ଡେରାଡୁନ୍,୭।୨: ଉତ୍ତରାଖଣ୍ଡରେ ପ୍ରକୃତିର କରାଳ ତାଣ୍ଡବ ଦେଖିବାକୁ ମିଳିଛି। ବରଫ ଅତଡା ଖସି ଧୌଳି ଗଙ୍ଗା ନଦୀରେ ଭୟଙ୍କର ବନ୍ୟା ପରିସ୍ଥିତି ଉପଜୁଛି। ଫଳରେ ନିକଟରେ ଥିବା ଋଷିଗଙ୍ଗା ଜଳ ବିଦ୍ୟୁତ୍ ପ୍ରକଳ୍ପ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି। ମାଟି ପାଣି ପସିବା ଯୋଗୁଁ ପ୍ରକଳ୍ପରେ କାର୍ଯ୍ୟ କରୁଥିବା ଅନେକ ଶ୍ରମିକ ନିଖୋଜ ହେବାର ଆଶଙ୍କା ରହିଛି। ଅଧିକାରୀ କହିଛନ୍ତି ଯେ ଉତ୍ତରାଖଣ୍ଡର ଧୌଲି ଗଙ୍ଗା ନଦୀରେ ପ୍ରବଳ ବନ୍ୟା ଆସିବା ପରେ ବିଦ୍ୟୁତ ପ୍ରକଳ୍ପରେ କାର୍ଯ୍ୟ କରୁଥିବା ପ୍ରାୟ ୧୦୦ରୁ ୧୫୦ କର୍ମଚାରୀ ନିଖୋଜ ଅଛନ୍ତି। ଆଇଟିବିପି ଯବାନମାନେ ଦୂତ ଭାବରେ ସେଠାରେ କାର୍ଯ୍ୟ କରୁଛନ୍ତି। ଗଭୀର ଖାଲରେ ଦଉଡି ସାହାଯ୍ୟରେ ଦଳ ଶ୍ରମିକମାନଙ୍କୁ ବଞ୍ଚାଇବା ପାଇଁ ସେମାନେ ଚେଷ୍ଟା କରୁଛନ୍ତି। ସୈନିକମାନେ ଏପର୍ଯ୍ୟନ୍ତ ୧୬ ଜଣ ଶ୍ରମିକଙ୍କୁ ସୁରକ୍ଷିତ ଭାବରେ ଉଦ୍ଧାର କରିଛନ୍ତି।
ବିପର୍ଯ୍ୟୟ ସମୟରେ ତପୋବନ ବିଷ୍ଣୁଗଡ ଜଳ ବିଦ୍ୟୁତ ପ୍ରକଳ୍ପରେ ମଧ୍ୟ ବ୍ୟାପକ କ୍ଷୟକ୍ଷତି ହୋଇଛି। ପ୍ରକଳ୍ପର ଟନେଲ ନିର୍ମାଣ କାର୍ଯ୍ୟ ଜୋରସୋରରେ ଚାଲିଥିଲା। ରବିବାର ଦିନ ଟନେଲ ନିର୍ମାଣ କାର୍ଯ୍ୟରେ ଶହ ଶହ ଶ୍ରମିକ ମଧ୍ୟ ସାମିଲ ହୋଇଥିଲେ। ଋଷିଗଙ୍ଗା ନଦୀରେ ବନ୍ୟା ପରିସ୍ଥିତି ସୃଷ୍ଟି ହେବା ମାତ୍ରେ ନଦୀ ଜଳ ଏବଂ ଆବର୍ଜନା ପ୍ରବେଶ କଲା। ଏହି ସମୟ ମଧ୍ୟରେ ସେଠାରେ କାର୍ଯ୍ୟ କରୁଥିବା ପ୍ରାୟ ୧୬ରୁ ୧୭ ଜଣ ଶ୍ରମିକ ଅଳିଆ ଗଦାରେ ଫସି ରହିଥିଲେ। ଆଇଟିବିପି, ଏସ୍ଡିଆର୍ଏଫ୍ ଏବଂ ଏନ୍ଡିଆର୍ଏଫ୍ ଦଳ ବିପର୍ଯ୍ୟୟର ସୂଚନା ପରେ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଥିଲେ। ଏହି ସମୟ ମଧ୍ୟରେ ଆଇଟିବିପି ଦଳ ତପୋବନ ଟନେଲକୁ ଯାଇଥିଲେ। ବହୁ ପରିଶ୍ରମ ପରେ ଦଳ ସେଠାରୁ ଶ୍ରମିକମାନଙ୍କୁ ଉଦ୍ଧାର କରାଯାଇଥିଲା। ଯଦିଓ ଦଳ ତଳକୁ ଓହ୍ଲାଇବାରେ ବହୁ ଅସୁବିଧାର ସମ୍ମୁଖୀନ ହୋଇଥିଲେ, ତଥାପି ଅନେକ ଶ୍ରମିକଙ୍କୁ ସୁରକ୍ଷିତ ଭାବେ ବାହାରକୁ ନିଆଯାଇଥିଲା। ସୈନ୍ୟଙ୍କ ସାହସିକତାର କାର୍ଯ୍ୟ ବେଳର ଫଟୋ ସୋସିଆଲ ମିଡିଆରେ ଭାଇରାଲ ହୋଇଛି। ରବିବାର ସକାଳେ ଗ୍ଲେସିୟର ଫାଟିଥିବା ଜଣାପଡିଥିଲା। ଏହା ପରେ ଏକ ଡ୍ୟାମ ମଧ୍ୟ କ୍ଷତିଗ୍ରସ୍ତ ହୋଇ ଧୌଲି ନଦୀରେ ବନ୍ୟା ପରିସ୍ଥିତି ସୃଷ୍ଟି କରିଥିଲା। ବିପର୍ଯ୍ୟୟରେ ଏପର୍ଯ୍ୟନ୍ତ ପ୍ରାୟ ଦଶ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି।