ମୁମ୍ବାଇ,୧୨ା୧୨: ଆଗାମୀ ଦକ୍ଷିଣ ଆଫ୍ରିକା ଗସ୍ତ ଲାଗି ଭାରତୀୟ ଟେଷ୍ଟ ଦଳ ଘୋଷଣା କରିବା ଅବସରରେ ରୋହିତ ଶର୍ମାଙ୍କୁ ଟି୨୦ ସହ ଦିନିକିଆ ଦଳର ଅଧିନାୟକ ଘୋଷଣା କରିଥିଲା ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ। ବିସିସିଆଇର ଏହି ନିଷ୍ପତ୍ତିକୁ ସ୍ବାଗତ କରିଛନ୍ତି ପୂର୍ବତନ ଭାରତୀୟ ଓପନର ତଥା ଭାଜପା ଏମ୍ପି ଗୌତମ ଗମ୍ଭୀର।
“ମୋ ମତରେ ରେଡ୍ ବଲ ଓ ହ୍ବାଇଟ୍ ବଲ କ୍ରିକେଟ ପାଇଁ ଦୁଇ ଭିନ୍ନ ଭିନ୍ନ ଅଧିନାୟକ ରଖିବା ଭାରତୀୟ କ୍ରିକେଟ ପାଇଁ ଶୁଭଙ୍କର ସାବ୍ୟସ୍ତ ହେବ। ଏହା ଦ୍ୱାରା ଟି୨୦ ଓ ଦିନିକିଆ ଦଳ ଗଠନ କରିବା ଲାଗି ରୋହିତଙ୍କୁ ଯଥେଷ୍ଟ ସମୟ ମିଳିବ। ମୋତେ ଲାଗୁଛି ଜଣେ ଅଧିନାୟକ ଭାବେ ରୋହିତ ଭାରତୀୟ କ୍ରିକେଟ ପାଇ ଁ ଭଲ କରିବେ। ଏହା ସହିତ ଭାରତୀୟ କ୍ରିକେଟ ଏବେ ସୁରକ୍ଷିତ ହାତରେ ଅଛି। ସେ ୫ ଥର ଆଇପିଏଲ ଟାଇଟଲ ଜିତିଛନ୍ତି। ଏହା ଦର୍ଶାଉଛି ଅନ୍ୟ ଅଧିନାୟକଙ୍କ ତୁଳନାରେ ସେ ବହୁତ କିଛି ଠିକ୍ କରୁଛନ୍ତି” ବୋଲି ୨୦୦୭ ଟି୨୦ ଓ ୨୦୧୧ ଦିନିକିଆ ବିଶ୍ୱକପ୍ ଚାମ୍ପିୟନ ଦଳର ସଦସ୍ୟ କହିଛନ୍ତି।
