାରେ ସଫଳ ହୋଇଥିଲେ। ହେଲେ ସିଦ୍ଧ ବଳଦେବଜୀଉଙ୍କ ଅଷ୍ଟଧାତୁ ମୂର୍ତ୍ତି ଉଦ୍ଧାର କରାଯାଇପାରିନାହିଁ। ମନ୍ଦିରର ଟ୍ରଷ୍ଟି ଇତିମଧ୍ୟରେ ପ୍ରତ୍ନତତ୍ତ୍ୱ ବିଭାଗର ଡିଜି ଏବଂ ଆଇଜି ,ସିବିଆଇ ଡିଜି ଏବଂ ଆଇଜି ,ତାମିଲନାଡୁ ଆଇଡ଼ଲ ଉଇଙ୍ଗ ସିଆଇଡିର ଡିଜି, ଆଇଜି, କ୍ରାଇମବ୍ରାଞ୍ଚର ଡିଜି ଏବଂ ଆଇଜି ଏବଂ ସର୍ବଭାରତୀୟସ୍ତରର ସମସ୍ତ କଷ୍ଟମ୍ଜୋନର ଡିଜି ଏବଂ ଆଇଜି ପ୍ରମୁଖଙ୍କୁ ଇମେଲ ଏବଂ ଫାକ୍ସ ଜରିଆରେ ଘଟଣା ସମ୍ପର୍କରେ ଅବଗତ କରିଛନ୍ତି।
