କେନ୍ଦୁଝର, ୪ା୮(ସ୍ବ.ପ୍ର.): କେନ୍ଦୁଝର ଜିଲା ବାଂଶପାଳ ବ୍ଲକ ଅନ୍ତର୍ଗତ ବାୟାପଣ୍ଡାଧାର ଜୁଆଙ୍ଗ ଗ୍ରାମରେ ବର୍ଷକରେ ଅକାଳରେ ୧୨ଜଣଙ୍କ ମୃତ୍ୟୁ ଘଟିଛି। ଏହାକୁ ନେଇ ଏକ ଖବର ଧରିତ୍ରୀରେ ପ୍ରକାଶିତ ହୋଇଥିଲା। ଏହା ଜାଣିବା ପରେ କେନ୍ଦୁଝର ସମନ୍ବିତ ଆଦିବାସୀ ଉନ୍ନୟନ ସଂସ୍ଥାର ତପନ କୁମାର ନାୟକଙ୍କ ନେତୃତ୍ୱରେ ଏକ ଟିମ୍ ଉକ୍ତ ଗାଁରେ ପହଞ୍ଚି ଲୋକଙ୍କ ସମସ୍ୟା ବୁଝିଛନ୍ତି। ଉକ୍ତ ଅଞ୍ଚଳକୁ ଗସ୍ତ କରି ଲୋକଙ୍କ ସ୍ବାସ୍ଥ୍ୟାବସ୍ଥା ଓ ଅନ୍ୟାନ୍ୟ ସମସ୍ୟା ବୁଝିଛନ୍ତି। ତାଙ୍କ ସହିତ ଆଇଟିଡିଏର ସହକାରୀ ଯନ୍ତ୍ରୀ, ଜୁଆଙ୍ଗ ଉନ୍ନୟନ ସଂସ୍ଥାର ସ୍ବତନ୍ତ୍ର ଅଧିକାରୀ ଓ ପ୍ରକଳ୍ପ ସଂଯୋଜକ ଯୋଗଦେଇଥିଲେ ା ସେହିପରି ଉକ୍ତ ଅଞ୍ଚଳରେ କାର୍ଯ୍ୟକରୁଥିବା ଆରସିଡିସି ସଂଗଠନର ପ୍ରୋଗ୍ରାମ ସଂଯୋଜକ ଆନନ୍ଦ ଚରଣ ସେଠୀ, ବୀରବର ନାୟକ ଉପସ୍ଥିତ ଥିଲେ।
ଆଲୋଚନା ବେଳେ ଜୁଆଙ୍ଗ ମାନେ ସେମାନଙ୍କ ଘର ସମସ୍ୟା, ରୋଜଗାର ସମସ୍ୟା ଓ ବିପର୍ଯ୍ୟସ୍ତ ସ୍ବାସ୍ଥ୍ୟାବସ୍ଥା ଆଦି ସମସ୍ୟା ଜଣାଇବା ସହ ଅକାଳରେ ମୃତ୍ୟୁବରଣ କରୁଥିବା ଲୋକଙ୍କ ବିଷୟରେ ଅବଗତ କରିଥିଲେ। ଉକ୍ତ ଗ୍ରାମରେ ଜୁଆଙ୍ଗ ମାନେ ଘର ପାଇ ନ ଥିବା ବେଳେ ପାଣି ସମସ୍ୟା ମଧ୍ୟରେ ରହୁଥିବା ଜଣାଇଥିଲେ। ଏସମ୍ପର୍କରେ ପିଏ ଆଇଟିଡିଏ ନାୟକ କହିଛନ୍ତି, ଖବର ବାହାରିବା ପରେ ଉକ୍ତ ଗ୍ରାମକୁ ଯାଇ ଲୋକଙ୍କ ସମସ୍ୟା ବୁଝାଯାଇଛି। ଏନେଇ ସେ ଜିଲାପାଳଙ୍କୁ ରିପୋର୍ଟ କରି ସେମାନଙ୍କ ସମସ୍ୟା ସମାଧାନ କରିବାକୁ ପଦକ୍ଷେପ ନେବେ। ସେହିପରି ସ୍ବାସ୍ଥ୍ୟ ସମସ୍ୟା ସମାଧାନ ପାଇଁ ମଧ୍ୟ ପଦକ୍ଷେପ ନେବେ।
