ପିଲାଟିବେଳୁ ତାଙ୍କର ନୃତ୍ୟ ପ୍ରତି ରହିଥିଲା ପ୍ରବଳ ଦୁର୍ବଳତା। ସାତବର୍ଷ ବୟସ ହୋଇଥିବା ବେଳେ ସେ ମା’ଙ୍କ ପ୍ରୋତ୍ସାହନରେ ନୃତ୍ୟ ଶିକ୍ଷା କରିଥିଲେ। ସମୟକ୍ରମେ ବିଭିନ୍ନ ମଞ୍ଚରେ ଓଡ଼ିଶୀ ନୃତ୍ୟ ପରିବେଷଣ କରିଲେ। ସେ ହେଲେ ଇତିଶ୍ରୀ ନାୟକ। ପିତା- ବୈରାଗୀ ନାୟକ,ମାତା-ରଞ୍ଜନା ନାୟକ। ଘର ଜଗତ୍ସିଂହପୁର ଜିଲା ଷଣ୍ଢକୁଦ, ପାରାଦୀପ ମ୍ୟୁନିସିପାଲିଟିରେ l ସେ କୁହନ୍ତି, ‘ସ୍କୁଲ ବୟସରୁ ଓଡ଼ିଶୀନୃତ୍ୟ ପ୍ରତି ମନବଳାଇଥିଲି। ୨୦୦୯ ମସିହାରେ ଉତ୍କଳ ସଙ୍ଗୀତ ମହାବିଦ୍ୟାଳୟରେ ନୃତ୍ୟଶିକ୍ଷା ଆରମ୍ଭକରି ୨୦୧୪ ମସିହାରେ ଓଡ଼ିଶୀ ନୃତ୍ୟରେ ଗ୍ରାଜୁଏଶନ ଶେଷ କଲି। ୨୦୧୬ ମସିହାରେ ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟରେ ଓଡିଶୀ ନୃତ୍ୟରେ ସ୍ନାତକୋତ୍ତର ଶେଷ କରିବା ସହିତ ଦର୍ଶନଶାସ୍ତ୍ରରେ ସ୍ନାତକ କଲି। ଓଡ଼ିଶୀରେ ମୋର ଗୁରୁମାନେ ହେଲେ ଗୁରୁଶ୍ରୀ ନିରଞ୍ଜନ ରାଉତ, ଗୁରୁଶ୍ରୀ ନବକିଶୋର ମିଶ୍ର, ଗୁରୁଶ୍ରୀ ଲିଙ୍ଗରାଜ ସ୍ବାଇଁ, ଗୁରୁ ସ୍ନେହପ୍ରଭା ସାମନ୍ତରାୟ, ଗୁରୁଶ୍ରୀ ମନୋରଞ୍ଜନ ପ୍ରଧାନ ଓ ଗୁରୁଶ୍ରୀ ପଙ୍କଜ କୁମାର ପ୍ରଧାନ। ମୁଁ ଯେତେବେଳେ ପାରାଦୀପରେ ଥିବା ନୋଳିଆସାହି ଉଚ୍ଚ ପ୍ରାଥମିକ ବିଦ୍ୟାଳୟରେ ନୃତ୍ୟ ଶିକ୍ଷୟିତ୍ରୀ ଭାବେ କାମ କଲି ସେହି ସମୟରୁ ନିଜସ୍ବ ପ୍ରଚେଷ୍ଟାରେ ଓଡ଼ିଶୀ ନୃତ୍ୟର ପ୍ରଚାର ପ୍ରସାର ପାଇଁ କାର୍ଯ୍ୟ କରୁଛି। ପାରାଦୀପରେ ପରମଜ୍ୟୋତି କଳାକ୍ଷେତ୍ର ନାମରେ ଏକ ଓଡ଼ିଶୀ ଶିକ୍ଷା ଅନୁଷ୍ଠାନ ପ୍ରତିଷ୍ଠାକରି ବସ୍ତି ଅଞ୍ଚଳର ଗରିବ, ଅନଗ୍ରସର ପିଲାମାନଙ୍କୁ ନିଃଶୁଳ୍କ ଭାବରେ ଓଡ଼ିଶୀ ନୃତ୍ୟ ଶିକ୍ଷା ଦେଉଛି। ଏହି ଅନୁଷ୍ଠାନ ମାଧ୍ୟମରେ ସ୍ବାମୀ ବିଶ୍ୱଜିତ୍ ରାଉତଙ୍କ ସହଯୋଗରେ କଳାସମ୍ପନ୍ନା ନାମରେ ଶାସ୍ତ୍ରୀୟ ନୃତ୍ୟ ଉତ୍ସବ କାର୍ଯ୍ୟକ୍ରମ ପାରାଦୀପଠାରେ ଆୟୋଜନ କରିଆସୁଛି। ୨୦୧୧ରେ ମୁଁ ରାଜୀବ ଗାନ୍ଧୀ ସମ୍ମାନରେ ସମ୍ମାନିତ ହେବାସହ ସେହି ବର୍ଷ କଳିଙ୍ଗ ଷ୍ଟାଡିୟମରେ ଆୟୋଜିତ ହୋଇଥିବା ବୃହତ୍ ଓଡ଼ିଶୀ ନୃତ୍ୟ କାର୍ଯ୍ୟକ୍ରମରେ ଭାଗ ନେଇ ଗିନିଜ୍ ବିଶ୍ୱ ରେକର୍ଡରେ ନିଜ ନାମକୁ ସାମିଲ କରିଥିଲି। ଏହାପରେ ୨୦୧୮ ମସିହାରେ ପାରାଦୀପ ପୌରପାଳିକା ଦ୍ୱାରା ଉତ୍କଳ ଶିଳ୍ପୀ ସମ୍ମାନରେ ସମ୍ମାନିତ ହୋଇଛି। ଏକ ଘରୋଇ ଟିଭି ଚ୍ୟାନେଲରୁ ଓଡ଼ିଶାର ଶ୍ରେଷ୍ଠ ନାରୀ ସମ୍ମାନ – ୨୦୨୪ ପାଇଛି। ଏବେ ମୁଁ ନୃତ୍ୟ ଶିକ୍ଷକ ଭାବେ ଦିଲ୍ଲୀ ପବ୍ଲିକ ସ୍କୁଲ, ପାରାଦୀପ ରିଫାଇନେରି, ଭାରତୀୟ ତୈଳ ବିଶୋଧନାଗାର ନିଗମରେ କାର୍ଯ୍ୟରତ। ଓଡ଼ିଶୀ ନୃତ୍ୟ ମୋତେ ମାନସିକ ଶାନ୍ତି ଦେଇଥାଏ।