ପାଟନା,୬।୧: ବିହାରର ମାଧେପୁରାରୁ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି। ୮୪ ବର୍ଷ ବୟସ୍କା ବ୍ରହ୍ମଦେବ ମଣ୍ଡଳ ୧୧ଥର କରୋନା ଟିକା ନେଇଥିବା ଦାବି କରିଛନ୍ତି। ୧୨ ଥର ଟିକା ନେବାବେଳେ ସେ ଏହା ଖୁଲାସା କରିଛନ୍ତି। କୁହାଯାଉଛି ଯେ ବୃଦ୍ଧଙ୍କ ଦାବି ପରେ ପରେ ମୁଖ୍ୟ ଶାସନ ସଚିବ ଏହି ଘଟଣାର ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି। ବ୍ରହ୍ମାଦେବ କହିଛନ୍ତି, ଟିକା ନେବା ପରେ ତାଙ୍କ ଶରୀରକୁ ବହୁତ ଆରାମ ମିଳିଥିଲା । ଏପରିକି ପିଠି ଏବଂ ଆଣ୍ଠୁଗଣ୍ଠି ଯନ୍ତ୍ରଣା ମଧ୍ୟ ଭଲ ହୋଇଗଲା।
ବ୍ରହ୍ମଦେବଙ୍କ ଏହି ଦାବି ପରେ ବିହାର ସ୍ବାସ୍ଥ୍ୟ ବିଭାଗରେ ପ୍ରଶ୍ନ ଉଠିଛି। ଜିଲା ସିଭିଲ ସର୍ଜନ ଅମରେନ୍ଦ୍ର ନାରାୟଣ ଶାହି କହିଛନ୍ତି, ବୃଦ୍ଧଙ୍କ ଦାବି ମିଥ୍ୟା ନା ଏଥିରେ କୌଣସି ସତ୍ୟତା ଅଛି ତାହା ଜାଣିବା ପାଇଁ ଉଦ୍ୟମ ଚାଲିଛି। ନିୟମ ଅନୁଯାୟୀ କୌଣସି ବ୍ୟକ୍ତି ଦୁଇଟି ଡୋଜରୁ ଅଧିକ ଗ୍ରହଣ କରିବା ଉଚିତ ନୁହେଁ। ଯଦି ବୃଦ୍ଧଙ୍କ ଦାବି ସତ୍ୟ, ତେବେ ସମ୍ପୃକ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଡାକ ବିଭାଗର ଅବସରପ୍ରାପ୍ତ କର୍ମଚାରୀ ବ୍ରହ୍ମଦେବ ମଣ୍ଡଳ କହିଛନ୍ତି,ସେ ବିଭିନ୍ନ ସମୟରେ ପଞ୍ଜୀକରଣ ପାଇଁ ଆଧାର ଏବଂ ଭୋଟର ପରିଚୟ ପତ୍ର ବ୍ୟବହାର କରିଥିଲେ। ଏହିପରି ଭାବରେ, ସେ ଏପର୍ଯ୍ୟନ୍ତ ୧୧ ଥର କରୋନା ଟିକା ନେଇଛନ୍ତି। ସେ ୧୧ ମାସ ପୂର୍ବରୁ ପ୍ରଥମ ଟିକା ନେଇଥିଲେ।
