କେନ୍ଦୁଝର, ୨୯ା୧୧ (ସ୍ବ.ପ୍ର.)-କରୋନା କଟକଣାରେ ବହୁ ଲୋକଙ୍କ ଜୀବନଜୀବିକା ଠପ୍ ହୋଇଯାଇଛି। ବିଶେଷ କରି ଦିନମଜୁରିଆ ଓ ବିଭିନ୍ନ ସ୍ଥାନରେ ଛୋଟ ଛୋଟ ଜଳଖିଆ ଦୋକାନ, ହୋଟେଲ ଆଦି ଖୋଲି ଗୁଜୁରାଣ ମେଣ୍ଟାଉଥିବା ବହୁ ଗରିବ ଶ୍ରେଣୀର ଲୋକେ ଅଧିକ କ୍ଷତିଗ୍ରସ୍ତ ହୋଇଛନ୍ତି। ଜଳଖିଆ ବିକ୍ରି କରୁଥିବା ବିଦ୍ୟାଧର ସାହୁ ନାମକ ଜଣେ ବ୍ୟବସାୟୀ ୮ମାସ ହେଲା ଏଭଳି ସମସ୍ୟା ମଧ୍ୟରେ ଘାଣ୍ଟି ହେଉଛନ୍ତି। ସେ ସ୍ଥାନୀୟ ଇଞ୍ଜିନିୟରିଂ କଲେଜ ନିକଟରେ ଛୋଟ ଦୋକାନ ଖୋଲି ଦହିବରା ଓ ଜଳଖିଆ ବିକି ପରିବାର ଚଳାଇ ଆସୁଥିଲେ। କଲେଜ ପାଖ ହୋଇଥିବାରୁ ଭଲ ବେପାର ମଧ୍ୟ ହେଉଥିଲା। କରୋନା ମହାମାରୀ ପାଇଁ କଲେଜ ବନ୍ଦ ହୋଇଯାଇଥିବାରୁ ବିଦ୍ୟାଧରଙ୍କ ବେପାର ପୂରା ଠପ୍ ହୋଇଯାଇଛି କହିଲେ ଭୁଲ୍ ହେବନାହିଁ। ଏବେ କରୋନା କଟକଣା କୋହଳ ହୋଇଥିଲେ ହେଁ କଲେଜ ଖୋଲି ନ ଥିବାରୁ ସେ ପେଟପାଟଣା ପାଇଁ ଏଣେ ତେଣେ ବୁଲି ଦହିବରା ବିକି ଚଳୁଛନ୍ତି।
ବିଦ୍ୟାଧରଙ୍କ ବୟସ ୬୦ ହେବ। ଘର ନୟାଗଡ ଜିଲାରେ କିନ୍ତୁ ଦୀର୍ଘ ୧୦/୧୨ ବର୍ଷ କେନ୍ଦୁଝରକୁ ଆସି ଦହିବରା, ଜଳଖିଆ ଆଦି ବିକି ଦୁଇ ପୁଅ, ସ୍ତ୍ରୀଙ୍କୁ ଧରି ରହିଆସୁଥିଲେ। ସ୍ତ୍ରୀଙ୍କ ଦେହାନ୍ତ ପରେ ଦୁଇ ପୁଅ ଓ ବୋହୂ ସହିତ ରହୁଛନ୍ତି। ଆଗରୁ ଭଲ ରୋଜଗାର ହେଉଥିଲା। ବଡ ପୁଅ ଓ ଅନ୍ୟ ଜଣେ ପିଲା ସହାୟତାରେ ଦୋକାନ ଖୋଲି ବରା, ଇଡ୍ଲି, ଗୁଲୁଗୁଲା, ସିଙ୍ଗଡା ଏବଂ ଦହିବରା ଆଦି ବିକି ଚଳୁଥିଲେ। ଏବେ ବୁଲି ବୁଲି ବିକିବାକୁ ପଡୁଛ, ଯାହାକି କଷ୍ଟଦାୟକ ହୋଇଥିଲେ ହେଁ କରିବାକୁ ପଡୁଛି ବୋଲି କୁହନ୍ତି ବିଦ୍ୟାଧର। ସାନ ପୁଅ କଟକରେ ଦହିବରା ବିକୁଥିବା ବେଳେ ବଡ ପୁଅ ତାଙ୍କ ପାଖରେ ରହି ତାଙ୍କୁ ସହାୟତା କରୁଛି।
କଲେଜ ବନ୍ଦ ଯୋଗୁ ଏବେ ସେ ସାଇକେଲରେ ବୁଲି ବୁଲି ଦହିବରା ସାଙ୍ଗକୁ ବରା, ଆଳୁଚପ ବିକୁଥିବା କହିଛନ୍ତି। ଆଗଭଳି ରୋଜଗାର ହେଉ ନ ଥିଲେ ହେଁ କଷ୍ଟେମଷ୍ଟେ ଚଳିଯାଉଛୁ ବୋଲି କହିଛନ୍ତି। ଏହି ବୟସରେ ମଧ୍ୟ ସେ ବେଶ୍ ଦୃଢ। ବିଭିନ୍ନ ସ୍ଥାନକୁ ସାଇକେଲରେ ଯାଇ ଜଳଖିଆ ବିକିପାରୁଛନ୍ତି, ଯାହାକି ଅନ୍ୟମାନଙ୍କ ପାଇଁ ଏକ ଦୃଷ୍ଟାନ୍ତ ସାଜିଛନ୍ତି। କଲେଜ ଖୋଲିଲେ ପରିସ୍ଥିତି ସୁଧୁରିବ ବୋଲି ସେ ଆଶା ରଖିଛନ୍ତି।