ନୂଆଦିଲ୍ଲୀ,୨୯।୭: ମସଲା ପ୍ରସ୍ତୁତ କରୁଥିବା ଭାରତର ପ୍ରମୁଖ କମ୍ପାନୀ ସନ୍ରାଇଜକୁ ଏଫ୍ଏମ୍ସିଜି କମ୍ପାନୀ ଆଇଟିସି କ୍ରୟ କରିଛି। ଏହି ଡିଲ୍ ୨୧୫୦ କୋଟି ଟଙ୍କାରେ ହୋଇଥିବା କମ୍ପାନୀ ପ୍ରକାଶ କରିଛି। ସନ୍ରାଇଜର ଆରମ୍ଭ କୋଲକାତାରୁ ହୋଇଥିଲା। ପୂର୍ବ ଭାରତରେ ଏହା ଭଲ ବ୍ୟବସାୟ କରୁଥିଲା। ବିହାର, ପଶ୍ଚିମବଙ୍ଗ, ଉତ୍ତର ପୂର୍ବାଞ୍ଚଳ ରାଜ୍ୟ ଏବଂ ଓଡ଼ିଶା ଭଳି ସ୍ଥାନଗୁଡିକରେ କମ୍ପାନୀ ନିଜର ଉପସ୍ଥିତି ଜାହିର କରିଥିଲା। ଆଇଟିସି ସନ୍ରାଇଜର ୧୦୦% ଅଂଶଧନ କ୍ରୟ କରିଥିବା ଜଣାପଡିଛି। ଏହି ଡିଲ୍ ସହିତ ସନ୍ରାଇଜ ମସଲା ବାଦ୍ ଏହାର ସହାୟକ କମ୍ପାନୀ ସନ୍ରାଇଜ ସତିଗ୍ରହ ପ୍ରାଇଭେଟ ଲିମିଟେଡ, ହାବିଟ୍ସ ଇଣ୍ଟରନ୍ୟାଶନାଲ ଫୁଡ୍ସ ପ୍ରାଇଭେଟ ଲିମିଟେଡ୍ ମଧ୍ୟ ସାମିଲ ରହିଛି। ଏହି ୨ କମ୍ପାନୀ ଆଇଟିସି ସହ ମଧ୍ୟ ଯୋଡ଼ିହୋଇ ଯାଇଛନ୍ତି। ଗୁଣାତ୍ମକ ମସଲା ପ୍ରସ୍ତୁତ କରିବାରେ ସନ୍ରାଇଜ ଏକ ପ୍ରମୁଖ କମ୍ପାନୀ ଭାବେ ଉଭା ହୋଇଛି। ସନ୍ରାଇଜ କୋଲକାତା, ଆଗ୍ରା, ଜୟପୁର ଏବଂ ବିକାନେର ଭଳି ସ୍ଥାନରେ ଫ୍ୟାକ୍ଟ୍ରି ସ୍ଥାପନ କରିଛି। ନୂଆ ଅଧିଗ୍ରହଣ ଦ୍ୱାରା ଦେଶର ବିଭିନ୍ନ ପ୍ରାନ୍ତରେ ଆଇଟିସି ଏହାର ଉପସ୍ଥିତି ବଢାଇବାକୁ ସକ୍ଷମ ହେବ ବୋଲି କହିଛି।
