ପିଥୋରଗଡ଼, ୨୩।୮: ଲଗାଣ ବର୍ଷା ଯୋଗୁ ଉତ୍ତରାଖଣ୍ଡରେ ସ୍ଥିତି ସଙ୍ଗୀନ ହୋଇଗଲାଣି। ବନ୍ୟା ଓ ଭୂସ୍ଖଳନ ଯୋଗୁ ଲୋକମାନେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ବିଶେଷ କରି ଯଦି କାହାର ସ୍ବାସ୍ଥ୍ୟବସ୍ଥା ଖରାପ ହୁଏ ତେବେ ହସ୍ପିଟାଲ ଯିବା କାଠିକର ପାଠ ହୋଇପଡ଼ୁଛି। ଦୁର୍ଗମ ଗ୍ରାମର ଅବସ୍ଥା ଆହୁରି ସଙ୍ଗୀନ। ଏଭଳି ଏକ ସମୟରେ ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ଏକ ଭିଡିଓ ଏବେ ଚର୍ଚ୍ଚାରେ ରହିଛି। ଜଣେ ଅସୁସ୍ଥ ମହିଳାଙ୍କୁ ଚିକିତ୍ସା ଯୋଗାଇଦେବା ପାଇଁ ଆଇଟିବିପି ଯବାନମାନେ ଦୁର୍ଗମ ରାସ୍ତାରେ ୧୪ ଘଣ୍ଟା ଚାଲି ୪୦ କିମି ଅତିକ୍ରମ କରିଛନ୍ତି।
Men on mission: Flooded Nallas, broken route, landslide prone areas, 40 KMs & 15 hours on stretcher, the Himveers of @ITBP men rescue injured woman from a remote village in Pithoragarh. Gr8 effort in saving life of an injured local woman, who fell accidentally from hill. Bravo! pic.twitter.com/M4yS5UFXke
— kamaljit sandhu (@kamaljitsandhu) August 23, 2020
ଭିଡିଓଟି ଉତ୍ତରାଖଣ୍ଡର ପିଥୋରଗଡ଼ ଜିଲାର ଲାପ୍ସା ଗ୍ରାମର ଦୃଶ୍ୟ। ଗ୍ରାମରେ ଜଣେ ମହିଳା ଅସୁସ୍ଥ ହୋଇପଡ଼ିବା ପରେ ତାଙ୍କୁ ଚିକିତ୍ସା ଯୋଗାଇଦେବା ପାଇଁ ଆଇଟିବିପି ଯବାନମାନେ ମହିଳାଙ୍କୁ କାନ୍ଧରେ ଧରି ମୁନିୟାରୀ ପର୍ଯ୍ୟନ୍ତ ୪୦ କିମି ଦୂରକୁ ଚାଲିଚାଲି ଯାଇଥିଲେ। ଯାତ୍ରା ସମୟରେ ଆଇଟିବିପି ଯବାନମାନେ ପାହାଡ଼, ପର୍ବତ, ନଦୀ, ନାଳ ଅତିକ୍ରମ କରିଯାଇଥିଲେ। ଅସୁସ୍ଥ ମହିଳାଙ୍କୁ ଏକ ଷ୍ଟ୍ରେକଚର ସହାୟତାରେ ଧରି ଯବାନମାନେ ୧୫ ଘଣ୍ଟା ଦୁର୍ଗମ ରାସ୍ତାରେ ଚାଲି ଚାଲି ଶେଷରେ ଲକ୍ଷ୍ୟସ୍ଥଳରେ ପହଞ୍ଚିଥିଲେ। ବର୍ଷାଦିନେ ଉତ୍ତରାଖଣ୍ଡରେ ରାସ୍ତା ଭାରି ସଙ୍ଗୀନ ହୋଇପଡ଼ିଥାଏ। ବର୍ତ୍ତମାନ ସାରା ରାଜ୍ୟରେ ୨୧୦ ରାସ୍ତା ବନ୍ଦ ରହିଛି। ଫଳରେ ୪ଟି ରାଜ୍ୟ ରାଜପଥ, ୭ଟି ରାଜ୍ୟ ସଡ଼କ ଓ ୮ଟି ଜିଲା ରାସ୍ତାରେ ଯାତାୟତ ବାଧାପ୍ରାପ୍ତ ହୋଇଛି।
