ଭୁବନେଶ୍ୱର,୧୩।୩: ଓଡିଶା ରାଜନୀତିର ଭାଗ୍ୟ ଝୁଲୁଛି ଏବେ ଦିଲ୍ଲୀରେ। ମେଣ୍ଟ ହେଉଛି ନା ହେଉନି? ଏହା ଉପରେ ଏବେ ସମସ୍ତଙ୍କର ନଜର। କୁହାଯାଉଛି, ଆସନ ବୁଝାମଣା ସରିଛି ହେଲେ ସ୍ପଷ୍ଟତା ଆସିବାକୁ ଏତେ ବିଳମ୍ବ କାହିଁକି? ନା ଆସନ ଭାଗବଣ୍ଟାକୁ ନେଇ କେଁ ରହିଛି? ଯାହା ଚର୍ଚ୍ଚା ହେଉଛି ଦିଲ୍ଲୀରେ ଧର୍ମେନ୍ଦ୍ର ପ୍ରଧାନଙ୍କ ବାସଭବନରେ ତୁହାକୁ ତୁହା ବୈଠକ ବସିଛି। ହେଲେ ନିଷ୍କର୍ସ କଣ ବାହାରୁଛି କାହାକୁ ଜଣାନାହିଁ। ଯାହା ଖବର ଆସୁଛି ଯେ ଲୋକସଭା ଆସନକୁ ନେଇ ବୁଝାମଣା ସରିଛି। କିନ୍ତୁ ବିଧାନସଭା ଆସନ କ୍ଷେତ୍ରରେ ଅଙ୍କ ଛିଡୁନି।
ଗତକାଲି ଠୁ ଦୁଇଟି ଦିଗର ଫିଗର ଉପରେ ଚର୍ଚ୍ଚା ହେଉଛି। ଗୋଟିଏ ହେଲା ୧୦୫-୪୨ ଆଉ ଏକ ହେଲା ୯୮-୪୯। ଏହି ଫିଗର ଉପରେ ରାଜଧାନୀ ଦିଲ୍ଲୀରେ ଭାଜପା ଶିବିରରେ ଓଡିଶା ମେଣ୍ଟକୁ ନେଇ କସରତ ଚାଲିଛି। ଭାଜପା ରାଷ୍ଟ୍ରୀୟ ସଭାପତି ଜେପି ନଡ୍ଡା, ଗୃହମନ୍ତ୍ରୀ ଅମିତ ଶାହା ଓ ଖୋଦ୍ ପ୍ରଧାନମନ୍ତ୍ରୀ ମଧ୍ୟ ଏହି ପ୍ରସଙ୍ଗରେ ଚାଲିଥିବା ଖବର ଉପରେ ନଜର ରଖିଛନ୍ତି। ଅନ୍ୟପଟେ ରାଜ୍ୟର ଶାସକ ଦଳ ବିଜେଡିର ଅସମ୍ଭବ ନିରବତାକୁ ନେଇ ଏହି ନୂଆ ମେଣ୍ଟ ଚର୍ଚ୍ଚାରେ ଟ୍ବିଷ୍ଟ ଆଣୁଛି। କୁହାଯାଉଛି ମେଣ୍ଟକୁ ନେଇ ବିଜେଡି ପକ୍ଷରୁ ଗ୍ରୀନ ସିଗନାଲ ଦିଆ ସରିଛି। ଏବେ ସବୁ ଭାଜପା ଉପରେ ନିର୍ଭର କରୁଛି। ଅର୍ଥାତ ମେଣ୍ଟର ଭାଗ୍ୟ ଏବେ ଅମିତ ଶାହା ଓ ନରେନ୍ଦ୍ର ମୋଦିଙ୍କ ନିକଟରେ ଝୁଲୁଛି।
ତେବେ ସବୁଠାରୁ ବଡ କଥା ହେଉଛି ମେଣ୍ଟ ପାଇଁ କଣ୍ଟା ସାଜିଛନ୍ତି ରାଜ୍ୟ ଭାଜପା ନେତୃତ୍ୱ। କୁହାଯାଉଛି କୁଆଡେ ରାଜ୍ୟ ଭାଜପା ନେତାମାନେ ବିଜେଡି ସହ ଭାଜପା ମେଣ୍ଟକୁ ନାପସନ୍ଦ କରୁଛନ୍ତି। ହେଲେ କେନ୍ଦ୍ରୀୟ ନେତୃତ୍ୱ ରାଜ୍ୟ ଭାଜପା ନେତାଙ୍କୁ ଏପ୍ରସଙ୍ଗରେ ବୁଝାଉଛନ୍ତି। ସେପଟେ ତୃଣମୂଳ ସ୍ତରରେ ଥିବା ନେତାମାନେ ମେଣ୍ଟକୁ ନେଇ ଦ୍ୱନ୍ଦରେ ପଡିଛନ୍ତି। ସେମାନେ ମେଣ୍ଟ ହେବା ନେଇ ଉପରସ୍ତ ନେତାଙ୍କ ଠୁ କୌଣସି ସୁରାକ ପାଇପାରୁ ନାହାନ୍ତି। କେବଳ ଗଣମାଧ୍ୟମରେ ଚର୍ଚ୍ଚା ଉପରେ ସେମାନେ ନଜର ରଖିଛନ୍ତି। ଏଭଳି ସ୍ଥିତିରେ ତୃଣମୂଳ ସ୍ତରରେ ଆଗାମୀ ନିର୍ବାଚନକୁ ନେଇ କ’ଣ ରଣନୀତି ପ୍ରସ୍ତୁତ କରିବେ ପୁରା ଦ୍ୱନ୍ଦରେ କର୍ମୀ ଓ ନେତା।
ଏସବୁ ଭିତରେ କଂଗ୍ରେସର ରଣନୀତି ଉପରେ ମଧ୍ୟ ସମସ୍ତଙ୍କର ନଜର ରହିଛି। ଯେତେବେଳେ ରାଜ୍ୟରେ ବିଜେଡି-ଭାଜପା ଭିତରେ ମେଣ୍ଟ ନେଇ ନୂଆ ସମ୍ଭାବନା ସୃଷ୍ଟି ହୋଇଛି। କଂଗ୍ରେସର କଣ ରଣନୀତି ରହିବ ସେନେଇ ସମସ୍ତଙ୍କ ମନରେ ଉତ୍ସୁକତା ବଢିଛି।