ଆନନ୍ଦପୁର/କଣ୍ଟିପାଳ,୨।୧(ସ୍ବ.ପ୍ର./ଡି.ଏନ୍.ଏ.): କେନ୍ଦୁଝର ଜିଲା ଆନନ୍ଦପୁର ବ୍ଲକ ଅଧୀନ କଣ୍ଟିପାଳ ପଞ୍ଚାୟତ ବରବେଡ଼ା ସାହିରେ ପାନୀୟ ଜଳ ସଙ୍କଟ ଦେଖାଦେଇଛି। ସର୍ବସାଧାରଣରେ ବ୍ୟବହାର ପାଇଁ ଥିବା ନଳକୂପ ମାସେ ହେଲା ଅଚଳ ହୋଇପଡିଛି। ନୂଆ ନଳକୂଅର ଖୋଳା କାର୍ଯ୍ୟ ୨ମାସ ହେବ ଶେଷ ହୋଇଥିଲେ ମଧ୍ୟ ଅଦ୍ୟାବଧି କାର୍ଯ୍ୟକ୍ଷମ ହୋଇପାରୁନାହିଁ। ବ୍ଲକ କାର୍ଯ୍ୟାଳୟ ପରିସରରେ ଥିବା ଜନସ୍ବାସ୍ଥ୍ୟ ବିଭାଗ ନିକଟରେ ଅଭିଯୋଗକଲେ ଜିନିଷ ନାହିଁ , ନୂଆ ନଳକୂଅ ଲଗାଯାଇ ହୋଇପାରୁ ନ ଥିବା କହୁଛନ୍ତି। ଫଳରେ ଲୋକମାନେ ବାଧ୍ୟ ହୋଇ ନିକଟସ୍ଥ ଘାଗରା ନଦୀରୁ ପାଣି ଆଣି ବ୍ୟବହାର କରୁଛନ୍ତି।
ବ୍ଲକ ଅଫିସ୍ରେ ଜଣାଇଛୁ, ପଞ୍ଚାୟତରେ ଜଣାଇଛୁ। ସର୍ବସାଧାରଣଙ୍କ ପାନୀୟ ଜଳ ସୁବିଧା ପାଇଁ କିଛି ବ୍ୟବସ୍ଥ କରାଯାଉ ନାହିଁ କି ଅଚଳ ନଳକୂପକୁ ସଜଡ଼ା ଯାଉନାହିଁ। ଫଳରେ ଲୋକେ ନାଳରୁ ପାଣି ଆଣି ବ୍ୟବହାର କରୁଥିବା ବରବେଡ଼ା ସାହିର ଜ୍ୟୋତ୍ସ୍ନାରାଣୀ ଖଣ୍ଡ ପ୍ରକାଶ କରିଛନ୍ତି। ସେହିପରି ଗ୍ରାମର ତାପସୀ ନାଏକ କହିଛନ୍ତି, ପାନୀୟ ଜଳ ପାଇଁ ଆମେ ବହୁ ହିନସ୍ତା ହେଉଛୁ। ଘାଗରା ନାଳରୁ ପାଣି ଆଣି ଚଳୁଛୁ। ନୂଆ ନଳକୂପ ଖୋଲାଯାଇଛି। ହେଲେ କାର୍ଯ୍ୟକ୍ଷମ ହୋଇନାହିଁ। ଅଭିଯୋଗ କଲେ ଆବଶ୍ୟକ ସରଞ୍ଜାମ ନ ଥିବା କହୁଛନ୍ତି। ଏନେଇ ଜିଲା ପ୍ରଶାସନ ତୁରନ୍ତ ସମାଧାନ କରିବାକୁ ସାଧାରଣରେ ଦାବି ହୋଇଛି।