ଜୋହାନ୍ସବର୍ଗ,୫।୧: ଚଳିତ ନ୍ୟୁ ଇୟର ତଥା ଦ୍ୱିତୀୟ ଟେଷ୍ଟରେ ଦକ୍ଷିଣ ଆଫ୍ରିକା ଆଗରେ ୨୪୦ ରନ୍ର ଟାର୍ଗେଟ ଛିଡ଼ା କରିଛି ଭାରତୀୟ ଦଳ। ତେବେ ଓ୍ବାଣ୍ଡରର୍ସ ଷ୍ଟାଡିୟମରେ ଚାଲିଥିବା ମ୍ୟାଚ୍ରେ ଏତେ ବଡ଼ ବିଜୟ ଲକ୍ଷ୍ୟ ହାସଲ କରିବା ଘରୋଇ ଦଳ ପାଇଁ ସହଜ ହେବ ନାହିଁ। ଏହାର ମୁଖ୍ୟ କାରଣ ହେଉଛି ଓ୍ବାଣ୍ଡରର୍ସ ପିଚ୍ର ଅସମତଳ ବାଉନ୍ସ। ଏଭଳି ପରିସ୍ଥିତିରେ ଯଶପ୍ରୀତ ବୁମରା, ମହମ୍ମଦ ଶାମି, ମହମ୍ମଦ ସିରାଜ ଓ ଶାର୍ଦ୍ଦୁଳ ଠାକୁରଙ୍କୁ ଖେଳିବା କୌଣସି ବ୍ୟାଟରଙ୍କ ଲାଗି ସହଜ ହେବ ନାହିଁ। ତେବେ ରେକର୍ଡ ଦେଖିଲେ, କେବଳ ଥରେ ଦକ୍ଷିଣ ଆଫ୍ରିକା ୨୪୦ ରନ୍ର ଊର୍ଦ୍ଧ୍ୱ ବିଜୟ ଲକ୍ଷ୍ୟକୁ ପିଛା କରି ବିଜୟ ହାସଲ କରିଛି। ୨୦୦୧/୦୨ରେ ଅଷ୍ଟ୍ରେଲିଆ ବିପକ୍ଷରେ ଡର୍ବାନ ଦକ୍ଷିଣ ଆଫ୍ରିକା ୩୩୫ ରନ୍ର ପିଛା କରି ବିଜୟ ହାସଲ କରିଥିଲା। ଏହା ଛଡ଼ା ୯ ଥର ୨୦୦ରୁ ଅଧିକ ରନ୍ର ପିଛା କରି ବିଫଳ ହୋଇଥିବା ବେଳେ ଗୋଟିଏ ମ୍ୟାଚ୍ ଅମୀମାଂସିତ ରଖିବାକୁ ସକ୍ଷମ ହୋଇଛି।
ଓ୍ବାଣ୍ଡରର୍ସ ଗ୍ରାଉଣ୍ଡ ଇତିହାସରେ ମାତ୍ର ଦୁଇ ଥର ୨୪୦ରୁ ଅଧିକ ରନ୍ର ପିଛା କରୁଥିବା ଦଳ ବିଜୟୀ ହୋଇଛି। ୨୦୧୧/୧୨ରେ ଅଷ୍ଟ୍ରେଲିଆ ୩୧୦ ରନ୍ର ଟାର୍ଗେଟକୁ ଚେଜ କରିଥିଲା। ୨୦୦୫/୦୬ରେ ଅଷ୍ଟ୍ରେଲିଆ ୨୯୨ ରନ୍ର ବିଜୟ ଲକ୍ଷ୍ୟକୁ ପିଛା କରି ବିଜୟ ଲକ୍ଷ୍ୟକୁ ପିଛା ମ୍ୟାଚ୍ ଜିତିଥିଲା।
