ପଦ୍ମପୁର,୧୧।୧୨(ଡି.ଏନ.ଏ.)-ଭଦ୍ରକ ଜିଲା ବାସୁଦେବପୁର ବ୍ଲକ ଅଧୀନ ରାମବେହେରା ସାହିର ରମାମଣି ବେହେରା(୪୧) ଦୀର୍ଘ ୨୩ବର୍ଷ ହେଲା ବିଛଣାରେ ପଡ଼ିଛନ୍ତି। ଚିକିତ୍ସାରେ ଅର୍ଥ ବାଧକ ସାଜିଛି। ଏପଟେ ଘରେ ରମାମଣିଙ୍କ ଶତାୟୁ ବର୍ଷର ରୋଗିଣା ବାପା ବାଇଧର ଶଯ୍ୟାଶାୟୀ। ମା’ ଅନାମଦେଇ ବେହେରା ମଧ୍ୟ ଚଲାବୁଲା କରିପାରୁନାହାନ୍ତି। ଅଭାବୀ ସଂସାରରେ ରୋଗର ବୋଝ ତାଙ୍କୁ ଅସହାୟ କରିଦେଇଛି।
୧୯୯୮ରେ ରମାମଣି ନିଜ ବାଡ଼ିରେ ଆମ୍ବ ତୋଳୁଥିବା ବେଳେ ଅସାବଧାନତା ବଶତଃ ଗଛରୁ ଖସି ପଡ଼ିଥିଲେ। ପ୍ରଥମେ ଭଦ୍ରକ ଓ ପରେ କଟକ ଡାକ୍ତରଖାନାରେ ଚିକତ୍ସା ପରେ ମଧ୍ୟ ଅଣ୍ଟାରୁ ଦୁଇଗୋଡ଼ ଅକର୍ମଣ୍ୟ ହୋଇପଡ଼ିଛି। ନା ଶୌଚ ହୋଇପାରୁଛନ୍ତି ନା ଠିକ୍ରେ ବସି ପାରୁଛନ୍ତି। ବିଛଣାରେ ପଡ଼ି ରହି ଦେହସାରା ଘା’ ହୋଇଗଲାଣି। ମାସିକ ଔଷଧ ପାଇଁ ୬ରୁ ୭ ହଜାର ଟଙ୍କା ଖର୍ଚ୍ଚ ହେଉଥିବା ବେଳେ ଶଯ୍ୟାଶାୟୀ ବାପା ଓ ମା’ଙ୍କ ଲାଗି ୨ରୁ ୩ ହଜାର ଟଙ୍କାର ଔଷଧର ଆବଶ୍ୟକତା ରହିଛି। ଏପରି କ୍ଷେତ୍ରରେ ଘରୋଇ କମ୍ପାନୀରେ ଚାକିରି କରୁଥିବା ଭାଇ ନିଜର ଦୁଇପିଲା ଓ ସ୍ତ୍ରୀଙ୍କୁ ପୋଷିବା କଷ୍ଟକର ହୋଇପଡୁଛି। ଏଣୁ ନିଜର ଦିବ୍ୟାଙ୍ଗ ଭତ୍ତା ଓ ଗାଁ ଲୋକଙ୍କଠାରୁ ମାଗି ପାଉଥିବା ଟଙ୍କାରେ ଔଷଧ କିଣୁଛନ୍ତି ରମାମଣି। ପ୍ରତ୍ୟେହ ଗ୍ରାମବାସୀ ମଧ୍ୟ ତାଙ୍କୁ ଟଙ୍କା ଦେବା ସମ୍ଭବ ହେଉନାହିଁ। ଫଳରେ ନିଜର ଔଷଧ ଖର୍ଚ୍ଚ ତୁଲାଇ ନ ପାରି ଅସହାୟ ଅବସ୍ଥାରେ ଭଙ୍ଗା ପଲିଥିନ ଘେରା ଘରେ ସେ ପଡ଼ି ରହିଛନ୍ତି। ଆବାସ ଯୋଜନାରେ ଦିବ୍ୟାଙ୍ଗମାନଙ୍କୁ ଅଗ୍ରାଧିକାର ଭିତ୍ତିରେ ଘର ଯୋଗାଇ ଦେବା ପାଇଁ ନିୟମ ରହିଥିଲେ ମଧ୍ୟ କୌଣସି ପୁରୁଷ ଲୋକ ତାଙ୍କ ଘରେ ନ ଥିବାରୁ କେହି ସରକାରୀ ଅଧିକାରୀଙ୍କୁ ଯୋଗାଯୋଗ କରିପାରୁ ନାହାନ୍ତି। ଏ ସମ୍ପର୍କରେ ପୌରାଞ୍ଚଳ କାର୍ଯ୍ୟନିର୍ବାହୀ ଅଧିକାରୀ ମାନସ କୁମାର ଦଣ୍ଡପାଟଙ୍କୁ ପଚାରିବାରୁ ସେ ଏ ଦିଗରେ ପଦକ୍ଷେପ ନେଇ ତାଙ୍କୁ ଘର ଯୋଗାଇ ଦେବେ ବୋଲି କହିଛନ୍ତି। ଜିଲାପାଳ ତ୍ରିଲୋଚନ ମାଝି ଏନେଇ ଜାଣିବା ପରେ ସେ କାର୍ଯ୍ୟନିର୍ବାହୀ ଅଧିକାରୀଙ୍କୁ ତୁରନ୍ତ ରମାମଣିଙ୍କୁ ସହାୟତା ପ୍ରଦାନ କରିବା ପାଇଁ ନିର୍ଦ୍ଦେଶ ଦେଇଛନ୍ତି।