ଦଶମନ୍ତପୁର, ୧୧ା୨( ଡି.ଏନ.ଏ): କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ଏ. ମାଲକାନଗିରି ପଞ୍ଚାୟତ ଯୋଗି ମାଳିଗୁଡା ଗ୍ରାମର ଶ୍ରମିକମାନେ ଆଜି ବର୍ଷେ ହେଲା କୁଲି କାମ କରି ନିଜ ପ୍ରାପ୍ୟ ପାଇ ନ ଥିବା ଅଭିଯୋଗ କରିଛନ୍ତି। ଗତ ୨୦୨୧-୨୨ ଆର୍ଥିକ ବର୍ଷରେ ୨ ଲକ୍ଷ ଟଙ୍କା ବ୍ୟୟ ଅଟକଳରେ ଏକ ଡ୍ରେନ କାର୍ଯ୍ୟ କରାଯାଇଥିଲା। ଏହି କାର୍ଯ୍ୟ ଠିକାଦାର ଲକ୍ଷ୍ମଣ କୁଳଦୀପ ଶ୍ରମିକମାନଙ୍କୁ ନେଇ କରିଥିଲେ। ଗ୍ରାମର ଶତାଧିକ ବ୍ୟକ୍ତି ନିୟୋଜିତ ହୋଇ ଶ୍ରମିକ ରୂପେ ଜଣକା ୧୦ରୁ୧୨ ଦିନ ଲେଖାଏ କାମ କରିଥିଲେ। କାମ ଶେଷ ହୋଇ ବର୍ଷେରୁ ଅଧିକ ଦିନ ବିତିଯାଇଥିଲେ ମଧ୍ୟ ସେମାନଙ୍କୁ ଟଙ୍କାଟିଏ ମଜୁରି ମିଳିନାହିଁ। ବାରମ୍ବାର ଠିକାଦାରଙ୍କ ଘରକୁ ଯାଇ ମଜୁରି ଟଙ୍କା ମାଗିଲେ ମଧ୍ୟ କୌଣସି ସୁଫଳ ମିଳୁନାହିଁ। ା ବିଭିନ୍ନ ଆଳ ଦେଖାଇ ଆଜି କାଲି କହି ସେ ଠକୁଛନ୍ତି ବୋଲି ଗ୍ରାମର ହରି ମାଳି, ସମାରୁ ମାଳି, ଡମାଇ ମାଳି, ବୁଧରା ମାଳି, ହାରାବତୀ ମାଳିଙ୍କ ସହ ଅନ୍ୟମାନେ ପ୍ରକାଶ କରିଛନ୍ତି। ଏସମ୍ପର୍କରେ ସମ୍ପୃକ୍ତ ଠିକାଦାର କୁଳଦୀପଙ୍କୁ ପଚାରିବାରୁ ସେ କହିଲେ ଶ୍ରମିକମାନଙ୍କୁ କିଛି କିଛି ମଜୁରି ଟଙ୍କା ଦେଇଛି। ଶ୍ରମିକମାନେ କିଛି ଟଙ୍କା ପାଇ ନ ଥିବା କହୁଥିବା ସମ୍ପର୍କରେ ତାଙ୍କୁ ପଚାରିବାରୁ ସେ ବିଭିନ୍ନ ଆଳ ଦେଖାଇ ନୀରବ ରହିଥିଲେ।