ଦାରିଙ୍ଗବାଡି,୧୨।୭(ଅରୁଣ ସାହୁ ): ଦାରିଙ୍ଗବାଡି ବ୍ଲକ ହାତୀମୁଣ୍ଡା ପଞ୍ଚାୟତର ଦୁର୍ଗମ ତାମାଙ୍ଗି ଗ୍ରାମକୁ ସଂଯୋଗୀକରଣ ପୋଲ ନିର୍ମାଣରେ ବିଳମ୍ବ ହେବାରୁ ଗତ ୧ ବର୍ଷ ହେଲା ବସ ଚଳାଚଳ ବନ୍ଦ ହୋଇଯାଇଛି । ଫଳରେ ତାମାଙ୍ଗି ଗ୍ରାମ ସମେତ କୁମ୍ଭାରିପଦର, ପୀଡ଼ିକାରିପି, ଗ୍ରାମ ଓ ପର୍ଯ୍ୟଟନ କ୍ଷେତ୍ର ଋଷିମାଳକୁ ପର୍ଯ୍ୟଟକ ଓ ଅଞ୍ଚଳବାସୀ ଯାତାୟାତରେ ସମସ୍ୟା ଦେଖାଦେଇଛି। ଦୀର୍ଘ ଏକ ବର୍ଷ ହେଲା ଫୁଲବାଣୀଠାରୁ ବ୍ରାହ୍ମଣୀଗାଁ ଦେଇ ତାମାଙ୍ଗି ଗ୍ରାମକୁ ଯାତାୟାତ କରୁଥିବା ସରକାରୀ ବସ ବନ୍ଦ ହୋଇଯାଇଛି ବୋଲି ଗ୍ରାମର ତତ୍କାଳୀନ ସମିତିସଭ୍ୟ ଉପେନ୍ଦ୍ର ବଳିୟାରସିଂ କହିଛନ୍ତି। ଏନେଇ ବାରମ୍ବାର ଜିଲା ପ୍ରଶାସନକୁ ଜଣାଇଥିଲେ ସୁଦ୍ଧା କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ସେହିପରି ଯେଉଁ ଦୁଇଟି ପୋଲ ନିର୍ମାଣ କାର୍ଯ୍ୟ ଚାଲିଛି ତାହା ଅତି ନିମ୍ନମାନର କାର୍ଯ୍ୟ କରାଯାଉଛି। ଗୋଟିଏ ପୋଲରେ ସଂଯୋଗୀକରଣ ରାସ୍ତା ନିର୍ମାଣ ଚାଲିଥିବା ବେଳେ ଗାର୍ଡୱାଲ କରାଯାଇନାହିଁ, ଫଳରେ ପ୍ରବଳ ବର୍ଷା ହେଲେ ବର୍ଷା ଜଳରେ ସଂଯୋଗୀକରଣ ରାସ୍ତାଟି ଧୋଇହୋଇ ଯିବା ଆଶଙ୍କା ଉପୁଜିଛି। ଉକ୍ତ କାର୍ଯ୍ୟକୁ ଠିକ ଭାବେ ବିଭାଗ ତଦାରଖ କରୁ ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି । ସେହିପରି ଅନ୍ୟ ପୋଲରେ କେବଳ ଛାତ ପକାଇ ଛାଡିଦିଆଯାଇଥିବା ବେଳେ ତାହା ଅତି ନିମ୍ନମାନର ବୋଲି ତାମାଙ୍ଗିବାସୀ କହିଛନ୍ତି। ଆଗକୁ ପ୍ରବଳ ବର୍ଷା ହେଲେ ତାମାଙ୍ଗି ଗ୍ରାମକୁ ଅଟୋ, ବାଇକ ମଧ୍ୟ ଯାତାୟାତ ବାଧାପ୍ରାପ୍ତ ହେବ ବୋଲି ଅଞ୍ଚଳବାସୀ ଆଶଙ୍କା କରିଛନ୍ତି। ଏ ନେଇ ଗ୍ରାମ୍ୟ ଉନ୍ନୟନ ବିଭାଗର ସହକାରୀ ନିର୍ବାହୀ ଯନ୍ତ୍ରୀ ରମାକାନ୍ତ ପଟ୍ଟନାୟକଙ୍କୁ ପଚାରିବାରୁ ଉକ୍ତ କାର୍ଯ୍ୟ ଦେଖି ଉଚିତ ପଦକ୍ଷେପ ନେବେ ବୋଲି ସେ କହିଛନ୍ତି।
