ଦଶମନ୍ତପୁର, ୨୭ା୧୨ ( ଡି.ଏନ.ଏ.):ଦୀର୍ଘ ୫ ବର୍ଷ ହେଲା ଅଧାପନ୍ତରିଆ ଭାବେ ପଡିରହିଛି ଅଙ୍ଗନଓ୍ବାଡ଼ି ଗୃହ। ନିଜସ୍ବ ଗୃହ ନ ଥିବାରୁ ଗ୍ରାମର ଭିଭିନ୍ନ ଲୋକଙ୍କ ଘର ପିଣ୍ଡାରେ ପିଲାଙ୍କୁ ବସାଇ ପାଠ ପଢାଉଛନ୍ତି ଅଙ୍ଗନଓ୍ବାଡ଼ି କର୍ମୀ। ଏପରି ଦେଖିବାକୁ ମିଳିଛି କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ଲୁଲା ପଞ୍ଚାୟତର ମିଟକର୍ଲି ଗ୍ରାମରେ। ଏନେଇ ଗ୍ରାମବାସୀ କହନ୍ତି, ଗତ ୨୦୧୭-୧୮ ଆର୍ଥିକ ବର୍ଷରେ ଆମ ଗ୍ରାମରେ ଏକ ଅଙ୍ଗନଓ୍ବାଡି ଗୃହ ନିର୍ମାଣ ଲାଗି କାର୍ଯ୍ୟ ଆରମ୍ଭ ହୋଇଥିଲା। ଏଥିପାଇଁ ବ୍ୟୟ ଅଟକଳ ମୂଲ୍ୟ ୭ ଲକ୍ଷ ଟଙ୍କା ରଖାଯାଇଥିଲା। ଏହାର ତଦାରଖ ଦାୟିତ୍ୱରେ ଲୁଲା ପଞ୍ଚାୟତ ପାଇଁ କନିଷ୍ଠ ଯନ୍ତ୍ରୀ ଥିଲେ। ପ୍ରଶାସନର ଅବହେଳା ଯୋଗୁ ଗୃହ କାର୍ଯ୍ୟ ଠିକ୍ ସମୟରେ ସରିପାରିନାହିଁ। ଫଳରେ ଶିଶୁ, କିଶୋର କିଶୋରୀ ଓ ଗର୍ଭବତୀ ମହିଳାମାନେ ଅସୁବିଧାର ସମ୍ମୁଖୀନ ହେଉଛନ୍ତି। ଗୃହ ନିର୍ମାଣ କାର୍ଯ୍ୟ ଶେଷ କରିବା ଲାଗି ବିଭାଗୀୟ କନିଷ୍ଠ ଯନ୍ତ୍ରୀଙ୍କଠାରୁ ଆରମ୍ଭ କରି ବିଡିଓଙ୍କ ପର୍ଯ୍ୟନ୍ତ ସମସ୍ତଙ୍କୁ ଜଣାଇ କିଛି ସୁଫଳ ମିଳିନାହିଁ। କୌଣସି ବିକଳ୍ପ ନ ପାଇ ଗ୍ରାମର ବିଭିନ୍ନ ଲୋକଙ୍କ ପିଣ୍ଡାରେ ଅଙ୍ଗନଓ୍ବାଡି କର୍ମୀ ଭଜନ୍ତି ଭତ୍ରା ପାଠ ପଢାଉଛନ୍ତି। ଏସମ୍ପର୍କରେ କନିଷ୍ଠଯନ୍ତ୍ରୀ ହଳଧର ସିଅଲଙ୍କୁ ପଚାରିବାକୁ ତାଙ୍କ ଫୋନ ଯୋଗେ ଯୋଗାଯୋଗ କରିଥିଲେ ମଧ୍ୟ ତାଙ୍କ ଫୋନ ଲାଗି ନ ଥିଲା। ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଗ୍ରାମବାସୀ ସବନା ସାଉନ୍ତା, ଯଦୁ ସାଉନ୍ତା, ଶ୍ୟାମ ସାଉନ୍ତା, ରାମଦାସ ମୁଦୁଲି, ହାଡୁ ଦିଶାରି ଦାବି କରିଛନ୍ତି।
