ହାଇଦ୍ରାବାଦ, ୨୬।୪:ତେଲଙ୍ଗାନାର ହାଇଦ୍ରାବାଦ ଲୋକ ସଭା ଆସନରୁ ଭାଜପା ଟିକେଟରେ ପ୍ରାର୍ଥୀ ହୋଇଥିବା କେ. ମାଧବୀଲତାଙ୍କର ୨୨୧ କୋଟି ଟଙ୍କାର ପାରିବାରିକ ସମ୍ପତ୍ତି ରହିଛି। ମାଧବୀ, ତାଙ୍କ ସ୍ବାମୀ କୋମ୍ପେଲା ବିଶ୍ୱନାଥ ଓ ତାଙ୍କର ୩ ସନ୍ତାନଙ୍କ ମୋଟ ୧୬୫.୪୬ କୋଟି ଟଙ୍କାର ଅସ୍ଥାବର ସମ୍ପତ୍ତି ଥିବାବେଳେ ୫୫.୯୧ କୋଟିର ସ୍ଥାବର ସମ୍ପତ୍ତି ରହିଛି। ୪୯ ବର୍ଷୀୟା ମାଧବୀଲତା ବୁଧବାର ନାମାଙ୍କନପତ୍ର ଦାଖଲ କରିବା ସମୟରେ ଦେଇଥିବା ସତ୍ୟପାଠରୁ ଏହା ଜଣାପଡ଼ିଛି। ମାଧବୀଲତା ରାଜନୀତି ବିଜ୍ଞାନରେ ସ୍ନାତକୋତ୍ତର ହାସଲ କରିଥିବାବେଳେ ତାଙ୍କ ବିରୋଧରେ କୌଣସି ଆପରାଧିକ ମାମଲା ନାହିଁ। ସେହିପରି ତାଙ୍କ ମୁଖ୍ୟ ପ୍ରତିଦ୍ୱନ୍ଦ୍ୱୀ ତଥା ଅଲ୍ ଇଣ୍ଡିଆ ମଜ୍ଲିସ ଇ ଇତ୍ତେହାଦୁଲ ମୁସ୍ଲିମିନ (ଏଆଇଏମ୍ଆଇଏମ୍) ମୁଖ୍ୟ ଅସଦୁଦ୍ଦିନଙ୍କର ଓଓ୍ବାଇସି ନିଜ ପାରିବାରିକ ସମ୍ପତ୍ତି ୨୩.୮ କୋଟି ଟଙ୍କା ବୋଲି ସତ୍ୟପାଠରେ ଦର୍ଶାଇଛନ୍ତି। ଆସନ୍ତା ୧୩ରେ ଚତୁର୍ଥ ପର୍ଯ୍ୟାୟ ଲୋକ ସଭା ନିର୍ବାଚନରେ ହାଇଦ୍ରାବାଦ ଆସନ ପାଇଁ ମତଦାନ ହେବ।